شرط رئيسي للفرعي !!

[راعي العشوه]

بسم الله الرحمن الرحيم

تحيه طيبه وبعد
أعود إلى هذا الصرح العظيم
بعد غيـاب .. قد يكون غياب عن المشاراكات
لكن لم اغيب بعيدا فكنت من المتابعين الدائمين له ..

أعود اليوم لكم بموضوع جديد اتمنى ان يلاقي القبول لديكم
ولا امانع من المناقشة او الاختلاف بالرأي فالإختلاف بالرأي لايفسد
للود قضيه
موضوعي هوو :-
المسجلين بالفرعي !!
أغلب المرشحين ينقلون اصوات اخوانهم وربعهم واللي يمونون عليهم للمنطقه
ليسند نفسه بالفرعي ويكسب اكبر عدد ممكن من الاصوات وهالشيء طبعا نفرح له
لأن الناجح واللي ما حالفه الحظ ... عجمان
لكن اللي ابي اوصله ان أغلب اللي تنقل اصواتهم يكونون عسكر او بمعنى آخر ما يصوتون بالفرعي
يعني مع احترامي لهم وجودهم وعدمهم واحد بالرئيسي !!
وهذا مو تقليل من قدرهم .. لكن قانون البلد يمنع العسكرين من التصويت
كلنا ندري ان الكندري قاعد ينقل اصوااات .. ويقال انه نقل اكثر من 500 صوت !!
طبعا هالشيء من حقه والمثل يقول "كلن ينفذ بذراعه" لكن الكندري ينقل اصوات تفيده بالرئيسي
وربعنا ينقلون اصوات للفرعي وبس !!
اللي أتمنى انه يصير واطبقه اللجنه القادمه بالفرعي
إن اللي ما يصوت بالرئيسي ما يصوت بالفرعي ... عشان كل الأعضاء ينقلون
اللي يفيد القبيله مو اللي يفيد مصالحهم الشخصيه .. !!
وأتمنى إني اشوف رايكم بالموضوع ؟




اللـــه يجمعكم على طاعته ولا يفرقكم !

[سعد الصميل]

كلام سليم وإقتراح ممتاز

لاهنت ياراعي العشوه

على الموضوع المميز

وبإنتظار ماتتحفنا به من مواضيع مميزه

كل التقدير

[مستشارك]

راي سديد ياراعي العشوا سدد الله خطاك

[عناد العجمى]

بسم الله الرحمن الرحيم
من وجهت نظرى اعتقد للعسكرى الحق التصويت بالفرعى ومايصير نحرم اخونا العسكرى من حق التصويت بالفرعى لأن الفرعى خاص بالقبيله ومايصير عشانه عسكرى نحرمه من اعطاء رايه . يا خوان كل دول العالم او اغلب دول العالم يحق التصويت للعسكرى حتى بختيار الرئيس.
وحنى بالكويت ماكتملت الديمقراطيه عندنا صحيح جزء منها أكتمل هو تصويت المراه وترشيحها لاكن لن تكتمل الا بتصويت العسكريين حتى تصبح ديمقراطيه كامله .
وبعدين أعتقد العسكرى ماراح ينقل بروحه مع السماح للمرأه بالتصويت !
وفى عسكريين يسجلون مع بدأ الأنتخابات راح يكون لهم حق التصويت مثال .
انا شخصين اعرف عسكرين وعدهم ثلاثه أثنين منهم بيتركون السلك العسكرى بتاريخ 11_9_2006 لسبب الدراسه والثالث تقاعد الله يعطيه طولت العمر .
بعدين يا خوان لا ننسا فى لنا اخوان ناوين يدشون الفرعى وهم عسكريين من الجيل المتعلم ولهم ذكر طيب سواء عند العجمان او غيرهم هل نحرمهم من دخول الفرعى ؟
وبعدين لاننسا أن للعسكرى الحق التصويت بالجمعيه .
وعتقد أن طبق القرار هذا عدم تصويت العسكريين بالفرعى راح يفهمه البعض ان القرار ضده ويستهدفه شخصينا وراح يقول شمعنى تطبق السنه هذى ليش مو من قبل ؟
وعشان نكون يد وحده وخوان ونكون قلب واحد مع اللى ينجح بالفرعنى لازم نتبتعد عن اى شبه لو أنها صغيره.
وصدقونى العسكرى ما راح يسجل بروحه مستحيل بعد حصول المراه على حق الترشيح والتصويت ..
وشكراا لكم وهذا راى الشخصى والله يوفق الجميع

[راعي العشوه]

سعد الصميل
لاهنت على المرور يا بو محمد
وبيجيك الخير إن شاء الله



مستشارك
مشكور على المرورك
وعلى كلامك الطيب ... يا طيب


عناد العجمي
شكرا على مرورك
وعلى رايك اللي اتقبله برحابة صدر
بس احب انوه لشغله ان الفرعي اللي قصدته
هو فرعي مجلس الامه مو الجمعيه
يعني مثال بسيط
كل عضو قاعد ينقل اصوااات .. فيهم اللي ينقل 10
وفيهم اللي ينقل 200 ... وكل واحد واللي يقدر عليه
يعني بعطيك عدد تقريبي او مثال مو شرط يكون عدد صحيح
ان الاعضاء كلهم نقلوا ما يقارب الـ 1000 صوت وغالبيتهم عسكر !
يعني نقول اكثر من النص مثل 600 او 700 صوت !
وهالاصوات ما تفيد "العجمان" بالرئيسي ... يعني مالها داعي
ان شاء الله تكون الفكرة وصلت لك

[عناد العجمى]

والله ادرى أنك تتكلم عن فرعى مجلس الأمه موب الجمعيه
وش مشكله لا حولت 1000 عسكرى بالمقابل 1000 صوت نسائى او اقل نقول 600 صوت مثال.. لين طريقت التسجل بالبطاقه المدنيه تلزم تغير العنوان لجميع الأسرة الاب وزوجته وابنائه . نقول حولنا 1000 عسكرى فيهم 800 متزوجين أستفدنا 800 صوت نسائى
وعلى فكره العداد هذى تقديرية .
نفس طريقت الجمعيه اللى انا اعرفه أن النساء يصوتون وبكثافيه .
وعلى الفكره اللى بحول يدرى ويبخص انه العسكرى راح يفيده بالفرعى ولاكان راح يستفدون منه العجمان بالعام بصوات اسرة العسكرى .
بختصار وضع العسكرى غير عن السنوات السابقه
والله يكتب اللى فيه الخير

[راعي العشوه]

كلامك سليم
لكن لو فيه قانون يمنع
تصويت العسكري بالفرعي
كان تم نقل 1000 مدنيين ويصوتون
بالفرعي والرئيسي

[عناد العجمى]

والله يبن الأجواد صدقنى اللى يبى ينقل
أصوات أكيد ببدى المدنى على العسكرى
هو عارف المدنى راح ينفعه بالفرعى والعام .
واللى يتهيا له بينقله سواء مدنى ولا عسكرى والحين المراه تصوت يعنى أخونا الكريم العسكرى وراه اصوات بالعام

والله يوفق الجميع بدون أستثناء

[ديمقراطي]

الانتخابات الفرعيه مجرمه وتصويت العسكري مجرم
والفرعي من صالح القبيله وتوحيدها
والعسكري فرد من افراد القبيله
والعسكريين هم اخواننا وابناء عمنا ولهم الحق بالتصويت الخاص بالقبيله
ولا اعتقد ان العسكريين يتعدون نسبة المدنيين
مجرد رأي

[الحذران]

شكرا الاخ راعي العشوه كلام صحيح لكن يبقي
الراي الاول والاخير للمرشحين انفسهم
لاهنت علي طرح هذا الموضوع الشيق
ولي عودة

مجرد راي