آخر خبر قالت وعـد ثانـي العيـد=مرت سنيـن وروّح العيـد معهـا

فزاع · #1 16-07-2010, 03:29 AM

مرت علي مع زحمة الناس يا زيـد=وقالت لها كلمه وانا اللـي سمعهـا
تنظر حيا ومن الولع تقطـع القيـد=ومن شان كلمتهـا تنكسـت معهـا
تنكس الحر النداوي علـى الصيـد=مرهي ونفسه كثـر جوعـه دفعهـا
تماكن الصيـده قبـل تنـزح بعيـد=وشرواك يدري بالحـرار وطمعهـا
والحب له بسمه ونظـرات تمهيـد=وبذرة غلا يدري بها مـن زرعهـا
وانا من اللي غاص بحـره تراديـد=وكم فرجةٍ من شـان خلـه قطعهـا
وأشد ما يجري علـي مـدة زهيـد=لامدهـا عقـب بطـاه ومنعـهـا
وجاوب بصوتٍ فيه رعشه وتنهيـد=تكفى ترى ما غيرك احـدٍ طبعهـا
وحل الفراق وصار بالوصل تعقيـد=ورديـت خطـواة العـذاب اتبعهـا
توارد همومـي جمـوع ومفاريـد=والروح كن اللي وضعهـا نزعهـا
عشق الهيام اللـي حلاويـه تنكيـد=أحس نفسـي ضرهـا مـا نفعهـا
تمرنـي ذكـراه مـع قايـدة غيـد=اللـي خجلهـا يستبيحـه دلعـهـا
لا طولت تعطي على الحب تأكيـد=ترسل مسـج ولا حـدى مجتمعهـا
تبي تجدد نبض الاحسـاس تجديـد=وتزيد نفسـي فـي هواهـا ولعهـا
كلامها يغريك واجفل مـن الصيـد=ولا هتـك غـرات اهلهـا سنعهـا
مثل السراب اللي كسا صحصح البيد=ما يشرب الضامي لو انـه تبعهـا
مصيونةٍ فيهـا تضيـع المقاصيـد=يم الردى حكـم الغـلا مـا دفعهـا
اشرح لها وضعي بنظـم الاناشيـد=نظم البيوت اللي مزاجـي بدعهـا
ولا عطتنـي للمواعـيـد تحـديـد=والنفس ضاقت والفضا مـا وسعهـا
آخر خبر قالت وعـد ثانـي العيـد=مرت سنيـن وروّح العيـد معهـا