اذكر يوم كنت في سادس ابتدائي كانو اخواني الكبار اذا اجتمعو مع اصدقائهم يجلسون يمدحون مدرس عندهم في المرحله المتوسطه والثانويه اسمه موسى كانو متفقين على انه افضل مدرس ..
عاد تعرفون البزارين اذا سمعوا الي اكبر منهم يتكلمون في شي ودهم يسوون نفسهم , وانا مثل كل بزر خياله خصب خذيت فكره ان استاذ موسى احسن مدرس قوي جدا يمكن مثل جرندايزر
صرت انتظر متى اروح للمتوسط عشان يدرسني استاذ موسى .... لما خلصت الابتدائيه ورحت للمتوسط كان اهم هدف حققته انه بيدرسني الاستاذ موسى ما تخيلون سعادتي لما بدا العام الدراسي .......
لكن الفرحه ما تمت اكتشفت ان الاستاذ موسى ما يدرس اول متوسط ... الله يعين انتظر سنه اخرى ...
في ثاني متوسط كنت متاكد انه بيدرسنا الاستاذ موسى لكن للاسف جابوا مدرس سعودي جديد والاستاذ موسى صار يدرس ثالث متوسط وما فوق ........ لا حول ولا قوة الا بالله .... علي الانتظار سنه ثالثه .....
لما صرت بثالث متوسط ومع بداية العام الدراسي اول شي سويته رحت اسأل من الي بيدرسنا اجتماعيات قالوا الاستاذ موسى بغيت اطير من الفرحه اخيرا بيدرسنا الاستاذ موسى ....
تعرفون اول اسبوع من العام الدراسي الدراسه غير منتظمه لان فيه توزيع كتب والجدول وغير ذلك وكان استاذ موسى مسئول عن كل شي في المدرسه باختصار شايل المدرسه على راسه ....... ما قلتلكم انه قوي
اول اسبوع ما شفناه , الاسبوع الثاني قبل تبدأ اول حصه للاستاذ موسى قام مجموعه من الطلبه المشاغبين برش فلفل احمر داخل الفصل وصاروا يفركونه برجولهم لما صار جو الفصل فلفلي بامتياز ...
وعيونكم ما تشوف الا النور صرنا نعاطس ونكح ودموعنا تصب .... ما قدرنا نتحمل وطلعنا برا الفصل ..
جا الاستاذ موسى وشافنا واقفين برا قال ليش طالعين برا الفصل ؟
قلنال الصف جوه ملوث ما ندري وش فيه !!
قال طيب ادخلوا انشوف وش فيه .. دخلنا وعلى طول عرف السالفه قال مين عمل هيك؟
محد جاوب .. وقال مره ثانيه مين عمل هيك ... وايضا محد حكي .. وثالثه ورابعه وما فيه جواب...
كنت اشوف وجهه صاير احمر وباين عليه معصب بس ماسك اعصابه .. وانا اقول في قلبي والله ما يستاهل استاذ موسى ..
قفل الباب علينا وطلع وقال اذا احد بده يحكي انا عند الباب ...
جلسنا نعاطس ونكح وصلنا لمرحلة الاختناق والظاهر انه حس فينا وخاف علينا فتح الباب وقال اطلعوا برا الفصل ..
راح لفصل ثاني وصار ينادينا واحد واحد ويحقق معنا ...
لما جا دوري قال ... مين عمل هيك ؟ قلت ما اعرف
قال انت طالب مؤدب وشاطر وصار يمدح فيني الين وصلني السما ... وبعدين سألني مين عمل هيك ؟.... بغيت اعلم بس خفت اطيح من عيون الربع قلت ما ادري..
قال طيب فلان الي عملها ؟ مدري
طيب فلان؟ مدري
طيب فلان ؟ مدري
الثلاثه هذولا هم الي رشو الفلفل
قال طيب سعود الي عملها ؟
سعود هذا كان غلبان لاخر درجه ويبدا العام الدراسي وينتهي ما نطق ولا كلمه
بسرعه قلت سعود وينه وين السوالف ذي ..
ابتسم ابتسامه صفراء وقال روح لصفك ....... تحسون اني قلت شي غلط !
اول ما دخلت الا داخل الصف وراي وشكله اكتفى من استجواب باقي الطلبه ................ تهقون اني فضحتهم ..؟
قال فلان وفلان وفلان تفضلوا على الاداره ..... اشوف الا كل الطلبه يناظروني نظرة حقد حتى سعود .... والله ما قلت شي ..والله ما قلت شي وش فيكم.
صراحه حسيت باحراج وجلست احلف للربع اني ما علمت وشكلهم صدقو وحسيت ان الموضوع عدا على خير...
الطلبه المشاغبين اياهم كانو يعرفون الاستاذ موسى ومطيحين الميانه معه لانهم صارلهم 7 سنين على الاقل في المتوسط خبره يعني .. فلما دخل علينا الاستاذ موسى اليوم الثاني سئلوه كيف عرفت ان احنا الي رشينا الفلفل ...
قال هذا علمني واشر علي ................. افاااااااا هذا الاستاذ موسى الي يقولون احسن واحد ...
حسيت باحراج وظلم بغيت ابكي وجلست احلف اني ما علمت , استاذ موسى تكلم متى علمتك ؟ وهو ساكت ويبتسم...
صراحه تاثرت نظرتي له وحسيت انه نذل وخذيت منه موقف ... لكن لفتره مؤقته ...
بعد كذا عرفت انه افضل مدرس مر علي بحياتي مثقف وذكي ومتفاني في عمله وشخصيته اكثر من رائعه ..
وكان شرحه مميز وغير تقليدي ....
مره دخل علينا وكان يوم سبت بعد اجازة منتصف العام سلم وجلس ..
وبعدين قال يوم الاربعاء رحت انا ومجموعه من الاصدقاء لكورنيش الخفجي حبينا نغير جو ....... لو عرفت الكورنيشات اني اطلقت اسم كورنيش على شاطيء الخفجي بترفع علي قضيه اول ما وصلنا جلس بعض الاصدقاء يجهز الشوي وبعضهم يسوي الشاهي وانا وواحد من الشباب جلسنا نتمشى..
وحنا نمشي الا واصل سوبر بان كويتي وقف ونزلو منه هذليك البنات الي سبحان الخالق اقمار , غزلان الله يحفظهم
التفت على صاحبي الا صاحبي يناظر البحر وشكله ما لا حظهن وقبل اتكلم سألني سؤال ............................؟
يقول انا جاوبته وقلتله .................................................. ..... طبعا جواب سؤال صاحبه هو شرح الدرس المقرر علينا ..
وجلس يتكلم ويشرح ودخلنا معه في الشرح والمناقشه وحنا فاتحين حلوقنا وسط صمت مطبق منا وقمة التركيز .. تعرفون بداية المراهقه وما نصدق نسمع طاري بنات ..
وفجأه الا الاستاذ جالس على كرسيه ويقول انتهى الدرس اشكركم على حسن انصاتكم والي عنده سؤال يتفضل ..
كلنا بصوت واحد والبنات ... قال ركبن سيارتهن وراحن الله يحفظهن ....
حبيت اشدكم للدرس وعرفت ان هذا الشي الوحيد الي بيفتح عقولكم المقفله بعد الاجازه ......
ما قلتلكم انه غير تقليدي..
من عيوب السعوده انها تطبق بشكل عشوائي وتفقدنا الكثير من العقول المميزه ..
وكان الاستاذ موسى احد ضحاياها ... لم يشفع للاستاذ موسى تميزه وتفانيه في العمل تم انهاء عقده ببساطه ليتم حرمان اجيال من شخصيه يمكنهم التعلم الكثير منها .... من اجل توفير وظيفه لموظف يفتقد للخبره والقدوه التي يكتسب منها المهارات والنتيجه تعليم متخلف غير قادر على تطوير نفسه ..
احلال العماله الوطنيه مطلب وطني ودعم للاقتصاد لاكن يجب ان لا يكون ذالك على حساب العقول والكفاءات التي يمكنها ان تقدم الكثير للوطن اكثر مما يقدمه مئات من ابناء الوطن .
تذكرت الاستاذ موسى وانا اشوف ما يعانيه ابنائنا من اهمال من قبل المدارس والمعلمين وقررات ارتجاليه لا تؤدي الا لؤد ما يعرف مجازا بالتعليم
اسف على الاطاله ودمتم بخير
07-05-2007, 07:38 PM
العرض المتطور
