يسر شبكة قبيلة العجمان ان تحاورالوالد والراوي شافي بن فالح بن حرقان ال سفران اطال الله في عمره المعروف في رواياته للقبيلة والاحداث التي مرت بها وواكب بعضها وقدم عطاء وافراً من جهده ووقته رغم كل الصعوبات التي واجهته في وقت مضى ليس ببسيط من امور الحياة والكل يدرك اهمية نهجه وقيمة روايته في القصه والشعر والمثل والحكم طرق فيها ابواباً كثيرة لا تحصى ،الدعوات الصادقة ان يبقى معافاً حتى تستفيد منه كل الاجيال القادمه .
و الشيخ محمد بن فهد بن منيخر حفيد الشيخ منصوربن شافي بن منيخر رحمة الله الذي قاد الجموع في اغلب فتوحات الملك عبدالعزيز هو ومن معه من باقي العجمان فتسيدو القبائل الاخرى بأفعالهم وارائهم حتى طُرحت فيهم الثقه التي لا يوازيها فيهم احد .
بأسم ادارة شبكة قبيلة العجمان نرحب بضيفينا العزيزين ونترككم مع اللقاء :
العم / شافي بن فالح بن حرقان
الشيخ / محمد بن فهد بن منصور آل منيخر
س : لماذا نزلوا العجمان من نجران ومن كان شيخهم وقتها؟
العجمان كانوا في شمال نجران يعني في بادية نجران لهم عدود ولهم موارد ولكن نجران وذيك الديار ما يجيها الوسم ، وكان باديتهم يشملون للحياء وللربيع ويرجعون لديارهم ومنهم من يقيض ومنهم من يرجع ومن ضمن الناس البدو فيهم زعماء وشجعان وفيهم أمراء أما العجمان فأميرهم فلاح بن مانع بن حثلين.
واما البادية التي يشملون ويروحون فيهم زعماء ومنهم جريس بن جلبان اللي هو شيخ آل حبيش ومنهم عامر بن جفن ومنهم ناس شجعان وفرسان اللي هو رويشد المعيضي اخ هصمان ال سفران ومنهم هادي المسيحير وناس كثر زعماء يشملون.
عامر بن جفن صديق لابن عريعر كل ربيع ينزل حوله وبينهم صداقه في عام 1237هـ جاه عامر وجماعته اللى معه ومعه من العجمان منهم فريق من آل هتلان نزلوا على عادتهم .
ابلهم عادها متأخرة , بن عريعر كان في إحدى الروضتين ( روضة خريم أو روضة التنهاة ) في وحده منهم نزل بن جفن على عادته جنوب بن عريعر قريب منه وعندما أطلقوا حلالهم وركابهم ، ابلهم متأخرة وعندما أطلقوها ذاك اليوم من نزولهم غار خيل من بن عريعر على ركاب آل هتلان وأخذتهم .
جو آل هتلان إلى عامر وقالوا ركابنا أخذت , ركب هو وياهم أول يوم من نزولهم وبن عريعر عنده مناسبة مدري هو عيد أو عرضة وعنده جموع وعرضات وناس واجد ، جاه بن جفن وقال
يا امير حنا جماعتنا أخذّت ركابهم وحنا جايين وبينا الصداقة اللي بينا وبينك والرفقة اللي بينا وبينك قال لا تعال يا فلان وفلان (ناس من أخوياه) قال اذهبو مع عامر وجماعته ردو عليهم ركابهم في هذا الكلام الجموع والناس وسلاحهم على طريق عامر وجماعته اللي أخذت ركابهم وبينما هم يمشون بين الصفوف وبين الناس ثار بندق وذبحت عامر , شلوه ربعه وراحوا به الى منازلهم لين الرجال ميت ركبوا عاد كبار الجماعة اللي بقوا قالو
يا بن عريعر رفيقنا ذبّح ذبحوه جنودك وركابنا أخذّت واليوم حنا جايين في وجهك ونبي اللي ذبح عامر و ماجابه قال الرجال العهد اللي بينا على عامر وعامر ذبّح , ما شافوا منه تجاوب رجعوا ودفنو رفيقهم وهقو بأنهم بينوخذون يوم اظلم الليل سرو , ابلهم عادها متأخره ما جات، سرو ونطحو ابلهم ورجعو مثل ما جاو يوم رجعو إلى ديارهم لينهم مهيب على عادتهم , آلفو على فلاح اللي هو شيخ العجمان وقال وش علومكم قالو علومنا ما هيب زينه ركابنا أخذت ورفيقنا ذبّح وحنا هقينا بالأخذ والله سلمنا قال فلاح والله أن كأني ولد مانع لثور لأخي عامر لكن الوقت مهو مناسب.
قيضو ذاك القيض وبعد ما ظهر سهيل وبرد الوقت مشو العجمان ما بقى منهم احد وجوك يزحفون ومرو الدواسر شيخهم بن قويد وقالوا له وش غايتهم وقال معكم لكن لي شرط يقوله انت يا بن قويد ( الريشة ) الريشة هي مثل العلم شي يحط على البعير ويزين( قالي واحد من آل قويد أن عادها موجودة عندهم ) وارسلوا مراسيل للدويش وقال الدويش انا ابغي الكروش والودائع قالو هي لك الاثنين ذولا شرطوا اللي هم الدواسر والدويش وارسلوا للسهول ولا شرطوا السهول .
جاو وزحفوا عليه فوجدوه في جو سمي بجو مناخ اللي هو الرضيمه تناوخوا هم وياه ثلاثة اشهر حسب القصيدة ونصرهم الله عليه سبحانه,
وانكسر بن عريعر وكان معه ناس من أهل الشمال ومنهم بن هذال يقاله بن مغليث وانفضوا وكلاً راح لدياره وهو راح حدر لديرته مهزوم .
في ذلك الوقت الأمام تركي بن عبدالله آل سعود رحمه الله كان في الرياض وكان بينه وبينهم عهد وصداقة آلفو عليه فلاح بن مانع وكبار العجمان واكرمهم وقال وش علومك يا فلاح قال علومنا جينا نأخذ الثار لرفيقنا والحمدلله رب العالمين صارت الأمور على ما نحب وبنرجع لديارنا قالهم الامام تركي لا ترجعون دياركم ما فيها خير ولا فيها حيا قال فلاح يا طويل العمر حنا ناس ما نعرف الطوال وديارنا اللي جينا منها ماهي قريبة قال الامام تركي انا بذكر لكم وان شاء الله بطيعون شوري
قال فلاح ان شاء الله نطيع شورك قال الامام تركي الطف ( وادي العجمان اليوم ) قال الطف هذا الماء على وجه الأرض لا تحفرون اشربو وانزلو .. فذهبوا ونزلوا من ذاك اليوم إلى اليوم والحمدلله وهذا اللي صار في وقعة الرضيمة.
س : الشيخ سالم العبد متى شاخ هل كان على وقت جريس بن جلبان وعامر بن جفن والا قبلهم ؟
لا هو قبلهم وحثلين قبلهم ومانع قبلهم واللي عرفنا من وقعاتهم الا وقعات فلاح وإخوانه اللي هو حزام وفاران هم اللي ذكرت وقعاتهم وعرفناها أما الأولين أكيد شيوخ ولهم وقعات بس ماعرفنا امورهم ووقعاتهم لأجل انهم بعيد .
س : ماهي قصة جريس بن جلبان مع بن عريعر وسبب سجنه؟
جريس بن جلبان صديق لابن عريعر ولا يعرف سبب سجنه ولا أحد ذكر السبب ، وبن عريعر ظالم وسجنه وابطى وهو في السجن وقال قصيد ولكن محد استجاب له وقال في زوجة بن عريعر اللي يسمونها العوبا وهو ليس بإسمها الصحيح بس يقالها العوبا
قال فيها قصيد وارسل لها بأسر وبعد أيام قليلة استجابة المرأة لجريس لان فيها شهامة ولان جريس معروف بشجاعته وكرمه ، جاء بن عريعر زوجته بعد كم ليل ولا جاته على الفراش قال يا فلانه بإسمها الصحيح قالت ماني جايتك على الفراش آلا بعد ما تلبيلي طلبي قال طلبك لو تبغين الأحساء كله آلا جريس بن جلبان قالت انا قصدي طلب دنيا ودامك قلت جريس أنا وش عرفني بجريس بن جلبان عجمي ولكن طلبي هو جريس قال تعالي للفراش والله عطاك جريس بن جلبان وبعد ما جلس مع الصبح أمر الاخوياء ان يطلقو جريس وقال لهم اخذو له كسوة وجاه جريس واكرمه وقال اطلب يا جريس قال وش اطلب ، وقيل وهذا الأمر وكاد وفيه ناس بالغوا فيه طلب عشرة محاميل واحداً قال
خمس محاميل وهن الإبل، خمس مزاريج اللي هي الرماح خمس محاميل الرماح وخمس محاميل من الجوخ وخمس محاميل من الهيل
والقهوة وخمس محاميل من التتن اللي هو الدخان الموجود ولبّوا له طلبه وأمر بن عريعر أخوياه وراحوا للسوق وشروا عدد من الإبل وحملوها ولا خذوا آل حبيش آلا جريس جايهم مع الهدايا وانتهت مشكلته اما قولة وش السبب ما ذكر لنا أحد وش السبب في سجنه آلا أن الحاكم لا صار فيه ظلم لا بد ان يسجن سواء كان صحيح او على غلط وقيل انه قال فيه قصيدة ولا تحضرني.
س : خبرنا عن قصة معركة ريع السلامه ؟
آل سفران نازلين في الربيع وصبحهم بن رشيد وذبح رويشد بن مشلح عقب سوو فيهم ال سفران سواه وذبحوا ناس واجد وخذوا خيلهم ويقول كمعان انه ذبح منهم سبعة ولكن الحاكم قوي قال لآل سفران ردوا الخيل وردوها عليه.
ريع السلامة سموه بالاسم لان آل سفران ظهروا ابلهم مع الريع وسموه ريع السلامة .
س : اول هجرالعجمان ما هي ؟
اول هجرة للعجمان هي حنيذ واول من جاء فيها الاخوان نايف العويض وحجرف بن هصمان وعبيد بن برغش واعطت لنايف العويض ثم جوهم ربعهم من بعدهم .
ودور الليل نزل بن حثلين الصرار ثم نزلو العجمان الوادي .
س : سلوم العجمان اللى وضعها الشيخ منصور بن منيخر وش هي وهل قبله فيه سلوم ؟
نعم فيه سلوم قبل الشيخ منصور بن منيخر بس ماهي بقوية هو حط سلوم صارمة خلى الناس يهابون العجمان ، اذا ذبحوا العجمان واحد يعني ذبحوه في سرق ماعاد يزبنه العجمي واذا صار من الاجناب او القوم شي خطأ على العجمان ماعاد يزبن , هذا اللى حطه منصور بن منيخر والا فيه سلوم لاجل مهيب قوية , يقولون وضع القطاع والشراع وجاب السير ، كل العجمان وامراء العجمان قطعوا السير على انه محد يخالف في ذالامر واللي يخون فيهم واللي ياخذ منهم حلال ماهو على الوجه المشروع ويسرق هذا ما يزبنونه العجمان ابد وهذا اللى حطه الشيخ منصور بن منيخر القطاع والشراع .
ومنها :
كانوا آل مفلح اللي هم الشواوله وال شحيمان كانو ما يعطونهم العجمان الا سبع يمشون سبع ركايب وقال منصور بن منيخر هذولا رجال طيبين منهم عبدالله بن مفلح وبن بنا وبن دبلان ، هذولا خلاص أخوانا والسلم اللي يمشي علينا يمشي عليهم ومن ذاك اليوم الى ذا اليوم والسلم ماشي بس قبل منصور بن منيخر سلوم وكلاً عنده سلوم ولكن ما سوى هذه الامور الصارمة الا منصور بن منيخر
مثل واحد من الناس سرق منع قال عليك امان الله يا عجمي وجاه خذا سلاحه وذبحه خلاص معاد يمنه جميع عجمي وهذا اللي خوف الناس وخلاهم يهابون العجمان وهذه من امور الشيخ منصور بن منيخر .
والشوواله ماهم اجناب هم بني عم في مذكر بس اول ما جاو ما عطو مثل ما يعطون العجمان بعد ما شافهم الشيخ منصور بن منيخر وشاف رجالهم عبدالله بن مفلح وبن بنا وبن دبلان قال هذولا بني عمنا وأخوانا يمشي عليهم مثل ما يمشي علينا وهذه من سلومه اللي مشاها وبعدين شد في سلومه وكلهم اتفقوا عليها امراء العجمان حتى انهم جابوا السير وكل امير من العجمان خذاله سكين وقطع .
س : هل رويشد المعيضي هو نفسه راشد المطرباني ؟
رويشد المعيضي هو اخ هصمان فارس وشجاع وراشد المطرباني هو بن ذنبوح وهو بعد فارس وشجاع ولاهم بسيطين لهم مواقف وأمور .
س : كل قبيلة لها شعراء في الحرب منهم شعراء العجمان في الحروب؟
ال سفران لهم شعار كثير منهم سلوم وبراك وعبدالله المطوع ال جفن وحتى منصور بن منيخر شاعر اما العجمان فيهم شعار كثير ولكن اللي متفقين على انه شاعر العجمان هو عبلان آل مصرا وهو معروف وله شعر كثير منه في وقعة الرياحيه وهو شاعر العجمان وكذلك الشيخ راكان معروف بشعره وهو من اكبر شعار العجمان والقبائل الأخرى بس بن عبلان يتميز في الحروب والوقعات وراكان ما يحب ان يحمس الناس .
س : سلوم وبراك منهم منه من ال سفران ؟
سلوم هو من ال نديل ومن مارثته فهد بن صقيه
وبراك من ال جفن وأخيه عبدالله المطوع يسمونه المطوع .
س : منهو راعي النحيا وماهي قصة تسميته براعي النحيا لان هناك أكثر من روايه على هذا الأسم؟
هو راشد بن ذنبوح آل سفران وسموه راعي النحيا لان فيه وقعة بين العجمان وناس من البادية ويسمونه راشد المطرباني وهو رجل خيال وطيب شاف خيل وراء خيل وراء خيل قال يالربع اذا انحيت الخيل هذه على الخيل هذه على الخيل هذه ركوز خيل تعلمون الفنيدة مزيونه قالوا العجمان أيبله بنعلمها قالوا آل سفران ماحنا معلمينها ما يبونه يخاطر بنفسه ، وركب الرجال وأنحى هذه وأنحى هذه وأنحى هذه وسموه راعي ألنحيا يوم انه أنحى الخيل .
س : خبرنا عن منصور بن شافي وغزوة السلماني ومن اللي معه ؟
غزوة السلماني حضرها كثير من آل سفران ولا يحضرني من آل سفران الا جوينان وكاد انه معهم وهو رجال وفارس رماي بندقه ما تطيح في القاع لازم في رجال والا فرس والا في ذلول واذا غزو لازم معهم يحبونه من أفعاله.
وسبب الغزوة كانت على ناس من البادية ومثل مانتم عارفين الأسباب القديمة في وقتهم وأهدافهم في بعض الغزوات كسروا القوم واخذوا الابل .
س : منهم الرجال المقربين من ال سفران للملك عبدالعزيز ؟
كثير من ال سفران مقربين عند الملك عبدالعزيز الا القليل مثل ، ابو كروز ناصر بن سرحان وعجمي بن خميس بن منيخر وبطيحان بن محمد بن منيخر ووردة بن سرحان وفيصل بن الهيلم بن سرحان وفدعوس بن عبار وسالم العبيد ونايف العويض وعبيد بن برغش ومانع العويض ومحسن بن شافي بن جفن هذولا من اقدم اللى جاو معه .
س : نريد موقف لآل سفران مع الملك عبد العزيز ؟
فيه موقف من الملك عبدالعزيز عندما قال لحجرف بن هصمان آل سفران ونعم به وبالقبيلة اللي هو منها ثم قال احد الحضور في مجلسه الملك عبدالعزيز ونعم فيه دنيا والا دين .
الأمير سعود الكبير جاء للملك عبدالعزيز ومعه حجرف بن هصمان وبن عميان وبن شويشان قال الملك عبدالعزيز منهم خوياك اللي معك وسبيع الحاضرين عنده سعود ما عاد درى وش يقول بسبب اللي حصل بينه وبين الملك عبدالعزيز وال سفران معه قال سعود هذا بن شويشان بدا بالسبيعي ثم اشر الملك عبدالعزيز بيده على سبيع الموجودين عنده قال الملك عبدالعزيز والثاني قال سعود هذا بن عميان قال الملك عبدالعزيز ونعم بأبوه وأنا والله ما عرفه ثم قال الملك عبدالعزيز والثالث قال هذا حجرف بن هصمان قال الملك عبدالعزيز حجرف هنا والا حجرف بن هصمان ال سفران قال سعود الا آل سفران قال الملك عبدالعزيز والله ونعم به وبالقبيلة اللى هو منها والله اني احبهم ، قال واحد من الحاضرين وبعيد من الملك( ونعم دنيا وآلا دين ) والا هي في اذن الملك عبدالعزيز وسمعها قال الملك عبدالعزيز منهو اللي يقول دنيا والا دين وكلن انتفق قلبه ثم قال الملك عبدالعزيز والله معادني رادها بخاطرك اما الدين يوم حنا معهم لاجاء الظهر في رمضان تسابقوا للمسجد وقاموا يرشونه ويفرشون عبياتهم لأبوي وأما الدنيا اقطعوا أذنك اليمنى وفكيت أذنك اليسرى لاعاد يقطعونها.
س : ما هي مرابط خيل آل سفران ؟
خيل آل سفران بنات دهمان جابها محمد بن منصور من بن خليفة راح محمد للبحرين وقال لابن خليفة أنا ابغي حصان وقاله بن خليفة عندنا واحد أصيل ما يرد القعود لكنه دهمان من دهمان الى ماله مدى وتراه ماهوب شي ,
وجابه وكن آل سفران حقروه وقال محمد بن حرقان انا بشبيبة فرسي اما والله شبيتوبه وآلا طيقتوا منه ، شبابه فرسه وجابت وحده ما ترضع آلا وهي باركة على ركبها وتسوي جنادع الدنيا يوم شافوها آل سفران وهم يتسابقون عليه ويأتي بخيلان مع آل سفران ماهيب بسيطه .
ويقولي حياة دغيمان الجويعد اللي ركب منها في يوم خمس وتسعين خيل عشر صفر والباقي خمس وثمانين حمراء.
يقول آل سفران نزلوا جودة وإبلهم ماهيب قريبة منهم ويوم خذوا آلا الصايح يأتيهم في القايلة الإبل آخذت وهم يتطاولون الخيل في القايلة وذا الحزة بيموتون ظمأ هم وخيلهم ، وعندهم منصور بن منيخر قال تعالوا لا تفزعون ذا الحين تبون تفكون إبلكم خلوها تقيل ولا جاء العصر ترى إبلكم معدي عليها من رملان ( رملان علوا الدهنا ) سابقوها رملان بترد عليكم عند رملان وإذا جاء العصر لينكم عندي كل منكم معه سعه ومعه قرصه (السعه جلود غزلان قصير للبزران ) متنجدينها ويوم جاء العصر الا هم عنده والا معيض بن هادي العويض جاي على ظهر هدبا بيروح معهم قال منصور يا معيض لا تقطع مع الهدبا ياولدي قال اسكت مني والله لو تكثر علي الكلام أن اطش راسها , معيض ماله نفس قال منصور لا موفق أن شاء الله ياولدي ويركبون العصر كلن متنجد سعه وقرصه ويخلونهم خزيز وهدبة خزيز وهدبة يوم جاء تالي الليل مع فروع الصبح ثم الا هم على رملان ( من جودة كل منهم يعطيها قرص ) ويتبرزون من رملان يوم جاء عند الصبح ثم الا هنا غبره عجه مقبلة عليهم تحت الصبح لاهم ذولا جاينهم القوم واردين على رملان يوم وضعوا محازمهم وقاموا يسقون خيلهم ثم صلوها على القوم والا الإبل والجيش هاجه وهم يتجارون القوم كنهم ضبان والسلاح موضعينه وكلن يقول امنعي امنعي وتنملص هدبا معيض ويمنعونهم ويفكون إبلهم ويأخذون جيشهم ويسقونها يوم خلصوا زملوهم وخلوهم يروحون الخرج اقرب ما لهم الخرج ( قوم من نجد)
وركب معيض على جرة هدبا والاهي ذي نوب تخز ونوب تهذب والا عرضة على النصية انتكدتها ويوم اخذوا أهلها آلا هي جايتهم الضحويه الصبح ويقومون النسوان يصيحون وينعن معيض قالو انه مذبوح قال منصور بن منيخر عطوني إياها ويقوم يتروحها من توها ومن خلافها قال والله ماجاه بندق ويوم خذوا آلا هم جايين بالإبل وجيشهم وهذه قصة تدل ان خيل آل سفران مهيب بسيطه يوم لحقوا القوم من جودة الى رملان .
س : من اللي يكف العجمان في حرب نجران ؟
حرب نجران
منصور بن شافي هو أمير الأخوان واول حرب حضرها مع الملك عبدالعزبز فتح حائل1340هـ وحط معه الملك عبدالعزيز الف كلاً من آل شامر والعجمان واللي حضروا الفتح حطه عليهم وقدمه عليهم وهذا الكلام حكى به حياة دغيليب الله يرحمه بن طعان الجوع ومعه مانع العويض كانت حائل أول معركة حضرها الوالد الشيخ منصور بن منيخر وحضر الرغامة اللي هو فتح مكة والدحول وجدة وحضر حروب واجد منها نجران هو اللى عليه البيرق.
س : معركة الدحول خبرنا عنها ؟
حدثنا عنها أحد اللي حضروها وحضر نجران وحضر فتح مكه جدك اللي هو عبدالله بن فهد ( جوينان) بن هصمان رحمه الله .
قال امر الملك عبدالعزيز منصور قال يا منصور نبيك توقف بينا وبين (السحت) السحت هم ناس راحوا من المملكة وجا معهم ناس واجد من كل البلاد وقاموا يغزون قال إن شاء الله ومعه كل آل سفران صغيرهم وكبيرهم المتواجدين في نجران خذوا تسعة اشهر روح بن جلوي معهم سرية .. سرية ماهم كثير منهم عبيد تحت أمر منصور قال خلوكم مع منصور جاو عند ( وارة ) وكان معهم واحد من جماعة بن قضعان يقاله زبران شاعر بعد تسعة اشهر قبضوا ناس كثير ولا عاد جو مثل ماهم اول ياخذون وينهبون .
وهنا فيه نكته من زبران
كانو الاخوان معهم نايف وبن برغش وحجرف الله يرحمهم ياويلك بالويل اللى تلعب زبران هذا كان يبغي اللعب وقال
نايف توي وحجرف تقفاني = ضايق صدري وياعز تاليه
وش بأقوى من عبيد لاجاني = لا نطحني ثم واجهني بشوميه
يقولها وهو مبتسم
س : لماذا سمي طعان الجوع بهذا الأسم ؟
طعان الجوع هو عبدالله بن منصور بن منيخر
, بن رشيد ظالم كنه بن عريعر غار على مطير اللي هم علوا ركبوا الرياجيل خيلهم وتقفو ابلهم ومطير ماهم بسيطين لا ذا الحين ولا ذاك الحين خذوا السيوف واقفوا على إبلهم ، قوم بن رشيد خذو الغنم والبيوت .
مشو واقفو على إبلهم قابلوا ليل المتلقم وقالوا له نبغيك تمشينا , مشاهم حتى يوم جاو بحرة الكلاب جاه الخبر ان بن حثلين والعجمان ما يبغون بجيتهم وقال ليل المتلقم لآميرهم اللي هو محمد بن حميد اللي مارثته آل بدر وصاهود بن لامي وناس من أمراء علوا أن بن حثلين والعجمان ما يبغون بجيتكم في ديارهم قالوا اجل نبغيك تجلس مع أهلنا وحنا بنركب وبنروح إلى آل سفران , آل سفران يردون جودة من قبلة قال إن شاء الله جلس ليل وركب محمد بن الحميدي ومعه صاهود بن لامي وكبار مطير وصلوا آل سفران ولا ادنى من يدانيهم بيت شافي بن فهد آل منيخر وشافي ماخذ بنت الطويل منصور الطويل ام منصور بن شافي وبنت فدغم امها وهي عندهم في البيت وينوخون عنده وقالوا هاذي القصة يا عانينا قال امشوا لأبى ما يقول عمي (يقول أبى لمنصور بن منيخر ) قال امشوا ان رحبوبكم فهذه الساعة المباركة وان ما رحبوا بكم والله أن اشد معكم .
جاو عند الشايب منصور بن منيخر ورحب فيهم واستلحق كبار آل سفران وبرزو هم وبطي ومحمد عوال منصور يوم برزوا قال محمد الحميدي ان كان آل سفران جو ذا لحين وهم مثل الجمال اللى على ما قال تراهم رحبوبكم وان كان كل واحد راح لأهله ما يبونكم ، وما خذوا آلا آل سفران جايين وكل منهم يقول عساني الأول قالوا مرحبا ومسهلا واركبو معهم على ما اعتقد وليد آل منيخر وكروز بن جطلي آل سرحان وجابوهم وانزلوا عندهم ولا معهم شي مطير لازاد ولا سناح الأمير اللي هو محمد الحميدي نزل عند الأمراء وكل منهم نزل عند واحد من آل سفران وصار اكثر الجبلان عند عبدالله بن منصور قام الرجال وأمر عواله وجابوا قلال الأحساء وجاب الحصير قام يشق القلة ( التمر ) ويجيب السمن ويحط وقاموا الرجال يأكلون ، والحريم في حضاير مابه بيوت وكل حرمه يراح لها تمر وسمن وبعد ذلك جاب فاطر وذبحها وكل الناس ذبحوا الفطر بس هو امتاز بالتمر والسمن ويوم اصبحوا قالوا يا شيخ منصور حنا نبي نرد جودة قال أردو جودة قاموا كلاً يحكي على رفيقه وش عشاه البارح قالوا الجبلان والله عشانا طعان الجوع جاب القلال وسوى وسوى وخذولهم وقت قالوا يا شيخ منصور نبغي الأحساء قال إن شاء الله قال يا محمد لولده رح بالدويش ومطير واللي يعوزهم من الأحساء اكفلهم فيه قال إن شاء الله , قاموا الرجال بحلالهم ما اخذ منه شي باعوا الفطر وبعض الإبل وشروا البيوت والحجب وكل شي شروه وجو واخذو مع ال سفران سنتين او ثلاث حتى بن رشيد اصلحهم ورجعوا إلى ديارهم وهذه سبب تسمية طعان الجوع .
س : حدثنا عن الرغامة ( فتح مكة وجدة ) ومن حضرها من العجمان؟
في عام 1343 هـ دخل الملك عبدالعزيز مكة بدون قتال واستبشروا أهلها به وعندما نزل وجاه رسول من اهل المدينة وطلبو منه أن يرسل إليهم من يستلم مفاتيح المدينة أرسل لهم ابنه الأمير محمد بن عبدالعزيز ومعه رجاله واستلمو المدينة وعندما رتب المدينة ومكة وهذه كلها في عام واحد .. الشريف حسين نوب ابنه علي في مكة ومعه بعض القوات الإنجليزية وطيارات والملك عبدالعزيز ورجاله ما معهم الا السلاح الخفيف والله سبحانه وتعالى نصرهم زحف الملك عبدالعزيز ورجاله ومن معه من القبائل وكان معه الوالد منصور بن شافي بن منيخر ال سفران وبعض العجمان والبيرق واحد بيرق منصور , الملك خيم في الرغامه جبل شرق جدة وراح الاسم على الرغامه والا المحاصر والحرب في جدة دام الحرب كل عام 44 وكان بينهم اخذ ورد والطيارات تضرب ولكن الله سبحانه وتعالى نصره.
وفيه حادثة الوالد منصور واللي معه قالوا ان الانجليزي طلب مقابلة الملك عبدالعزيز عندما يأسوا وهذه كانت خدعة من الإنجليزي واخر ما عندهم ،الملك عبدالعزيز حكيم ورجل دين ودنيا وسياسة وكل شي في الملك عبدالعزيز رحمة الله ,
الإنجليزي جاء ومعه معدات ما يعرفونها أهل نجد واخذ إحداثية الخيمة اللي يجلس فيها الملك عبدالعزيز والساعة اللي يجلس فيها راح على ان الكلام في الانسحاب ، وبعدها الملك عبدالعزيز تأخر بحاجة بسيطة من خيمته اللي يجلس فيها ويجونه الأخوان وكبار اهل نجد يتشاورون في الحرب الملك جاه شاغل وشغله تأخر ما يقارب نصف ساعة أطلق مدفع على خيمة الملك ولا خذوا آلا الخيمة شلت واللي فيها لان الإنجليزي مآخذ إحداثية الخيمة يعني لو الملك عبدالعزيز واللي معه فيها ما بقى منهم احد سبحان الله العلي العظيم قال الملك الحمدلله ( ويمكرون ويمكر الله والله خير الماكرين ) عرف الإنجليزي والشريف أن هذه آخر محاولة وانسحبوا واتى البشير إلى أهل جدة وأهل جده ما يبغون الشريف والإنجليزي يبغون الملك عبدالعزيز سامعين بعدله وطلعوا اهل المدينة صغيرهم وكبيرهم مستقبلين الملك عبدالعزيز لا اخذ منهم حلالهم ولا ذبح رجال وأخلو له دار كبيرة والجنود والأخوان صاروا خارج جدة وبعد ما رتبهم وخلص أمورهم نزل مكة ونزل في قصر يقاله السقاف قصر ملكي وزار البيت الحرام وشاف مشائخه والمدرسين اللي فيه وبعد ذلك قال يا منصور حنا بنحدر ونبغي من جماعتك اللي نثق فيهم لاجل ان القصر فيه أشياء ثمينة منصور قال لشيخ معه يقاله أبو عباه والى الآن وال أبو عباه موجودين وقال يا شيخ اكتب وكتب اولهم عبيد بن برغش آل سفران وعبدالله بن هصمان آل سفران وعبدالهادي بن صقيه آل سفران ثم ناصر البراك آل سفران ثم فهيد بن سالم العويض آل سفران ثم سالم بن خجيم آل سفران وفالح بن طريق ال سفران وربع واجد ما تحضرني الأسماء الآن ومن العجمان واللى عادني حافظ منهم محمد المغنى آل هادي ومحمد بن حمد آل ضاعن وسعود بن فدغم آل حبيش المهم كتب خمسين أخذهم معه في الورقة وأعطاها الملك عبدالعزيز وزودهم بالسلاح وكل ما يحتاجون وحط على كل عشرة لهم مأمور منهم عبيد بن برغش وعبدالله بن هصمان وحدّر الملك عبدالعزيز للرياض وجلسوا سنة كاملة حتى الحج المقبل اللي هو عام 45 يسمونه حج الرمي وانتهت وهذا موجز للرغامه .
س : ما هي مواقف العجمان مع آل سعود ؟
آل سعود الله يعزهم ويجعلهم حكامنا اول الدنيا وتاليها لا جل كلهم بركة وخير من محمد بن سعود الى يومنا هذا فيهم البركة والخير للمسلمين عامة وشعبهم خاصة
هذه قصة رواها لي حياة عبيد بن برغش اللي هو أب فيحان الله يرحمهم ويسكنهم الجنة وعبيد غني عن التعريف ومعروف رجل دنيا ودين .
قال كانوا الأخوان مع الملك عبدالعزيز وكبار المسلمين يقول كنا في يوم من الأيام عند الملك عبدالعزيز في المربع وعلى الغدا وكان الملك ما يحب يجلس على الغدا بدون كلام ولا شي بينه وبين أخوياه وربعه يقول ذاك اليوم على الغدا محد تكلم وكان نايف العويض الله يرحمه موجود ولحيته طويلة مره تاصل إلى سره يقول عبيد بن برغش أنا قلت يا طويل العمر هذا والله غدا ماذا أبو لحية عليه اللي هو نايف العويض يقول قال الملك عبدالعزيز لا يابن برغش لو شفت أبوه عايض العويض يوم ركب ذلولة العجالة وأرسله الأمام عبدالرحمن صوب آل سفران ومنصور بن منيخر على جودة ما قلت ذا الكلام يقول قلت عسى الله يطول بعمرك أنت أبخص.
وقال الملك عبدالعزيز القصة والكلام الحين للجميع معه ناس وكبار الشيوخ حتى آل رشيد معه
القصة أن حنا بينا وبين بن رشيد مواجهة قريب من الرياض يقول جات القوتين متشابهة محد غلب أحد الأمام عبدالرحمن اكثر من معه قبيلة سبيع والسهول وبعض العجمان اللي هم آل شامر اللي ساكنين ذا المكان سبيع نازلين الحائر أول النهار يطاردون وتالي النهار يرجعون لأبلهم يطلقونها في المراعي لازم يكون عندها خيل ورجال وآلا بتوخذ إبلهم وطال عليهم الموقف وعايض العويض معهم مع الامام عبدالرحمن قال في يوم من الايام يوم طال عليهم المناخ ولا احد منهم انتصر يا عايض انا ابغي منك خدمة قال عايض انا بنفسي معك قال أنا ابغي اكبر من ذلك قال حاضر قال ابغيك تأخذ الخطاب وتوصله منصور بن منيخر وال سفران وتقوله من الراس هذه حزت النفعات كلمة يقولونها الناس ,
الشيخ منصور بن منيخر ما يحب بن رشيد ولا الظالم ولا بعد ألفى عليه ويحب آل سعود ويحب الناس اللي يخافون الله ولا فيهم ظلم قال إن شاء الله قال حتى ذلوله ذاكر اسمها العجالة ركب عايض على ذلوله وحول على الشيخ منصور بن منيخر واستلحق منصور كبار آل سفران قال يا جماعة الأمر هذا, وقالوا مستعدين ركبوا آل سفران ومشو ومن معهم من بعض العجمان وقصايرهم المهم أن الأغلبية آل سفران يوم مشو لينهم ثمان مائة فارس والعدد هذا ما هو بسيط ذاك الحين , الأمام عبدالرحمن حكيم قال يا عايض لا تجون في نهار تعالوا في ليل يوم جو في المغرزات ونزلوا مشى عايض للأمام قال ابشر ما يسرك آل سفران ومن معهم ثمان مائة جو بقوتهم وسلاحهم قال ارجع لهم ترى غداهم زاهب بعد ما رجع قال عايض لمنصور بن منيخر الأمام عبدالرحمن مزهب الغدا قال منصور يا عايض والله ما انتغدا آلا قد رحنا لذ اللي مقابلينهم ومالحناهم يعني تواجهنا حنا وياهم ظهرت الشمس وقبل أن تظهر لينهم جايين القوم اللي مقابلين الأمام عبدالرحمن وسوا فيهم ذاك النهار سواه ما هيب بسيطة وحتى انه اقبل العصر وهم في معركة وهي مهيب العادة العادة انهم يتواجهون الصبح وإذا ارتفع الضحى كلن رجع المصاب يعالجونه والميت يدفنونه ويأخذون راحة إلى بكرة واما ذا اليوم دامت المعركة حتى قريب العصر ورجعوا إلى الأمام عبدالرحمن وغداهم وجلسوا عنده وسبيع حاضرين وسبيع مثل ما نقول اول النهار يطاردون وتالي النهار يرجعون لحلالهم في الحائر يطلقونه قالهم منصور بن منيخر يا سبيع (امرائهم ابو ثنين بن مجفل وبن شوية والسيفي وأمير عجمان الرخم بن هديهد والعماني مهم بسيطين) قالهم انتم مشغولين ذالحين أول النهار تحاربون وتالي النهار ترجعون لحلالكم قالوا وش نسوي يا أبو بطي قال أنا بشير عليكم بشور خلو حلالكم يحدر شوفوا أهلنا على جودة وعندكم عريعرة وأم أربيعة خلو حلالكم يحدر وتراه في وجهي ما يوكل لكم حاشي ولا كبير ولا صغير حدروا سبيع حلالهم وتفرغوا مع الأمام وحربه ولا جاء بعد عشرة أيام من جيت آل سفران الا العدو منهزمين ولا بقى منهم باقي .
وهذه قصة اول وقفة اللي انا اذكرها وحكاها لي عبيد بن برغش الله يرحمة وهي على وقت الأمام عبدالرحمن والشيخ منصور بن منيخر وآل سفران من كلام الملك عبدالعزيز الله يرحم الجميع .
س : طالما ان الحديث عن الملك عبدالعزيز رحمة الله وما قاله عن مواقف العجمان مع ال سعود نريد ان تحدثنا عن الملك عبدالعزيز في فتح الاحساء ؟
حكالي الشيخ احمد الملا من مشائخ وكبار أهل الاحساء قالوا كنا نراسل الملك عبدالعزيز ولا نبغي الأتراك سنة 1331هـ حدر الملك ومعه العسكر وسلاحهم أهل الاحساء منضمين الأمور حتى انه نزل ورى عين نجم ورى جبل وراها وكنا نرسل له خياله نعطيه خطوط ويعطينا خطوط يقول وفي ليلة من الليالي اتفقنا انه تصير هذه الليلة الهجوم يقول حنا وانا خابر اسوار الأتراك شفتها أنا قريب محفور ورى السور عرض7 متر وطول 3 متر او ازود بشوي يقول حنا خذينا حسابنا قربنا خشب جذوع النخل وجبنا حبال وصفيناها وسوينا الأمر ثم ارسلنا الخياله للملك عبدالعزيز وهو في عين نجم وجاء الرجال ولا معه آلا أربعة يقول جاء لين الخشب مصفوف وأنا طلعت لان أهل الدراويز يعرفونا وأنا خابرها قريب أربع دراويز كل دروازه فيها جنود ومعهم سلاحهم خططنا للملك عبدالعزيز وجاء الرجال ومشوا على الخشب حتى وصلوا إلى الحبال وكل واحد بندقة على ظهره يقول انا واقف معهم قال الملك عبدالعزيز أنا أول ما يطلع وأول من يطلع يمكن توه العسكر يمكن يذبحونه ولين به واحد من رجال الملك عبدالعزيز اسمه عموم مهوب بسيط جاء الملك عبدالعزيز قال قلت يا عبدالعزيز خل عموم يطلع الأول أن ذبح عموم بداله عموم وان ذبح عبدالعزيز ما بداله عبدالعزيز يقول قال يا عموم أبو خمس ما مات بأربع وش معنى أبو خمس ما مات بأربع يعني اللي باقي من عمره خمس ما هو ميت بأربع بيبقى ألين يوصل خمس سنين يقول وطلع ويحلف الرجال انه واقف يشبح فيه قلت ما عرفت من اللي معه قال عرفت فيصل بن حشر وهو يطلع الملك عبدالعزيز وطلعوا رجاله وراه ولا برقوا فيه أهل الدروازه يقول الملك عبدالعزيز حط كل واحد على دروازه وقالهم لا تذبحونهم وبأمر الله ما خذوا وقت الا هم قابضينهم ومستلميين الدراويز جنود الملك عبدالعزيز ويقول جاء عندي في البيت أهل الأحساء درو وخذوا سلاحهم قال الملك عبدالعزيز لهم ما نبغي منكم قتال يا أهل الأحساء كلن يأخذ سلاحه ويبقى في داره يوم جاء تالي الليل يقول آلا والله المدفع يوم ثارت يضرب قصر بن ملا ورانياه ويضرب بالثانية والثالثة يقول والله ذالرجال انه جالس ولا اهتز ولا قال معثورين
ومنثورين يقول يوم أصبحنا لينهم جايين ضباط منهم وقالوا نبغي الملك عبدالعزيز في كلام قال يالملا رح وقل لهم هم آمنين يسلمون سلاحهم والقوة ونرسلهم لديرتهم ويسلمون العسكر ويرسلونهم الى ديارهم ولا ذبح منهم احد والملك عبدالعزيز رتب الأحساء وهذه من قصص الملك عبدالعزيز المشهورة والمعروف فيها بالشجاعة بأنه هو أول من طلع الأول ( أبو خمس ما ما ت بأربع وانتهت من ذاك اليوم والحمد لله ) .
س : كلمه اخيره توجهونها لابنائكم اعضاء وزوار شبكة العجمان؟
الله يعطيكم العافيه على الجهد الرائع وعلى حفظ التاريخ والله يوفقكم على عملكم وجهدكم الطيب ولكن نرجوا الابتعاد عن كل مايسيئ للقبائل الأخرى والمواضيع الي تسبب المشاكل بين ابناء العمومة ونتمنى لكم كل التوفيق ان شاءالله .
وفي نهاية هذا اللقاء نتقدم بجزيل الشكر وخالص الامتنان لضيفينا الكريمين على رحابة الصدر وعلى حسن الإستقبال وعلى حرصهم على نقل تاريخ هذه القبيلة المشرف وحفظه للأجيال القادمة.
صور من اللقاء
30-04-2006, 03:44 AM
العرض المتطور
