يا مدوِّر الهيِّن ترى الكايد أحلى

جطلي بن فهد · #1 14-08-2007, 12:03 AM

يا مدوِّر الهيِّن ترى الكايد أحلى
واسأل مغنـِّي كايدات الطروقِي

الزين غالي .. لكن الأزين أغلى
ولـ كل شَرَّايٍ بضاعة وسوقِي

النو عالي والسما فوقه أعلى
ولا فاقٍ علمٍ جاه علمٍ يفوقِي

والصعب هلاَّ .. قلت: يا صعب سهلا
دامك تبيني فـ انت يا -صعب- شوقي

أحب عسف المهرة اللي تغلَّى
وأحب أروِّض كل طَرْفٍ يموقِي

وأحب أسافر مع سحابٍ تعلَّى
وأحب فوق الغيم لمع البروقِي

وأحب أساهر بدري اللي تجلَّى
وأرسم شعاع الشمس عند الشروقِي

يا من على ثاير فؤادي تولَّى
خلك على قلب الكرامة شفوقِي

أكرِم عزيزٍ بـ العمر ما استذلاَّ
يسوق عمره للمشاريف ســوقِي

اخترتك من الناس للقلب خلاَّ
يا حيثك مرادي وكيفي وذوقي

ما رحت أدوِّر كل زولٍ تحلَّى
لولاك تسوى ما عطيتك خفوقي

قصيده جميله لشاعر جزل في معانيه وهو خالدالفيصل وان كان مانيب واهم ان محمدعبده غناها

واتمنى انها تعجبكم