ون ابن جدلان من لايع لاعه (ان ماعجبتكم سوو فيني الي تبون)

[جطلي بن فهد]

ون ابن جدلان من لايع لاعه = كن في كبدي دوافير صناعي
العب المنكوس واحب روباعه = ممل في الوقت والوقت خداعي
مادريت ان ضحكة الوقت خداعه = شفت مدخالي ولا شفت مطلاعي
لابغيت اسج والا انبسط ساعه = دق قلبي من وراء حدب الاضلاعي
كن من بين الضلوع اله طباعه = تشتغل لانمت واقوم مرتاعي
هم قلبي ما يفرق تجماعه = غير جر الصوت والناس هجاعي
فاقد لي سلعه واكبر ابضاعه = سلعة تشراء ولا هيب تنباعي
رفقة الطيب ليا غير اطباعه = اشهد انها كية توجع اوجاعي
راكب الي صممه صاحب اصناعه = جمس بيك اب من حديثات الانواعي
الغريب الي جديد من انواعه = حوض رفرف مايبي شد وشراعي
لا انس البنزين عجل تفرقاعه = مخطر من سرعته يقلع اقلاعي
لا تحرك شفت في القاع مشلاعه = والتواير تظهر الماء من القاعي
ينعش القلب الحزين ابتهملاعه = لا مشا قام يتهملع تهملاعي
لاوطى الارض ألتعش كن تهزاعه = بنت شيخ طامح من ولد راعي
في رجاء الغايب تحرا لمرجاعه = تنقد العشاق وتطق الاصباعي
نفسها من جمله الناس منصاعه = ماتبي الا واحد ذكره ايشاعي
ينحر اللي يأخذ الطيب بذراعه الصديق الصافي الصامل الواعي
الوفاء والطيب ساسه ومنباعه = يوم بعض الطيب تقليد وصناعي
لا وصلتوا فأخبروني عن اوضاعه = واخبروا راعي السمارا عن اوضاعي
انشدو ويش السبايب بمهزاعه = لا علي ناقص ولا ابيه فزاعي
ودنا نرضيه ونحاول اقناعه = كان بن مهمل بعد يسمع الداعي
كان يبغا حق للحق قطاعه = نقنعه والحق ماعنه مجزاعي
وكان مبغض في الرياجيل بتاعه = لا يجي ناقد ويلحقني ارياعي
للصديق نخلي النفس خضاعه = ما نوريه الجفا والتمطاعي
الصداقه عندنا ذخر وطماعه = صحبة ماهيب صحبة تمتاعي
حد جدتها على البرق لماعه = وان خذت يومين مفعولها ضاعي
فإن تليمنا على العز والطاعه = وان تفرقنا فجوج الله أوساعي
ما أطرد المقفي ليا صفط أشراعه = مخبل اللي للمقفين تباعي
من يحط اذنه على كل سماعه = جاه فرقا ما عدها تجماعي
والزباد اختام هرجي ومطلاعه = يدفعه من ريحة المسك ذعذاعي

وسلااامتكم