الله على الربطة يعين الصقاقير...اللي تعد الريش وتعد الايام
يقطعون اوقاتهم بالتسايير... شوف المقانيص القديمة بالافلام
تشوف راع الطير عاف المظاهير... من شوفة القمرا وعد(ن)لها صام
قعد مابين اهل البنا والنجاجير... في دورته مااهتم في فرق الاقيام
يبغي مقيضه مايجي فيه تقصير...من خوف لوم اللي الى شافها لام
ويجيب لطيوره حليب العصافير... اليا تباطى حذفه لريشة العام
يويق صبح وظهر والعصر وعصير...ويظهر عشاها عقب ماجا من الزاااام
يقسم علفها بالتساوي بتقدير... قدامه كني به يكسر عظام
كنها تزيده لاتعشى الدنانير...واليا درجت مايفتكر في هل الشام
تمسي وهو ممسى روابع وتفكير...يرمي به الهاجس على جال الاحلام
يذكر مكان(ن) داجه العام بالخير... ويطري عليه ازين مقانيصه اعوام
ذيك الوناسه والقنص والمشاوير... خوة رجال(ن)هل مقانيص وحشام
الله جمعهم كلهم في سيايير... وقدامه فرقهم ظروف واحكام
على الوعد فأول محطة طوابير... في كل موتر عزبت(ن) فوق قسام
فلان ينطر له رفيق(ن) على السير... وفلان اخذ للربع من كل الانعام
وفلان عند البنشر يركب سبير... وفلان قدامه يركب له اسيام
وفلان عجل ولايبي زود تأخير... شغل وراح وواعد الربع قدام
من شفهم ماحسبوا للمخاسير... لو زادت اصفار(ن) مياسيره ارقام
يحلها فالطيب ماهو بتبذير... يراقبون الله واحكام الاسلام
وراعي القنص عن من يسب القنص.. شف ذا اليا ذهن وشف ذا اليا نام
يغط غطت ذيب وان ذهن يطير... ويقوم عاد اللي معه مابعد قام
ويشب زل اللي يحتاج تكسير... في ليلت(ن) مافاد فيها التلطام
وفيما هي تفوح الدلال المباهير... خذ ركعتين بالخفى لله قيام
واليا قضى ركد دلاله مساطير... واذن ولايحتاج للربع قوااام
تمالو وركبوا وراحوا مداوير... للي يروع زولها كل ضرغام
طرق الجناح اللي اللي ليا قامت تسير... اول مايطري للربوع التشيام
تشاوروا ووصلوا لخير الاشاوير... وهدوا غرام الشارده عقب لزام
هدوا معيد(ن) عوقها عقب تذيير... اصله وحش مطروح في ديرة الغام
مغتر ولا طبعه بطبع المغاتير... من يوم رب والف الدس ماحام
مطلق عمد صافي وسيع المناخير... كن دق صدرة دق شماغ بسام
اعطاهم الصيدة بعد ماخذا السير... وعلم فروخ(ن) كان تحتاج علام
هدوا وصادوا والهدف هدة الطير... ماهمهم لدهام ولا لعزام
تبدلوا فالزرع شوف النواوير... وتبدلوا فالزحمة فياض وخيام
على لحم صيد وحليب المصاغير... تبدلوا بالسير والقيد درهام
وسجوا من هموم البلد والفواتير... وهموم الاسهم ذاك عارض وذا سام
وتريحوا من قولة صار تفجير... من شوفة الفتنة ومن كذب الاعلام
نشوف تفجيرات ونشوف تعزير... ولاجهلنا ماحصل بعد صدام
لاكن شوف وحر جوف ومقادير... وش الجهد غير الدعا والتهشام
الزبدة ان البر من غيرها خير... لاصار مع ربع(ن) صقاقير وحشام
وبعض الرجال اللي يلوم الصقاقير... ماهو يعد الريش ويعد الايام
تراه مربوط مثل ربطة الطير... يقصر جريره حده البيت والزام
وسلامتكم
(((((اشهد انه صادق)))))
09-09-2009, 01:26 AM
الصقاقير__ابن فطيس
وصح الساانه
العرض المتطور
