دك الحشى من ماضي الوقت دكاك
وباب الرجا عن باقي العمر مصكوك
ملكت شيٍ فاق عن حد الإدراك
وتفويض عن باقي الطريقين وصكوك
والهم له بين المعاليق شباك
وقفل المحاني من عنى الوقت مفلوك
ياقلب لو طيبك مع العالم اغواك
الطيب ماينفع مع الناس ضروك
الطيب في عيون المخاليق خلاك
عرضه لضحكة كل هافي وصعلوك
وياقلب لو حلمك عن الهافي الهاك
ولو فيه ناسٍ عن هل العرف حدوك
حذرا تغيّر باقي العمر مبداك
يااابوك وشلك في الرديين يابوك
الطيب لو ترجيه هالوقت ماجاك
وستر الشكاله تالي الأيام مهتوك
والحنظله ماهيب تجنى من الراك
والراك ماينبت من عروقه الشوك
لولاك ماعاشوا مع الناس لولاك
وياليتهم عن ساقط الهرج علّوك
كم واحدٍ في ماضي العمر خاواك
ويوم ارتوو من نبعك العذب عافوك
وكم واحدٍ فيما مضالك تهقواك
ويوم اللتفت لينه مع الزمل متروك
بعض البشر في هالزمن داك ودواك
والبعض لاجت حزة الضيق خلوك
وياراس لاتتبع سفيهٍ تعداك
ولا تلتفت لو بالخثاريق بذّوك
خابرك ياراسٍ على الطيب مرباك
تشوم عن درب المناقيد وتصوك
قد جاك ياراسي من الوقت ما اكفاك
ومن عشرة اللي بالمشاريه برّوك
انهاك عن طبعك ولا كني انهاك
لين انهم عن مقطع الحق ردّوك
واليوم مابه شي ياراس يخفاك
ولا يلحقك في اللي مضى ظن وشكوك
اتبع طريق اللي عن العيب عدّاك
وارض الثنين اللي على العز ربوك
وياللي خفوقي صار في كف يمناك
ومشاعري عن كل هالخلق بدوك
الخافق اللي يوم ناديت لباك
واصبحت مع دم الشرايين مشروك
لاتجرحه دامه على الغير بدّاك
القلب لك ياسيد القلب مملوك
وانا ادري ان به ناس غيري تمناك
وبه ناس في قربي وحبي تحدوك
والله ما يسوون في الأرض ماطاك
لو كان من كثر الأكاذيب غثّوك
تسابقوا كلن فزع يطلب رضاك
وفي ظنهم عن قلب غاليك لدوك
ياجعل من خان المواثيق يفداك
وناسٍ بأسامي ماتليق ابك سموك
ناسٍ اذا جاء ذكرك العطر تشناك
ياليتهم بعيون مغليك شافوك
كم جابك الهاجس لعيني ووداك
وافز لاجت سالفه فيك واطروك
وكم مرةٍ لاسج في الليل ناداك
لادك به من جاير الشوق داكوك
وصيتي لك كل ماحان ممساك
والنوم طيفه بين الأهداب مسفوك
عيوني اللي طول عمري ترجاك
سلم عليهم كان في الحلم مررروك
29-09-2011, 10:09 PM
العرض المتطور
