((تعيش وتشوف))

[دااانة البحرين]

السلام عليكم ورحمة الله وبركاته





موضوعي ينطلق من المثل اللي يقول



((تعيش وتشوف))



واللي شفته شي يقهر و يبط الجبد



بقولكم السالفه وآبي رأيكم بهذا الموضوع وتؤيدوني أو لا


في الويك أند و المجمعات زحمه والمطاعم حدث ولا حرج


كنت طالعه مع العضوه العزيزه صغيره على الحب وبنت أختي العزيزه نور البحرين


تسوقنا وقلتنا نروح انتغدا بمكان بعيد عن الزحمه و الازعاج بالمجمع


أصرت صغيرونه على مطعم معين ومع أني ما أحبه لكن قلت مابردج يا بنت الجيران




دخلنا الطاولات كلها محجوزة و زحمة

عطيناهم رقمي عشان إذا فضى المطعم يكلمونا

4 دقايق إلا التليفون يرن ... المطعم يقولون حجزنا لكم طاوله 4 كراسي
واحنا 3
طبعا الكرسي الرابع للاجياس والشناط




المهم مو سالفتنا الكرسي الرابع نرجع للطاوله وهي محور حديثنا




طلبنا غدا وأثناء الانتظار


ألتفت يساري إلا عائلة داخله ... الأب وزوجته والعيال ومعاهم وحده و(الخدامة)

خلكم مركيز معاي بالخدامه
بوصف لكم الخدامه (فلبينيه جينز وقميص و كعب وشنطه طقم والشعر مفلووول)
وبصراحه موحلوه بس مو شينه



طبعا بسألكم وين تقعد الخدامة











طبعا بتردون و بتقولون لي






: عالطرف آخر الطاولة >>> هاذي وانتوا حاشمينها مو مخلينها تقعد بطاوله بروحها





طبعا المتعارف أن الخدامة تقعد آخــــــــر الطاولة مع اليهال
والأب والأم يقابلون بعض



لكن اللي صار

الأم قاعده بآخر الطاوله مع اليهال واللي معاهم

و الأب وقعدت الخدامه مجابلته





و الأم رايحه ضحك وسوالف وأنا قاعده ميته قهر




يعني في ناس عندهم حسن نية لهدرجه أوثق بخدامه ... نترك حسن النية وين الغييييييييييييييييييييييييييره

>>> تخيلي معاي أنتي آخر الطاوله و زوجك مجابل الخدامة




والله حسيت اني بقوم انصحها وأوعيها وافهمها >>> (وحده مندمجة)

بس قلت مالي شغل ..
شوي ما تتقبل مني وأتقولي خدامتي واثقة فيها أنتي مالج شغل


شلون ارجع الطاولة وأشوف ويه النذول اللي معاي بيخلوني شماته



>>> أما مندمجة رايحه مقومه الخدامة من مكانها
Sits there… madam sits here


>>> وأقول للأم أنتي يالمغفلة قومي قعدي مع زوجج



المهم وصلنا غدانا وانا عيني تراقب ريول والخدامه والأب >>> قاعده لهم قعده الخدامه ووراعي البيت


كملت من مراقبة الريول

ألتفت جدامي إلا طاوله خليجيين توهم واصلين
البنت منقبة محترمه ومعاها زوجها



شوي إلا المحترمة ماده يدها لزوجها شوي ومسكها
وحركات من الزوج والله أني استحي أني أقولها


إلا أقولهم كملنا من الخدامة وأراقب ريولها عشان ما أعطيها فرصه تلعب بذيلها طلعت لي هاذي


اخلص من مراقبة الريول تطلع لنا الايادي



نور وصغيرونه ما يشوفون اللي أشوفه

يقولون لي شفيج ؟؟؟

جان وصفت لهم المنظر

قلت لهم لا تلفتون منظر يــجــرح مـشـاعـركــم و خادش للحياء






جان تلتفت صغيرونه و تبقــق عينها وكل علامات الاستياء بدت على ويهه




أنا شفت ويه صغيره على الحب قعدت اضـــحـــك




نترك ردود الفعل ونرجع للمحترمين

حسيت بقوم بقعد وسط طاولتهم




وأقولهم
عــــــيـــــب عليكم هالحركات ... هالحركات تصير بالبيت أو مكان للـعــائــلات فــقــط >>> بالنبرة الحازمة

مو هني وسط الشباب والبنات استعراض عيني عينيك




وهالموقف متكرر على أكثر من مره

أبي اعرف الخليجيات المنقبات إذا يزورون البحرين ويشوفون بنات بنفس المكان هالحركات لييييييييش

غـــيـــره و الا قـــلــة أدب وإلا استــعــراض وإلا ما يحصل لهم بديرتهم (اخ لو يصيدونهم الأمر بالمعروف)


وإلا شلون أفسر هالمسخره ؟


بصراحة ظاهره جدا منتشرة بالمجمعات والأماكن العامة

وما أقول إلا عيب عليكم









والحمدلله تغدينا وحلينا و قمنا قبل لا احد يحذفنا بصحن




واترك لكم التعليق على الموقفين الأم مع الخادمة والمنقبة المحترمة


>>> سوري حاطه رموز وايد بس احب التمثيل وأنا اتكلم

[AgMi.cOm]

دانه

بالنسبه للخدامه ..لايكون زوجته الثانيه اللي تحسبينها خدامه ...

بالنسبه للمنقبه بقوللك السبب :

لوكان عندهم مكان ثاني يسوون فيه حركاتهم كان راحوله

غلط مطبعي :

منقبه محترمه.. وازواج

اللي اختشوا ماتوا

تحياتي

[سهوم بقعهـ]

ــههههههههههههههــ يقطعّ سوالفشّ من بنيه

علآمشّ يآختيّ قاعدة لهم بالمرصاد . < من راقب الناس مات هماًً


والفلبينيه عـ/لى قولة الاخ ^ يمكن زوجته نمبر2 ..

أما طيور الكناريّ خلشّ منهمّ الظاهر توهم متزوجين بكرآ تلقينهم يتراقعون .. تكفخ وحاله


لو انيّ منشّ يا دن دن كان خذيت الطلب [ تيك أويّ] .. وفكيت عمريّ من الأرف وعماة العين .. اجل مقابل خدامتهم .. مااقول الا استغفرالله العلي العظيم


موضوع حلو ويلآمسّ الواقع الذي نعيشه ونتمخطربه // والأهم من كل هذآ وذاك انشّ حليتيّ

يآ جعله من مدآخيـــــــــــل العافيه يآ رب ..

تحيـــــــــــآتيّ

[ريــــــانـه العــــود]

دندووووونه




موضوعك روووووعه

واذا على الخدامه مااقول الا اللهم لا شماته والشرهه مو على الرجال على مرته اللي مخليه الوضع سايب بس يمكن جايبتها عن حس نيه

وبالنسبه للمتزوجين وربي عندنا وعندكم خير واذا صادتهم هيئه الامر بالمعروف والنهي عن المنكر وش بيقولون لهم متزوجين هذا عندنا بالسعوديه

بس والله عيب قدام العالم يسون كذا الله يهديهم

بس معلومه بسيطه مو كل الخليجيات المنقبات اللي يجون للبحرين سواء متزوجات او مو متزوجات يسون حركات قله ادب زي ماتفضلتي والا بديرتهم يسون واردى
وطبعا مو الكل الا ماندر
بس يمكن في البحرين لهم مجال اكثر للتفتح وعلى قولتك مافيه هيئه الامر بالمعروف

اسفه على الاطاله والله يعطيك العافيييييييييه

[Golden]

ياشيخه من راقب الناس مات هم

الا على الطاري كليتي الوجبه ولا ما امداش تاكلينها << مشغوله في المراقبه

نقول وبالله التوفيق << الشيخ قولدن من هيئة الامر بالمعروف والنهي عن المنكر

بالنسبه للحاله الاولى نقول ان الخادمة افرطت في الزين والتكشخ مما ادى الى انها تاخذ مكان الزوجه ..والله العالم او يمكن يكون بين الازواج خلاف (البيوت اسرار) وحبت تعطي زوجها درس في التطنيش وقالت روحي اقعدي قدام باباه والزوجه تناظر زوجها وترفع حواجبها وتقول خلها تنفعك ..

اما بالنسبه للحاله الثانيه فهذي قلت ادب

[عزوف]

واللـــــــه يا الدنه

عشنا وشفنا ويا ما حنشـــــــــوف على قولتهم !

اما سالفة الخدامه بصراحه معزبتها صخله

طيب بتقعدين مع عيالج والخدامه مع المعزب مو مشكله !!!!!

ليــــــــش كاشخه بالله ؟ << الخدامه طبعا

يعني اشكــــــــرا تقول انا هبله وعبيطه << طبعا المعزبه

اعوذ بالله من سوء الظـــــــن يمكن على قولة الغاليه سهوم بقعه

يمكن زوجته نمبــــــــر 2


تراني للحين ما سكه نفسي وما انهديت << هالمواقف تنرفــــــــز وانا ماكو كنترول بالمره

اما بخصوص كناري الحب

يمكنها مو مصدقـــــــه مسكينه !

بجد يغثون لا وابشــــــرج بعضهم بالسوق اتجلّب بالرجال جنه بينحاش

صج عاهات ...

الله لا يبلانا


بــــــس تدرين

عفيه عليج مسكتي نفسج (( وين الحديد وفريد )) انا وحده من الثنتين يا أخربها يا اطلع من المكان وأقعد متكدره يومين ! << شكــــــــو ! صج خبله !


مــــــن رحمة ربي فيني اني أحـــــب الهدوء وما أحب الزحمه ولا أروح المجمعات بالويك أند الا الضحى والمطاعم انقي الهادي منها والكباين أفضل والا جان طاق فيني عرج وميته من زمان


ترانى كثرت من الرسوم التعبيريه علشان تستانسين

[صديق الملك]

برج المراقبة

أقصد

دااانة البحرين


انا ودّي اعرف شي واحد

وش كانت نتيجة مراقبة الريول ؟ هل حصل تماس بينهما

آمل الإفادة


لــي عودة لكن مو ألحين


تقبلي تحيتي

أخيكِ .

[بنت إبيها واخت إخيها]

اختي دانة البحرين تسلمين على هالموضوع اللي بكل مكان نشوفه
اما بسالفة الخدامة صج شي يحر وين المعزبه عديمة احساس وغيرة .
انا اقول دع المخلوق للخالق .

اما بسالفة الزوجة المنقبة بصراحة زوجها ويحق لها وكثير نشوف هالشغلات وليش نظلمهم يمكن في تفاهم وود وحب بينهم الله لا يغير على الجميع
واقول ( من راقب الناس مات هماً ) هع لا تزعلين اختي دانه البحرين

تحياتي لش ،،،

[متعب الغفيلي]

اختي العزيزة/انتي رايحة تتغدين والا تشوفين الناس تراقبين<<<كل يرجع لاصله *خليجية*
شكلك من النوع اللي يفصفص الشخص اللي امامه من شعر راسه لين اصابع رجوله تكرمين وصلتي لرجولهم انتي اكيد من النوع اللي تمشي ومطيره عيونها
الخدامة اترك المجال لكم يالبنات<<ذي سوالفكم
المتزوجه وماسكه يد زوجها يمكنها بحرينيه يعني مايسون الحركات الى الخلجيات اللي يزورون البحرين خخخخ ابي توضيح لجملتك اذا سمحتي
و لنفرض خليجيه لا ازيد على كلام اختي بنت ابيها واخت اخيها زوجها وحلالها ما فيها اي شي من قلة الادب الحياء بدال ما تنصحين المره وتفهمينها انصحي روحك لارحتي مطعم كولي وناظري اكلك بدال ماتراقبين الناس
من راقب الناس مات هماً اختي لا تزعلين بس هذي الحقيقةوالمفروض الامر بالعورف يقولونك غظي البصر هع

[دااانة البحرين]

المشاركة الأصلية كتبت بواسطة mangooody

اختي العزيزة/انتي رايحة تتغدين والا تشوفين الناس تراقبين<<<كل يرجع لاصله *خليجية*
شكلك من النوع اللي يفصفص الشخص اللي امامه من شعر راسه لين اصابع رجوله تكرمين وصلتي لرجولهم انتي اكيد من النوع اللي تمشي ومطيره عيونها
الخدامة اترك المجال لكم يالبنات<<ذي سوالفكم
المتزوجه وماسكه يد زوجها يمكنها بحرينيه يعني مايسون الحركات الى الخلجيات اللي يزورون البحرين خخخخ ابي توضيح لجملتك اذا سمحتي
و لنفرض خليجيه لا ازيد على كلام اختي بنت ابيها واخت اخيها زوجها وحلالها ما فيها اي شي من قلة الادب الحياء بدال ما تنصحين المره وتفهمينها انصحي روحك لارحتي مطعم كولي وناظري اكلك بدال ماتراقبين الناس
من راقب الناس مات هماً اختي لا تزعلين بس هذي الحقيقةوالمفروض الامر بالعورف يقولونك غظي البصر هع

ماشالله اخوي شاد حيلك بالرد

اولا : عاد امشي عيني طايره والا بالأرض شي راجعي مو ملزومه اوضح لك

ثانيا : مت هم والا حيت ... عمري وحياتي واسوي الللي ابييييييييييه محد له شغل فيني

ثالثا : البنت مابي قول من اي جنسيه ومن اي ديره لان مابي أعمم على كل الديره

رابعا : اتفضل مشكووور لو ماترد على مواضيعي يكون أبرك لي ولك


وشكرا