((( معـاناة شبـاب الكويـت .... فئـران أم قـطـط ؟؟؟))) ... ارجو الدخول

alaajm · #1 10-10-2009, 02:29 PM

السلام عليكم

الموضوع باين من عنوانه

في كلمة سببت عقدة لشباب الكويت دايم يسمعونها أو يقرونها لما يطلعون يتمشون او يستانسون

اللي هي

(((( لوسمحت ممنوع .. عوائـل بس ))))

أو لافته أو إعلان مكتوب عليه

((( للعائلات فقط )))

الشباب قالوا لا حول ولا قوة

يالله شنسوي خل نروح نجتمع عند الربع بالدوانية

بعد ما اغسلوا ايدهم من بعض المجمعات او المنتزهات إللي (( للعوائل فقط ))

راحوا الشباب يجتمعون بالدوانية ... لعل وعسى يستانسون من سوالف ولعب ورقة ولعب بلاستيشن

فجأة جاتهم فرق الإزالة بالبلدية .. وزالت دواوينهـم ..

الشباب تشردوا .. لا مجمعات ولا منتزهات ولا دوانيتهم ..

يبون يجتمعون ويستانسون ويشوفون بعض

قالوا مشينا نروح بـر ( الوفـرة ) أو بـر ( جبـد ) .. نبي نقعد على الطعس ( الرمل الناعم ) وننزل عزبتنا ونقعد .. في البراد والنسناس الحلو

فجأة ولا يشوفون دوريات مارة من عندهم .. كملوا سوالف وشرب شاي وقهوة ولا الدوريات راجعة لهم .. ونزلوا الشرطة

يلا يا شباب شيلوا اغراضكم .. ممنوع التجمعات .. يلا خلال 10 دقايق مانبي نشوف ولا سيارة يلا

قالوا الشباب ... الله كريـم .. إنطردنا من دوانيتنا .. وانطردنا من البـر

قالوا مافي الا المقهى أو الشيشه

راحوا الشباب المساكين ... أو المشردين .. للمقهى الفلاني

يبون يستانسون ... قعدوا على الطاولة .. شيشه وعصير أو شاي كشري .. وسوالف

أو يتابعون مبارات .. ريال مدريد × برشلونه أو تشلسي × ليفربول

ومندمجين .. ومتابعين .. ويشجعون ومستانسين

أو قاعدين يلعبون بلاستيشن

طبعاً كل هذا بعد ما حرموهم من دوانيتهم اللي كانوا يلعبون فيه ويتابعون المباريات

رغـم ذلك

قررت الداخلية إنها تضيق خلق الشباب وتحكرهم في بيوتهم نفس الحريم

يعني ... من بيتك الى دوامك ومن دوامك الى بيتك بسسسسس

بقرارها اللي ماله داعي اللي هو

إغـلاق المقاهـي في منتصف الليل يعني الساعه ( 12 مساءً )

بعد ذلك كله ... وكل اللي قريتوه فوق

وين تبون الشباب يروحون

هل يتسكعون في الشوارع .. كل واحد قاعد على كبوت سيارته

ولا اربعه قاعدين على كبوت سياره ويلعبون ورقة

أو يروحون يقعدون على شاطئ البحر ..

وانا واثق تماماً إذا قعدوا على البحر .. نزلوا زوليتهم .. وشاهي والقهوة .. وقعدوا

راح تطلع الداخلية قرارها الجديييد

(( تمنع التجمعات على شاطىء البحر بعد الساعه ( 12 مساء ً ) ))

آخيـراً

اللـي أنا أبـي أوصلـه

هـل

شبـاب الكويـت

((( فـــئـــران )))

أو

((( قــطــاوة )))

ممكن يكونون فئـران .. لأنهم قاعدين ينطردون من كل مكان يجتمعون فيه

وممكن يكونون قطاوة .. لأن ماعندهم أماكن يقعدون فيها ويجتمعون ...

فـ مالقوا الا الشارع .. يتسكعون ويتمشون فيه....

اخيراً

نناشـد أعضـاء مجلس الأمة

نناشد صوتنا

بأن يجدوا حلاً لهذه القرارات الغريبه والاستفزازية للشبـاب

وآسف على الإطالة

أخوكم وإبنكم

سـالـم الملبــز

((أقدار)) · #2 10-10-2009, 02:33 PM

حجز أول 1

لا محشومين والله يعينكم أن شاء الله

ماكوا ألا تأجير الأسطبلات صج بعيده بس الله يعين

ههههههههههههههههههه

يسلمو على الموضوع الحلو

alaajm · #3 10-10-2009, 02:39 PM

شكراً على مرورك

وردك الكريم

حتى الاسطبلات صارت اغلى من الشاليهات

الله كريم

((أقدار)) · #4 10-10-2009, 02:41 PM

اقتباس:

المشاركة الأصلية كتبت بواسطة ســالـم بن ملبــز

شكراً على مرورك

وردك الكريم

حتى الاسطبلات صارت اغلى من الشاليهات

الله كريم

العفو

أختك : أقدار

والله كاسري نخاطري

بس شنقول سوى قطيه بينكم

فالح بن مشوط · #5 10-10-2009, 02:52 PM

السلام عليكم ورحمة الله وبركاتة ..

أخوي سالم العالم كبرت الموضوع ..

اولا : جيبلي مجمع بالكويت او منتزه ممنوع دخول الشباب مافي الا كويت مجك بس بالويك اند يصير عوائل وباقي المجمعات مفتوحة للشباب وأي منتزه تلقى يوم واحد بالاسبوع للعوايل وباقي الا يام مفتوح للشباب ...

ثانيا : سالفة الدوواوين // الدواوين موجوده بالشارع الواحد تلقى 3 دوانيات على الاقل مفتوحة يوميا وانت حسستني من كلامك انه معد في دوانيات نهائيا ..

وبخصوص خط الوفره ما منعوا التجمعات ألا اذا كان في تقحيص اما اذا قعدت ابمكان ما حولك تقحيص ما راح يمنعونك وهذا حنا يوميا بالوفره ولا احد يجي يكلمنا ولا يقولنا شي...

ثالثا: المقاهي لا تعليق لأني مو من مرتادي المقاهي ...

ارجوا انك تتقبل كلامي بصدر رحب وهذي وجهة نظري انا يمكن تكون صح ويمكن غلط ..

ولاهنت عموما على طرح هذه القضيه ...

alaajm · #6 10-10-2009, 02:54 PM

عفواً اختي / الاقدار

لا انا اقول للشباب المساكين

روحوا اقعدوا بمقاهي المطار

محد يقدر يسكرها

ولا تباعدون .. يجي قرار بعد محد يقعد فيها الا اللي يبي يسافر وينطر طيارته

كل شي جايز

ترى اغرب القرارات عندنا بالكويت

بيحطونها بموسوعة (( هل تعلم ))

alaajm · #7 10-10-2009, 03:03 PM

اقتباس:

المشاركة الأصلية كتبت بواسطة هـيـبة مـلـكـ

السلام عليكم ورحمة الله وبركاتة ..

أخوي سالم العالم كبرت الموضوع ..

اولا : جيبلي مجمع بالكويت او منتزه ممنوع دخول الشباب مافي الا كويت مجك بس بالويك اند يصير عوائل وباقي المجمعات مفتوحة للشباب وأي منتزه تلقى يوم واحد بالاسبوع للعوايل وباقي الا يام مفتوح للشباب ...

^
^
انا معك في ذلك ممكن اني بالغت ولكن يوجد مجمعات تمنع الشباب

ثانيا : سالفة الدوواوين // الدواوين موجوده بالشارع الواحد تلقى 3 دوانيات على الاقل مفتوحة يوميا وانت حسستني من كلامك انه معد في دوانيات نهائيا ..

^
^
الدواوين المعنزلة (( مثل اللي انزالت )) تفرق عن الدواوين اللي انت تقصدها

في ناس ماترتاح بدواوين اللي داخل البيت .. من ناحية الازعاج ... أو بعض دواوين البيوت
اللي مدخل البيت واحد .. يدخلون منه رواد الدوانية واهل البيت من نفس الباب
أو .. بابين متجاورين في البيت احدهم للدوانية واحدهم للبيت

فـ بعض رواد الدوانية .. او اصحاب الدوانية مايرتاحون للدواوين الي انت تقصدها اللي هي داخل البيت

فرق شاسع بينها وبين الدواوين المنعزلة خارجاً .. مثل اللي انزالت

وبخصوص خط الوفره ما منعوا التجمعات ألا اذا كان في تقحيص اما اذا قعدت ابمكان ما حولك تقحيص ما راح يمنعونك وهذا حنا يوميا بالوفره ولا احد يجي يكلمنا ولا يقولنا شي...

^
^
اما في هذا .. انا ضدك .. مافي لا تقحيص ولا هم يحزنون .. والدليل في الأيام العادية مو الويك اند
اللي يجتمعون فيها شباب التقحيص... وانت قاعد على طعس تمر دورية رايحه بطريقة .. شوي ولا هو راجعلك ويتكلم بالمايك .. ((( حرك انت وياه .. ماحركت .. سفط ونزل قال يا شباب اثباتاتكم ..
ويلا شيلوا اغراضكم وحركوا ممنوع التجمعات )))

ثالثا: المقاهي لا تعليق لأني مو من مرتادي المقاهي ...

انا ايضاً مو من مرتادي المقاهي ولا احبها... بس االلي اشوفه استفزاز للشباب وظلم

المقهى .. اللي مخالف .. خالفه او سكره او اتخذ اي اجراء يلوق لك

اما المقاهي العادية .. لا وظلم وقطع ارزاق

ارجوا انك تتقبل كلامي بصدر رحب وهذي وجهة نظري انا يمكن تكون صح ويمكن غلط ..

^
^

بالعكس .. وجهة نظرك ورأيك وانت حر فيه .. وانا ما كتبت الموضوع الى لتبادل الأراء
و وجهات النظر

ولاهنت عموما على طرح هذه القضيه ...

^
^

مرحبا بك اسعدني مرورك

((أقدار)) · #8 10-10-2009, 03:04 PM

والله أذا صدق ممنوع ومثل ماقلت الله يعينكم

بس صح اخوي هيبه ملك ذكرني ان حنا ماعندنا سالفه ممنوع الشباب بس انتوا ادرى والله انا ماادري

واذا صدق الله يكون بعونكم

فهيد بن سالم · #9 10-10-2009, 03:12 PM

السلام عليكم ورحمة الله وبركاته

سالم كلامك فيه شي من الصحه

المجمعات عندك لفنيوز أفتر فيها لين تعجز لكن لا يطالعك شرطي يقول شعندك تمشى تغازل لأن صار معي هالموقف وبغوا يحولووني ومن بعدها شي أسمه مجمعات ما أروح

المقاهي يا سالم أغلبها مشبووه وريحتها موشي تكرم

والوفره على قولتك دايم تصير معنا كاشتين تجي الدوريات تقول يالله شل أغراضك نقول ليه يقوول ممنوع التجمهر الاستعراض وين وحنا وين

الأسطبلات الأسطيل دوانيه ومطبخ يمكن 270 دينار فالشهر أجر شقه أبرك لي

والدواوين مفتووحه لكن الله يعينك على الشيبان

والله لا يهينك على الموضوع الطيب

شاكر لك

الاعرابي · #10 10-10-2009, 03:17 PM

انا عندي قرار بعد (ياكثر القرارات )

الواحد ينام بدري ويقوم على صلاة الفجر ومن طلعت الشمس كل شي يفتح عندنا وفي النهار احلا ,,وخصوصاً الجو بارد وحلو والشتاء على الابواب __وابشرك نزلوا سعر ترخيص المخيمات من 500 الي 100 دينار

وبعدين اغلب القرارات لمصلحتنا ,,,بالنسبه للعوائل حتى لو يسمحون لنا في الدخول ماراح ندخل __على شان العوائل والحريم يأخذون راحتهم الا اذا الواحد معه اهله يقعد معاهم

وقرار الوفرا __على شان التقحيص وكل يوم قالب واحد ولا داعم له ناس

والقهاوي انت عارف ليش __اكيد قريت اللي صار في جريده الوطن __وانا معاهم في هذا القرار

وبالنسبه للاسطبلات واستراحت كبد __انا معك صارت اسعارها اغلا من الشاليات اللي على البحر

وان شاء الله يعجبك حلي اللي ذكرته في البدايه__تسوون مثلي انام بدري واقوم صلاة الفجر ولا انا في النهار كله وفي الليل حدي الساعه 10 او 11 وانام __واذا علي دوام اداوم وباقي النهار عندي كله

وسلامتك