يقـول مــن عـــدى على راس عالي
رجــم طــويـل يـدهـله كل قرناس
فـي راس مـرجـوم عـسير المنــالى
يشتاق لـه مـنـدك بالقـــلب هوجاس
قـعـدت فـي راسه وحـــيد لحــالى
والقـلـب فـي لجات الافكار غــطـاس
وقعدـت اعـد ابـامهـــا والليـالــى
دنيا تـقـلب مـا عــرفـنـا لها قياس
دنيا تـفـرق بيـن غــــالى وغـالى
لو شفت منـهـا ربـح يرجــع للافلاس
يا ما هفا به مـن رجــال مـدالـــى
مـا كـنـهـم ركبوا على قب الافــراس
ولا رددوا صـم الـرمـك للتــوالــى
ولا ثـار عـج الـخيل في كـل مـرواس
ولا قـلـطوهـن للكمـــين المـوالـى
ولا صـار فـوق ظـهورهن شلع الانفاس
فـي حـومـة الهيجا لهن اجتوالــــى
كـل يـبى مـن زايـة الفعل نــومـاس
مــن بينهـم عود الجنا والســـلالـى
مـثـل البـروق اللـــيل الادمـــاس
يقطـعـك دنـيـا مـا لـهـا أول وتالى
لـو اضـحكـت تبكى وتوريك الاتعــاس
يـا ابـجـاد شـب النار وادنـى الـدلالى
واكسـر لـنا يـا ابجاد ما يقعد الــراس
فـنـجال يغـدي مــا تـــصور ببالى
وروابـع تـضـرب بها اخماس وأسداس
لـعـل قـصر ما يجيبــــه اظلالــى
يـنـهـد من عالى مبــانيــه للساس
لـى صـار مـا هو مدهل للـرجـــالى
وملـجـأ لـمن هو يشكى الظـيم والباس
بـحسـناك مـا منشى حقــوق الخيالى
يـا خـالق اجـناس ومفــنى اجـناس
تجعـل مـقـره دارس العهــــد بالى
صـحـصاح دو خـالــى ما به أو ناس
لا خـاب ظـنـى بالرفيــــج الموالى
مـالك مشـاريـه عـــلى باقي الناس
وإن ناشنى مـن بـعـض الادنيـن صالى
مـانــى عـن الزلات مخـــبر وبلاس
كالعنبـر الغالـى بالأسـواق غــــالى
ولا درهــم الفضيـة على صفرونحاس
اجـزيـة بـالصده جنوب وشمـــالـى
واتـلى هـوى قـلبى اليا هب نسنــاس
المستريـح اللـى مـن العـقـل خــالى
مـا هـو ولجـات الهواجيس غـطـاس
مـا هـو بمثلـى مشــــكلاته اجلالى
عجـزت اسجلهـى بحبـر وقـــرطاس
حملـى ثقيـل وشلـت حملـــى لحالى
ونصبـر علـى ضيـم الليالى والاتعـاس
بـرسـي كما ترسي عـوالى الــجبالى
مـا ينهـزع حـيد عـــليه القدم داس
مـتـى تـربع دارنـــا والمـفــالى
تخضر افياضـه عـقـب مـا هي بيباس
ونشـوف فـيـه الـديدحــان متـوالى
مثـل الـرعـاف بخصر مدقـوق الالعاس
ينثـر عـلى البيـداء ســـواة الزوالي
يشـرق حـمـارة شرقة الصبـغ بالكاس
والبوم فى تالى هدامه يلالى
جزاك يا قصرن خنا وكر الادناس
لمحمد السديرى
02-12-2004, 06:33 PM
العرض المتطور
