الموضوع بدون موضوع

[ليبرالي]

عمركم شفتوا واحد يكتب في اللاشيء هذا انا اليوم..ماعندي اي فكره اكتب فيها ولا شيء اناقشه بس فيني كتابة..اذا بكتب عن الدوام ماراح اجيب جديد فالكل يتذمر ومحد عاجبه دوامه الا انا وبيل غيتس ويمكن الوليد بن طلال..ولو بكتب عن الرياضة يمكن بقول ان ميسي احسن لاعب بالعالم بس ما راح اجيب جديد..يمكن لاجديد بالعالم..اوا انا اصبحت قديم حبتين.


اذا بكتب بالتاريخ وخصوصآ تاريخ القبيلة..هم ماراح اجيب جديد..لان الكذب خلص..لان كلنا اجدادنا فرسان ولاعمرهم انكسروا..وهم الاشيخ والافرس والاشعر..تصدقون البدو عندهم حلقه مفقودة من كثر الكذب عندهم محد فكر فيها..وهي ان كلن غزى وكسب وكلن رد ابله وكلن ذبح وصلخ..وهذا كلام عند كل القبايل..طيب ما فكروا منو الطرف الخسران ولا محد يعرفه؟.بصراحة انا ما اصدق من تاريخ البدو الا التاريخ المرتبط بعبدالعزيز بن عبدالرحمن ال سعود..فهذا هو التاريخ الصح وهو تأسيس دوله من اعظم الدول..اما سوالف البدو كلن ذبح الثاني كلها فلس في فلس ولا نتج عنها وصولنا للقمر او اختراع الطيارة.


ولو بكتب الشعر..شنو راح استفيد وهو كله حكي في حكي..واعذبه هو اكذبه يعني سيئات..وبعدين بصراحة اخجل من نفسي..لو صنفت من شعراء هاليومين..لان اللي اختشوا ماتوا..ولان الوراعين صاروا كلهم شعار..وينشرون بالجرايد والمصيبه ان شعرهم غزل.. وكله عن الفراق واللي يبكي على فرقى حبيبته في اول بيتين وفي الاخر يقول روحي ولا هميتيني..او الموضه الجديدة اللي طالعة عندنا شعر الفخر بالقبيلة..يجيك شاعر طوله شبرين وقرونه تهف على متونه مثل (جحدر)..وعمره ماجا العشرين وذابحته المراجل والونيت الاحمر والجيب الاصفر..يا أمة ضحكت من جهلها الأمم.



لو بكون رسام..ارسم الطبيعة او الاشخاص او اي شي ثاني..واشتهر عند القبيلة باني رسام وافتتح معرض برعاية شبكة العجمان..واعزم عليه شيوخ القبيلة..هنا راح تكون عندي مشكلتين الاولى منو شيخ القبيلة؟..لانهم متهاوشين محد يعترف بالثاني..والمشكلة الثانية والادهى والاكبر واللأمر..انني سوف اكون حديث الساعة عند دواوين القبيلة..خصوصآ ان الحش عندنا يندفع عليه فلوس..مثلا بيقول واحد من الشيبان انت شفت الخبل ولد فلان حاط له معرض يرسم..ويرد الثاني انه والله جبو من عاده صغير..وهات ياحش وهات يا قرض وراح تكون سهرة مميزة انا بطلها الغائب.


مشكلتي انني لااستطيع او لا اعرف ان اكون سلبي في اي مجتمع اعيشه..سواء بالبيت او الدوام او المنتدى او حتى الشارع..ولا ترى راحة البال زينه للي يعرفلها..لكن اللقافة اعيت من يداويها..فأنا احاول ان اكون مالي شغل بشي..لكنني اكرر الفشل في كل محاولة..حتى المنتدى تطري علي فكرة المقاطعة للابد.. لكنني اجد نفسي حاط المنتدى في اول المواضيع المفضلة بالرغم من انني لازلت عند فكرتي القديمة ..من ان المستوى لابد ان يكون ارقى من هيك.. فالتميز كل يوم تقل نسبته مع انها لم تتعدى واحد بالمية.


عدم الترتيب ميزتي الاعظم مثل موضوعي اليوم..لكنها نوع من انواع الصراحة..فانا احس ان الترتيب زيادة قد يدخل في موضوع النفاق وممكن يجر معاه شوية كذب..وفي النهاية عدم احترام.

احترامي للجميع.

[ريف الضعيف]

ماشاء الله عليك موضوع رهيب

صحيح انه بدون عنوان بس الصوره كانت واضحه


ما اجمل الصراحه وانت كنت بالفعل صريح



استمتعت بقراءة موضوعك اخي العزيز ليبرالي
فلك كل الشكر والتقدير ......



تقبل مروري وتحياتي

اخيك العود الازرق

[زميل ليبرالي]

ويرد الثاني انه والله جبو من عاده صغير
تدري اني
اتمنى واحد ثاني نفس روحك وقلمك في المنتدى عشان المقاطعة يكون بديلك

[ليبرالي]

العود الازرق اشكر مرورك وتعليقك الجميلين.

[ليبرالي]

الاخ تلميذ ليبرالي..اهلا بك والبركة فيك انت البديل.

[مرهف إحساس]

صباح الخير ليبرالي

كلماتك واقعية وتكفي النقاط التي تحدثت عنها بصراحتك الطيبة

احترامي لك

[وكيل آدم]

اما سوالف البدو كلن ذبح الثاني كلها فلس في فلس ولا نتج عنها وصولنا للقمر او اختراع الطيارة




يجيك شاعر طوله شبرين وقرونه تهف على متونه مثل (جحدر)..وعمره ماجا العشرين وذابحته المراجل والونيت الاحمر والجيب الاصفر..يا أمة ضحكت من جهلها الأمم.
يارة








القدير / ليبرالي


صراحتك وجدت صداها في قلوبنا .. وتكفى لايطري عليك تخلى المنتدى حنا في حاجة شخص مثلك صافي السريرة وصادق ..ويملك الحجج المفحمة




تحياتي واحتراماتي لهذا القلم الحر

[المحامي vip]

كل الشكر لك الكاتب المبدع الغالى على ليبرالى موضوع جميل

[كايف]

بصراحه أنا مثلك ما أصدق إلا تاريخ الملك عبدالعزيز خصوصاً يومه أصيب في المعركة وطلعت مصارينه ورجعها بيده وربط بطنه بشماغه وعاد لساحة المعركة وأنتصر !

[إبراهيم القشانين]

يعطيك العافية على الموضوع الجميل والصريح الحاكي للواقع المرير
( جبو عادة صغير ) لحالها
أنت بالفعل مبدع
تقبل مروري