انت لا تقرب ولا تبتعد مني كثير = لا تروح ولا تجيني ابي طبعك وسط
ما أبيك بشكل عادي ولا شكل ٍ مثير = خل شكلك كل مرّه له انواع ونمط
حبني من كل قلبك بإخلاص وضمير = وطوّف الزلات مني ولا تبدي السخط
حطني مجرى النفس في الشهيق وفي الزفير = وحطني جمله وأكمل نقط نقط نقط
لا تغرّك كشختي ولبسي لبشت الوزير = والله اني شخص عادي وعايش في قحط
ألبس احسن لبس حتى ولو اني فقير = واتحلى بالصبر واستجير الله فقط
مايعيب اهل الفقر جلسة ٍ فوق الحصير = بس ربي لا كتب رزق للعبد انبسط
لا تطالع شيب راسي ترى ماني كبير = لا طردت الشيب مني على راسي قلط
كل سيف ٍ غير سيفك ترى ماهو شطير = وكل زين ٍ غير زينك ترى ماهو فرط
أنور بدنياي نور ٍ تمناه الضرير =واستمع دقات قلبي ترى قلبي فحط
واحضن احساسي مثل حضّنة الطفل الغرير = يرتبك من نظرة أمه ليا منه غلط
صدفة العمر اجمعتنا وسط فندق سفير = يوم ( عقـّـدك ) طاح وانهار منك وانفرط
يوم جيتك مثل حر ٍ على صيده إمغير = واتعذر واللقط العقد وبراسي خطط
خطة ٍ وحده وكانت كفيله ياصغير = وبيت واحد كان كافي من اشعار النبط
لا ني بقيس الملوح ولا حتى جرير = يكفي ان قلبك من ضلوعك السبع انخمط
استمرينا سنه والله اعلم بالمصير = واقبلت ثاني سنه والشعور ابك انربط
امشي بدربك من العام واتعبني المسير = وجيتك بقلب ٍ من الحب والشوق اختلط
ليه ماحبك ولاصير في دنياي زير ؟ = وليه ماشوفك ولا قول لك فكري ضبط ؟ ؟
للشاعر : حـمـد الـمـسـّـرع
04-08-2009, 07:40 PM
العرض العادي
