السلام عليكم ورحمة الله وبركاته
محاورة بين عبدالله بن منصّر وبدر الجذع العتيبي
أنقلها لكم وعسى أن أتحوز على أستحسانكم
* * *
عبدالله بن منصّر :
سلام رديه على منقع السيل = الصايمه والحايمه قد رواها
الكيل لامنه حضر يوفي الكيل = شغموم ربعه لاحداها بلاها
* * *
بدر الجذع :
يامرحبا ياراعي البن والهيل = ترحيبة(ن) تضفي على من قراها
لأجلك يابومنصّر نعيد المراسيل = أرسل ومال العله ألا دواها
* * *
عبدالله بن منصّر :
دام البقا يامحلل القول تحليل = ياشاعرن ذود الشعر قد قناها
الذيب لامنه عوى تالي الليل = وش حيلته من عويته لاعواها
* * *
بدر الجذع :
الذيب ياعبدالله يقنب من الويل = من جمرة(ن) بأقصى الضماير لضاها
روّح وفارق من يود التعاليل = أبو جديل(ن) لاسرى الليل جاها
* * *
عبدالله بن منصّر :
أنا جمل ماعاد يقوى على الشيل = دنيا عطتني ياعميلي قفاها
أن جيت أبذكر مهرتي وأنكر الخيل = الله من النكبات يامن نباها
* * *
بدر الجذع :
أرقا سنود العزم موجود والحيل = والأرض ماشحت علينا بماها
مدام لك رفقة قروم ومشاكيل = أبشر بزهر الدار واللي حماها
* * *
عبدالله بن منصّر :
مهره خطاها ماتعثّر من الميل = مضمارها يشهد على مستواها
شريتها في محكم القول والقيل = يوم الشكاوي عند ربي قضاها
* * *
بدر الجذع :
كلن على ليلاه جر المواويل = والعالم كيف ينسى هواها
عندك خبر ولكل علم(ن) مداخيل = مير الحراسه كيف ندخل علاها
* * *
عبدالله بن منصّر :
أشوفها تسبح معي غبة النيل = لو لدت عيوني لقتها وراها
مهره شرفها في عصر صاحب الفيل = لا وحسافه يازمان (ن) خذاها
* * *
بدر الجذع :
ياغايص(ن) غب النهر ورّد الحيل = يمكن على الله ترتوي من ضماها
يوم أننا باالطيب سقنا الفناجيل = وغصنا بحور الشعر وحمنا وسماها
* * *
عبدالله بن منصّر :
ماقصدنا مدح الشعر والتماثيل = حورية(ن) أو مهرة(ن) أوحداها
ياصاحبي بدر الدجا والقناديل = ليت الولي يرزق جنابك سواها
* * *
بدر الجذع :
أبنشدك ياصاحبي وأنت حلحيل = تحلحل العقده وتصلب مداها
لاشفت من دنياك عد البهاذيل = هات العلوم اللي بصدرك نباها
* * *
عبدالله بن منصّر :
العلم يمسي في قلوب الرياجيل = والدين والسنة مضى مقتضاها
ياكيف أبشكي والليالي مقابيل = أ شرف عباد الله قبل ماشكاها
* * *
بدر الجذع :
اختامها مسك(ن) وعود ومخاييل = تبرق وترعد في ديار أقصراها
لاهنت ياطب القلوب المعاليل = الطرق وافي والمعاني وفاها
* * *
والمعذره هذا ماحصلت عليه وعسى أن تحوز على رضاكم 0
03-08-2008, 09:27 AM
العرض المتطور
