ليش ماتصير رجال ؟

[عزوف]

يبدو العنوان غريب شوي .. لكن من منكم لم يسمع هذه الكلمة في طفولته عندما يقدم على عمل أي شيء ..

سؤال بسيط .. متى يشعر الطفل بطفولته إذا كان كل تصرف محسوب عليه ؟؟

نلاحظ أطفال الغرب يأخذون فترة طفولتهم بالطول والعرض .. ولا يبلغ الشخص فيهم حتى يكون قد أشبع طفولته ..

أما في المجتمعات الشرقية .. فالشخص يكبر وهو يعامل كالبالغ العاقل ..

محاسب على لعبه .. محاسب على تصرفاته ..

دعوا أطفالنا يتمتعون بطفولتهم .. يجب أن لانحملهم المسؤولية في سن مبكر .. فهذا له أثر كبير على نفسياتهم ..

فعندما يأتي الوقت الذي يتحمل الشخص فيه المسؤلية ..أيا كانت المسؤلية ( عمل - أسرة - دراسه ) فإنه لاوقت للإستمتاع .. ولا وقت للمرح ..

نعم لكل شيء حدود .. فتربية الأطفال الآن تختلف عن تربيتهم في الماضي .. ولكن .. يجب أن يستمتع الطفل بطفولته .. فهي حق له .. يجب أن لا ننزعه ..

أنتظر تعليقاتكم ...

[كويتي]

هاهاهاهاها والله شفت العنوان قلت في هوشه الظاهر
اييييييييييييه يا هل كلمه كان معذبني ابوي يومني كنت
صغيـــر جاهل عمري 5 سنين ويقولي ليه ما تغدي رجال
كم مره اقولك خلك رجال .. يعمي انا العب في الشارع وهو
يقولـــي خلك رجال وانا اسمع مني وطلع مني ابي بس اطلع
وروح العــــب بس .. وبعدين نرجع نفس الموال والله وكيلكم
طراق مني وفنقر مناك وماتدري من طقاقك ..

شيـــبانه ما مرت عليهم طفوله الله يطولنا اعمارهم

تحيـــاتي كويتي

[عزوف]

اسعدني مرورك يا كويتي وتعليقك على الموضوع و

ويالله كا طلع لنا اول واحد متعقد من هالكلمه

تحياتي

[shadow-man]

فعلا إختي عزوف معاك حق
بصراحة الطفل عندنا محروم من طفولته لدخل الديوانية ينزف بطريقة مشينه وإذا راح يلعب مافيه أحد يوجهه ولما يعمل عمل تخريبي سواء بقصد أم بغير قصد يلقى توبيخ وتصير فيه عقدة لما يكبر والدليل إن فيه ناس كبار يسولفون يقولون والله الشايب مسني بالعقال والله ماأنساها على سبيل المثال بينما فيه ناس يحاورون الأطفال بخاصة بالدول الأوروبية وينزل الأب بمستوى الطفل حتى تظنين إنه طفل لذلك تنطلق شخصيتهم وتتكون بطريقة بنائية

[عزوف]

اسعدني مرورك يا شادو مان

وبالفعل معاك حق

انا اذكر سالفه سامعتها

وهي ان فيه اب كله ينادي ولده يا حمار !! ومره كان قاعد الاب والولد وعندهم ضيف وقال للولد يافلان قوم روح جيب الشغله الفلانيه

الولد مارد !!!!!!!!!!!!!!!!!!!

قال ابوه اشفيك انت ما تسمع !!
قال لا اسمع بس انت قلت يافلان ما قلت ياحمار !!!!

مسكين الولد متعود على الهواش والنزر !!!

طبعا الاب انحرج جدام الضيف بـــــــس هالطفل وهالعقده اللي سببها له ابوه منو ينسيه اثارها !!

تحياتي واسعدني مروركم

[كويتيه]

والله صااااااااااااااااااااااااجه يا الغاليه.. صج احناا جذي صراحه... الصبي مسكين.. الكل يبيه يصير ريال بسرعه.. نبيه غصب بتصرف مثل الكبار.. مانحط في بالناا انه ياهلل للحين...

مثل امي كله تقول جذي حق اخوي.. متى تصير رياااااااال.. عشانه دوم بروح يلعب برد حر صبح لييل..


يعطيج العافيه يا الغاليه

[عزوف]

اللـــــــــــه يعافيج يا غلاي

واسعدني مرورج

[اطياف الماضي]

المفرووووووووووض
ان الانسان يعيش كل مراحله بما فيها
شاكرة لك اختي عزوف طرح هذا الموضوع

تحياتي لك ,,

[عزوف]

العفـــــــــــو يا اطياف
وانا اوافقج بالراي وهذا هو المفروض

واسعدني مرورج يا غلاي

[اديب]

يعطيك العافيه أختي عزوف على موضوعك ولو أن عنوانه يخوف

والحمد لله صارت عوافي

أولا كلي ثقه بأن جميع أو أغلب ألاباء حريصون على أبناءهم ومن زود الحرص قد يصدر
منهم بعض ألالفاظ الجارحه وهي أحيانا لها فوائد أو قد تكون وسيله رادعه إذا أخذنا في
ألاعتبار نوعية مجتمعاتنا المحافضه وذات العادات والتقاليد.....

ولكن لي تعليق بسيط على الموضوع وهو بخصوص ألاب الغير متعلم والغير واثق من نفسه
والذي يثور عندما أحد ينتقده أو ينتقد أحد من أبناءه ويعتبرها تجاوز للخطوط الحمراء فهو
لايرضى بذلك ويجعل همه ألاكبر مراقبة أبناءه في كل كبيره وصغيره ويقتل فيهم البراءه ,

يعني يريد الطفل أبو أربع سنوات أو حتى الى ثلاثة عشر سنه يتصرف كأنه رجل كامل
فيراقبه ومثل ماقلتي وقالوا الاخوان {خلك رجال}{لاتلعب}{لاتكلم عند الرجاجيل}{لاترد علي
حتى ولو أنا غلطان}و.و.و.و.الخ

يعني بالخط العريض سلب شخصيته بالكامل وسوف يعيش طول حياته متردد غير واثق
من مايعمل ويحتاج الى تأهيل من جديد ويا ويله وسواد ليله أذا تزوج وطاح له في زوجه
شخصيتها قويه ماتعقدت مثله وهي طفله {بيرووووووووح فيها}

وهذا غلط اعطه حريته بحدود في الكلام في أعطاء وجهة
نظره أستمع له جاوبه على جميع أسئلته شجعه أمدحه هذا مثل طير الحر, أزرع فيه الثقه
والصفات الحميده مثل الصدق والامانه والصبروهذي من الدين, خذه معك للمسجد, ولا تنسى
حقوق الجار والوالدين وصلة الرحم...

وأخيرا من زرع حصد...


وشكرا للجميع