شيء غريب يصير لي مع الخطابات؟؟؟؟

[مطيرية عجمية]

السلام عليكم ورحمة الله
ردينا على موضوع الخطابات

حلفت اني لما يتعدى عمري ثلاثين اني اروح لخطابة قبل لا يطوف قطار الزواج على قولتهم
مع العلم ولله الحمد اني ما زال الكثيرون يخطبوني لكن ألحين فرق العمر هو السبب
المهم مو هذا موضوعنا
بدأت رحلتي مع الخطابات من سنة
الله لا يوريكم
طبعا كنت بالنسبة للخطابات عروس لقطة على قولتهم
لكن المشكلة اللي تصير لي معاهم انه فيه طلب لما اطلبه من الخطابات
بعدها ما يردون على تلفوني
والسالفة تكررت مع اربع خطابات
تدرون شنو طلبي؟؟


اولا احب اشير ان الاغلبية عند الخطابات متزوجين ويدورون زوجة ثانية
في البداية رفضت فكرة اني اكون زوجة ثانية
لكن بعد مادخلت الثلاثين تقبلت الفكرة
وقلت للخطابة اقبل المتزوج لكن بشرط يوفر لي سكن خاص بعيد عن زوجته
و يكون مقتدر ماديا ويعدل بيننا في كل شي

وفعلا حصلت عند الخطابات رجاجيل مستعدين على هالشي
لكن المشكلة اللي تصير اهي اني اشترط(( ان الخطبة تتم عن طريق الحريم اولا ثم خطبة الرجاجيل))
اتفاجأ ان الرجال غير رأيه والخطابة ما عاد ترد على اتصالاتي
طبعا انا كان هدفي من هالشرط اني اضمن ان الرجال راح يتزوجني بعلم اهله وزوجته
وهذا بالنسبة لي مهم وعلشان اضمن هالشي اشترط ان الحريم يجون اولا للبيت ويشوفني ويتعرفون على اهلي ويسألون عنا ونسأل عنهم وهذي اصول الخطبة

لكن سبحان الله بمجرد اني اطلب هالطلب يرفض الرجال ويقول ان امه متوفيه او كبيرة بالسن وما عنده خوات وكلهم نفس الحجة ويصرون ان الخطبة فقط تكون عن طريق الرجاجيل

طبعا انا رفضت لاني يهمني علم اهله وزوجته
لان الرجال اللي يتزوج بدون علم اهله وزوجته مشكوك في امره
يعني يمكن يكون حاط في باله زواج موقت ويطلق بعدها
وخصوصا انه عن طريق خطابة
او ما يبي زوجته تدري ويبي الزواج الثاني بالسر
لدرجة ان واحد منهم قال للخطابة قولي لها انشاء الله قبيلتها كلهم يدرون بس اهله وزوجته لا
قلت لها اسفه
الزواج اللي بدون علم الزوجة مصيره الطلاق لان الزوجة مصيرها تدري
واذا درت وطلبت الطلاق توقعون من يطلق
يطلق ام اعياله ولا الزوجة الثانية
وايضا الزواج بدون علم الزوجة معناها ان الرجال ما راح يبيت عند الزوجة الثانية خوفا من زوجته الاولى لا تدري
حتى انه يحرم الزوجة الثانية من الخروج معاه خوفا من احد يشوفه معاها ويوصل الخبر لزوجته الاولى وتطلب الطلاق وتحرمه من عياله وتاخذ النفقة والبيت

ما ادري يا جماعة الخير هل انا على صواب وهل طلبي في محله؟؟
وما تفسيركم لعدم رد الخطابات علي بعد هالطلب؟؟
تخيلوا الموضوع تكرر مع اربع خطابات؟