هذي قصيده مع الرد اعجبتني وصلتني على الايميل لشخص اسمه ولد ارامكو وقامت وحده مسميه نفسها بدويه تربي عنز بالرد عليه وعذرا على الاسم لكن حفظا للحقوق
مرت اللـي كنهـا بـدر التمـام
من ورا السواق فـوق (البنتلـي)
فاخرة .. والظن من راس السنام
مترفة فـي ضـف بيـت معتلـي
يـوم وقفنـا وجمعنـا الـزحـام
بالعنـا دارت مرايتـهـا عـلـي
وشدت الصـدر بنفَسهـا للامـام
والزجاج أرختـه.. أمـر تفتلـي
وحركت من غيهـا راس البهـام
وأشرت بالهمس .. عين البنت لي
وناظرتني .. نظرة ساقـت هيـام
كنها تقول : بـأشري بعت لـي ؟
ما نهاها الخوف عن فـك اللثـام
دمت لي يا مبتسمهـا دمـت لـي
بارق .. تقول مسلـول الحسـام
ومنعش .. في كـل ذوق ممتلـي
باغية مرام .. يا بعـد المـرام !
يا هواها .. كف .. لو لمّحت لـي
ويا لاشارة وقفـي ستيـن عـام
وضمنا يالدرب لو سمحـت لـي
وانـت ياسـوّاق عاليـة المقـام
اشهد ان عمتك صابـت مقتلـي
همي المـوت وهـواك الابتسـام
الخلي مـا هـوب مثـل المبتلـي
وجاء رد البدويه
يا سلام الله على الشاعر سـلام
شاعـرٍ بلثـام بنـتٍ مبتِـلـي
جعل ما تبلى بغالـي يـا همـام
و جعل عينك من حزن ما تهملي
كلمـةٍ منـي وخذهـا بإحتـرام
و الأخـوة بيننـا هـي مدخلـي
سامحك ربي علـى ذاك الكـلام
وش بلى الشّعار قولوا يا هلـي
شِفت لك بنتٍ تناظر في الزحـام
(من ورى السواق فوق البنتلي)
قلت بأنه بنـت عاليـة المقـام
مترفه مـن بيـت عـزٍ تنهلـي
وقلت بأنك ذبت في دنيا الهيـام
يوم عينك جَتْ بعينه يـا خِلـي
قلت لكنّك نسيـت مـن الغـرام
وصف واحد لجل قافـك يكملـي
قلْ بعد ما تستحي والشـر قـام
في عيونـه كـل فتنـه تعملـي
بنت لو تعرف وجوب الاحتشـام
ما تِقِز بلا حيـا خالد و علـي
ترسل النظره على العالم سهـام
علَّهـا تلقـى بقلـبٍ مدخـلـي
لا ... وفكتْ فوق من هذا اللثام
استحي يا بنت حـوا و اخجلـي
و أنت لو تنظر و أنا بدويه للأمام
كان ما قلبك غـدا يغلـي غلـي
غِض يا خونا النظر وسط الزحام
حتى ما تُبلـى بسهـمٍ مُرْسلـي
آآآه ليتك قلت له نصح و مـلام
استحي يا بنت .. كُفي و اعقلي
النظر فتنه و أشد مـن الحسـام
ضربته لو صاب جَت في مقتلـي
النِدا مـن قلبـي لبنـت الكـرام
صِدي بالنظرات عنهم وابخلـي
لا تِقِزي غير زوجك يـا سـلام
ما حلا (قَـزّه) مبـاح امحَلَّلـي
و أنت يا سواق عاليـة المقـام
قـلْ لعمتـك (الخفيفـه) تثقلـي
قلْ لها (ماما) ترى والله (هرام)
(مافي كويس) ترى اللي تفعلـي
عين (مال انته) أبد (مافي) تمام
(كل مافي يشوف) رجل يطلطلي
(بابا) نايم ،لكـن الله مـا ينـام
احذري ( ماما ) عن الله تغفلـي
وانشاء الله اعجبتكم القصيده
23-05-2006, 11:16 PM
العرض العادي
