وا طيري اللي ماضي له تجاريب =للطيب في وجهه تشوف المواري
طير كفوفه من فعوله معاطيب = صاد المها من عقب صيد الحباري
ماص يفكك مغلقات اللواليب = طير السعد طير من الريش عاري
ما فيه شك ويتبع الطيب للطيب = ذلقة سنان ماضي الفعل فاري
مشعل ندى في عاليات المراقيب = عليه يسري بالدجى كل ساري
أبعد من النسرين بعده عن العيب = وأن غلى سعر الطيب للطيب شاري
محفظ ما فيه شك ولا ريب = شبل ترعرع بين نمر وضاري
يعرف ليا كبرت عليه المواجيب = وباللي خفا كنه عن الغيب داري
وأن زاودونا بالفعول الأجانيب = حنا بذحر الوايليه نماري
للوارد الظامي فتحتوا مشاريب = وكرسي شريعتكم سيوف هواري
يامير بشكي لك فعول الرعابيب = من واحد دايم لعقلي يباري
منه الضماير يابو خالد مصاويب= طفل سلب مكنون عقلي جهاري
أنوح نوح الورق وأقنب كما الذيب = وعليه جار لي من الحب جاري
الميت مايصحى على شقة الجيب = ولا ينفعه بالقبر سفك العباري
اتبع دروب العز لوهي مصاعيب = ان شفت من ربعك صدود ونكاري
والمبغض المقفي كثير العذاريب = لا تتبعه لو هو جديد الأثاري
والغبن يرث بالفتى واضح الشيب = وعند العفون الطيب ماله محاري
الناس تامن من رجال غواليب = وصار الخطر من بايهين الذراري
على الحرار محرمين المراكيب = وحطوا عليهن الحدا والسباري
والعبد مزبانه على عالم الغيب = ويوم الحشر كل الخلايق عواري
ارجيه لو الخلق مني مغاضيب = وبأمره تهب الكاينات الذواري
وسلامتكم ......
الأمير الشاعر / محمد السديري
06-12-2004, 04:41 AM
العرض العادي
