قصيدة الشاعر محمد بن مبخوت ال حسناء السليماني العجمي في نااااااس تحبونهم يا العجمان

[ذلول حزام]

راكب اللي راعي الشوحات تله= لا انحدر مع سهله ثور غباره

غايه المطلوب شكله مع مضله=يسبق الصاروخ في سرعه مغاره

سايقه قطع الفيافي مسهم له =واللتقن فيه النعاره والجساره

صوب ابن شافي تري كل يدله =وعلمه الطيب تناوشني اخباره

ناصر بن حمود شيخ في محله =وشافي جده وكفوا للاماره

يوم اخو شفيه يصبح كل حله =ان هجد بالليل والا في نهاره

من مخاضيب تروي كل سله =يوم كلا في اللقاء يسند امهاره

اشهد انه جازلي فعله ودله = صيرمي مجذوبه من راس قاره

والخوي والجار ديم مايمله = ومن عطاء يمناه ما خاف الخساره

والعشا يا اللي تبيه وموجب له=من اجلال الضان والابل من فقاره

منفد المال من دقه وجله = والكرم راعيه ما يبغي تجاره

مجلسه يعجبك بدلاله وزله =وصنعت الرسلان زادو به بهاره

اطلقو سلمان يوم الرب دله = وابن صالح قبلهم ضاعت افكاره

ورايه البيضاء عليه وكسوة له =وانشروها له علي ضلع ومناره

لارباء الوسمي وجا رجع وعله =واستوى الزملوق في زمه خضاره

لا بني فيه المخومس عادة له =من تبين من بعيد شاف ناره

دايم يفرح بمن جا ناصي له =من بعيد الدار والا حول داره

اكتبو له وانشرو له في المجله =من كسب راس العوالي فنه وكاره

ابن شافي مقدم القوم المهله =هم بني هاجر حزامه وافتخاره

فايزين بالفخر والطيب كله =كاسبينه بالشجاعه والجباره

والصلاه اعداد مشاف الاهله = لرسول اللي طريق الحق ساره

هذه القصيده قالها الشاعر يمدح فيها صاحب المكارم والمحب للخير


الامير ناصر بن حمود بن شافي ال شافي امير قبيله بني هاجر







وسلامتكم


الشاعر / محمد بن مبخوت ال الحسناء السليماني العجمي

[البشر]

الله لا يهينك ياذلول الحزام علي ذالكتابه

وصح لسانك ولسانه

تحياتي

[ولد ال صالح]

صح لسانك ولسان الشاعر الجزل

لاهنت لاهنت

ويستاهل بن شافي من روس محلفنا

ونعم بالجميع

تقبل

سلاااااااامي

[فيصل بن حجرف]

السلام عليكم

لاهنت اخوي على النقل المميز

وصح لسان ابن حسناء

وعزالله صدقت ان حنا نحبهم ونحب كل طيب

ويستاهل المدح ابن شافي

تحياتي لك اخي العزيز

[عيد بن شدقان]

ذلول حزام
لا هنت وصح السانك
والسان الشاعر محمد بن مبخوت

والنعم بالاجواد
يستاهلون

[العماني]

لا هنت يا ذلول حزام على القصيدة الطيبة.

وصح لسانك وصح لسان الشاعر.

وبني هاجر والشيخ ناصر بن حمود يستاهلون المدح.

تقبل تحياتي،،

[نـاصـر]

لاهنت ياذلول حزام علي ذلقصيده الجزله

ونعم والله في ال حسنا وبني هاجر

تقبل تحياتي

اخوك / بن هادي

[غنواوى]

الله لا يهينك

وصح لسانك ولسان شاعرها

وننتظر المزيد

[خميس سحمي]

لا هنت اخوي اخوي ذلول حزام

ولاكن محمد مبخوت ولدعمي ولااذكر انه شاعر

او قصدك واحد ثاني ترى هو ساكن بالنعيريه ودايم عندنا بالرقه

هل تقصد هالشخص
ارجو الافاده ومشكور عالمجهود الطيب