من قصايد بدر الحويفي الحربي

[الحبيب]

اللـي فقدنـا مـن نبـات ونواويـر 00 ماهو على المولى صعيـب رجوعـه

الله مـن قلـب هجوسـه طوابـيـر 00 ميعادهـن بيـن العتيـم وهجوعـه

قالـوا تفكـر قلـت عنـدي تفاكيـر 00 أشوف شـئ مـن خطانـا وقوعـه

قلـت الحقيقـة يالوجيـه المسافيـر 00 قلبي ليـان وشـاف شـئ يروعـه

شفت الجفاف مكسر القشـع تكسيـر 00 والنفس ماهي من قضاء الله جزوعه

وادي الرمة جوه عجـاج ومعاصيـر 00 يبسـت جراجيبـه وماتـت قشوعـه

حمضه عليه من السوافـي عثاميـر 00 يا بعـث الأمـوات تبعـث جذوعـه

مدهـل مجاهيـم تـلاد ومغاتـيـر 00 وحمـر مرابيهـا هدايـد افـروعـه

يوم الوسـوم تنثـر الوسـم تنثيـر 00 والعشب ينبـت ماتكامـل اسبوعـه

ويوم القلوب نظـاف مايقـف الخيـر 00 يطيـح وسـم ولا تقطـع تبـوعـه

واليوم وبل الغيـث مثـل الطباشيـر 00 قامـت تلـوث بالمناقـع انقـوعـه

الشكـوى لله صـار بالجـو تغييـر 00 دايـم كتـام وغيـر الجـو نـوعـه

واصل الخطا منـا تهـاون وتقصيـر 00 قليـل مـن يحسـن لربـه ركوعـه

نشقى ورى الدنيا وهي مابهـا خيـر 00 والموت يدنـي للنفـوس البشوعـه

وعنـد المحاسـب ماتفيـد المعاذيـر 00 ينشف جما العاصي وتطفي شموعـه

واللي غناته سحـت ومـوال تزويـر 00 له ساعـة مـاذاق حلـوه يزوعـه

يـدري بهـا لـودعـوه الحفافـيـر 00 والقبر ضكه مـع محانـي ضلوعـه

فـي ساعـة مابـه تقـدم وتأخيـر 00 يفقد بها الرحـال مجالـس ربوعـه

وعن ماعمل مالـه مفـر ومعابيـر 00 ما ينفعـه جمعـه وهيبـة جموعـه

قدامـه الجنـة وقدمـه زمهـريـر 00 والله يعلـم ويـن يكتـب نجـوعـه

يارب تهدينـا علـى حسـن تدبيـر 00 نطلب عظيم الشان خوفـه وطوعـه

يالله يــارازق عــوج المناقـيـر 00 ياكافـل رزق النـفـوس القنـوعـه

يامـن بتقديـره تكـون المقـاديـر 00 ياسمـع الداعـي وخالـق سموعـه

تزيـل شـدات السنيـن المعاسـيـر 00 يامن لك المسلـم يوجـه خشوعـه

تمدنـا يـارب رحـمـه وتيسـيـر 00 غيـث يعـم المملكـة فـي نفوعـه

يارب من قل المطـر نشفـت البيـر 00 نشف الثرى والدرع ماتـت زروعـه

ومات الخشاش وضاق في عشه الطير 00 يشكي علـى رب السمـوات جوعـه

والبـل مصارفهـا نخالـه وشعيـر 00 واحوارها بالشبـك تـذرف دموعـه

مثل السجين يلـوح بيـن المواصيـر 00 والا البهايـم للمـقـدر خضـوعـه

حاطت عليه اذنـوب نـاس مباصيـر 00 حاله صخيـف وحنـة أمـه تلوعـه

ذنـب الأوادم لـه عواقـب وتأثيـر 00 والعمـر فتـرة والحيـاة مخدوعـه

وحنـا بشـر مالله خلقنـا تصاويـر 00 واللـي يخـاف الله يطبـق شروعـه

والله محذرنـا عـن الكـذب تحذيـر 00 والحسـد والغيبـة وكبـر وميوعـه

تــــحـــــيـــــاتـــــي
وسوف اضع بعض من قصائد الشاعر لاحقا

[عيد بن شدقان]

نشقى ورى الدنيا وهي مابهـا خيـر =والموت يدنـي للنفـوس البشوعـه
وعنـد المحاسـب ماتفيـد المعاذيـر =ينشف جما العاصي وتطفي شموعـه

يالله انك ترحمنا برحمتك
وصح السان الشاعر/ بدر الحويفي الحربي


ولاهنت يالحبيب
اختيار موفق
الله يعطيك العافيه

[الحبيب]

ولاانت يابن شدقان


شكرا على المرور

[عاشق المجاهيم]

السلام عليكم ورحمة الله وبركاته
اخي الحبيب
صحححححح السانك ولسان شاعرها
وبيض الله وجهك على هذه القصيده
الجزله يالسنافي والله لايهينك على
كل حال وننتظر جديدك الرائع