.
هذي قصيده للشاعر
عبدالله بن خرمان ال ضاعن
رثاء في الشيخ
منصور بن مانع بن جمعه ( رحمه الله )
بسم القدير اللي مقدر كل قدرن باقتدار = المنفرد في علم ما ماتخفي دواليب الصدور
واللي مدون في صحايف خلقه اجال العمار = الكل فاني يالله برحمتك يالبر الغفور
بسمك اببدا والصدر حزنه ذالايام الشعار = والعين دمعتها على المحجر من الضيقه تحور
وقفت لي وقفة تأمل وندهاشه وفتكار = في ذالحياه اللي رحاها الصلف مايعجز يدور
ولا يهمه من دخل وسطه هم اصغار او كبار = وهل هو نبي ولا ملك ولا اميرن ومأمور
ولقيت ذالدنيا الحقيره ساحتن فيها مطار = وهناك باب اللي لفا وهناك بابن للعبور
والناس فيها ضايله مابين فرحه ونهيار = وفي حيرتن من امرها منهو يودع او يزور
وهذاك مقبل يجهله امره وفي اية مسار = بيسير معه وياترى هل هو نكد ولا سرور
وهذا مودع وده يعود ولا يملك خيار = ولا معه ياكود ماعمله من اسنين وشهور
ثم دار راسي واختلط فكري وسار الدمع سار = واصبح كما سيلن على الخدين تنهله الطيور
وذكرت شيخن فاقده حتى المواليد الصغار = كساب قولة والنعم في كل وقت وكل دور
ترثيه قومن كان يسندها لمن الوقت جار = وترثيه ديره لو ماربي ثم هو جاها دبور
مخفض جناحه وافي الآشبار كاسيه الوقار = متعهد بكفل الإرامل واليتامآ والبزور
ويمنا نديه مالحقها من البخل ذرة غبار = ولا منه اعطا مدته تبني لطالبه القصور
مايعطي الا من السنام ولاهو يحب الفقار = فطره من الله يوم شافه حامد لوجهه شكور
كريم سبلا من على الكايد مقابيس وفنار = منهو يبي درب الشكاله يجعل اله الدرب نور
به حكمتن تصعب على العراف واصحاب القرار = راين على الاريا وشوره ماهو بيخطي النحور
من دون ربعه لاحتمى الميقاف ماعنده حوار = ماعنده الافعلن يكسر مصاليب الصخور
هذاك ابن جمعه سليل المجد رمز الافتخار = منصور ابن مانع ليا كبرت معاصيب الامور
انشهدنك اكبر فقيده دون شكن او غرار = يالوالد القايد رفيع الشان يانمر النمور
جعل الغيوم المعتمه ترعد وتبرق بالشرار = ومن حجمها المبهر تزبر مره ومره تثور
وتصير ليلن مدلهم يسير في وسط النهار = ولا تحل الا على قبرن مهو مثل القبور
ثم ينهمر ماها الين الناس ماتلقا العفار = ويصير قبر الشيخ ابن جمعه بساتين وزهور
وفالآخره يجعله ربي مع نبيه فالجوار = ويجزاه جنه من جنان الخلد وانهارن وحور
وقال المثل مامات من ورث من اخلافه حرار = انشهد انه صادق وهذا دليلن مايبور
هذا انت يامانع تعلى وازدهارن فازدهار = ولو جارت الايام ياكحيلان لايمكن تجور
انت الذرا لاصابنا صايب وصرنا فنحدار = من فزعتك نرقا سنود الين ننتاش البدور
فيك الحميا والشكاله ماهو بطبعن معار = قصرك لنا روضه ليامنها تكستنا الدهور
المنهدم تجعله من طيبك وجاهيتك عمار = ولا يهمك فالخساير ياعسا ايامك عصور
يامكرمن للجار لو هو من طواريش البحار = ولو يزهمك ماتتخر الا تسارع فالحضور
ويامزبن الجاني ويامانعه من سو الخطار = مجلسك يالقرم الموقر دوم داهل ومعمور
فيه البخور اجلال للضيفان والزوار دار = وفنجال كيفن زعفرانه بنته تزها البخور
عسا عدوك يالشلي مانع محله للدمار = وشربته تصبح من بعد ماهي زلالن زل خور
وترى اعضداك الشمخ الذربين ذيبان الغدار = مافيهم اللي يلحقه مني شكوكن اوقصور
عساكم اتجازون قصر امير ربعه بالعمار = لانكم كما جل الركاب اللي مايلحقها فدور
وترى اللذي ينظر حداكم بفتهام وبقتدار = يطلق ان منصور ما قفا ولا زار القبور
انتهىا
صح لسانك يابو محمد
وعسى الله يرحمه ويغفر له ويسكنه فسيح جناته
24-09-2011, 11:03 PM
مرثيه / في الشيخ منصور بن جمعه ( رحمه الله ) للشـاعر / عبدالله بن خرمان
[/quote]
العرض العادي
