السلام عليكم ورحمة الله وبركاتة
مساكم الله بالخير يا أعضاء شبكة العجمان
بما ان التغطية قديمة أستقبلوها كما هي
هذي أمسية لكل من
الشاعر / جراح بن فنيس العجمي
والشاعر / ناصر بن قزيع السهلي
في عرس آل حبيان
كنت حاضر العرس وصارته الأمسيه وتم تغطيتها / لكن أني سجيت منها ، وبما أن اخونا جراح بن فنيس مشارك في برنامج نجم القصيد ، أجل خيره أني سجيت منها وهذا وقتها 
عريف الأمسية / خالد بن دربي
قصايد الشاعر / ناصر بن قزيع السهلي
الشاعر / ناصر بن قزيع السهلي
القصيدة الأولى
الله يصبرني على الاوهام والليل الطويل=والله يزيل العله الي مالقيت حلولها
راح الكثير ومابقى ياصاحبي غير القليل=والي على اصولها تبقى على اصولها
لاصرت ماتقدر تحط اكيد ماتقدر تشيل=والكلمه اللي تستحي منها لزوم تقولها
كنت احسبك صاحب واقدر خوتك واثرك هبيل=ماتحشم النفس العزيزه والعشم من حولها
طوفتها لك والكريم يجود لاشح البخيل=والخوه الي ماوراها خير وش محصولها
عمر الزمن ماغير الطيب ولاغير الاصيل=ولاكل حاجه لابغيت اطولها بطولها
لاتحسب انك الاصمعي ولا الفراهيدي خليل=ملكتلك مهره وناشبت العرب فخيولها
اقنع وخلك واقعي واترك كلام المستحيل=والمشكله لاجنبت جنب وخل حلولها
من عز نفسه عزته ومن ذلها يقعد ذليل=والناس تذكر من جمايلها وطيب فعولها
لولا المبادي والقيم والصيت والفعل الجميل=ماشفت خلق الله تشيل الحمل فوق حمولها
حنا على وضح النقا ولانت من تحت الشليل=والسالفه ماعاد تعرف عرضها من طولها
سبحانه الي مدنا بالدين والطبع الفضيل=وسبحانه الي وضح الصوره وبين زولها
القصيدة الثانية
لا تساوم القلب ولاطول علي الانتظار=ماعاد باقي بعد فرقاك شي افقده
امر بيتك وانا ادري مابه الا جدار=ماهوب يحكي ولايوحي كلام اقصده
اجيه والد عيني من يمين ومن يسار=واراقب الناس والشارع وعيني برده
واتخيل انك هنا لوك تركت الديار=ويامقرب الشوق ولا الوصل يامبعده
هذا كلامي ولك حرية الأختيار=والقلب عندك اذا صدقت ولا انشده
ان كان وجه الحقيقه مثل وجه النهار=فالرجل يجزا مع الايام حسب جهده
من لا اقتنع بالنصيفه مالقى الإنتصار=الفاشل بيحقره والناجح بيحسده
من لاعتبر من خطاه مشاهدك له دمار=ماهوب معطيك حاجه لوها في يده
ولاشك لولا الخطا ماكان فيه اعتذار=وياحي من يعتذر من شي مايقصده
الشاعر / ناصر بن قزيع السهلي
القصيدة الثالثة
دام الصفاوه فالقلوب البيض فالدنيا بخير=ولولا الصفاوه فالقلوب انا اشهد انها خاربه
الوقت يمشي والحمل خله على ظهر البعير=راع السنام المنفهق الي طويلن غاربه
ماني بداري وش جرى ولاني بداري وش يصير=والي ماهي متساويه يمكنها متقاربه
اخذت لي عبره وانا توي على الدنيا صغير=والادمي يعرف من الدنيا حسب تجاربه
ماخاب رجلن يستشير ولاندم من يستخير=والي ماغبر شاربه ماهو مدسم شاربه
ومايذبح الرجال غير الفقر والحظ العسير=والي جمعها كلها مايندرى وش صاربه
القصيدة الرابعة
لاعاد تنشد عن الاوضاع ياعبيد=مافيه داعي اقول القول واعيده
الشاعر الي سواتي شاعرن جيد=اليا بغاله قصيده جابها سيده
ماني معارض هل الساحه ولا مئيد=الله يوفق ويهني سعيد بسعيده
بيت الكرم والنعاره قدمك مشيد=والرجل من دون عمره يظهره جيده
يكفي ليا جيت ذودي كني معيد=يتوق قلبي على الحرشا وعلى عيده
وشعيل قيده وزانه ماهو مقيد=ماهوب فيدي ولافيدك ولافيده
الشاعر / جراح بن فنيس العجمي ، عريف الأمسية / خالد بن دربي ، الشاعر / ناصر بن قزيع السهلي
قصايد الشاعر / جراح بن فنيس العجمي
الشاعر / جراح بن فنيس العجمي
القصيدة الأولى
تمدح الشعار وتشوش القبايل=والشعر وهبه وانا امثل قبيله
مرحبا يا عزوتي والشك زايل=ارحبوا يا اهل الفعول المستحيله
كل يامي لا طنخ يسوي الهوايل=كبد شيخ القوم ما تشفي غليله
بالفجر والليل والا بالقوايل=من تعدى حدنا والله ان نزيله
قد حمينا الدار بظهور الاصايل=ونحماها اليوم واليمنى طويله
نرتكي للحمل ونشيل الثقايل=الصدور دروع واليمنى فتيله
كلنا من دون ترفات وعوايل=كلنا من دون مقهور وشيله
ازهمي يابنت ورينا الجدايل=وابشري واللي تعدى عزتيله
كل يامي يعتزي والفعل هايل=العدو مردود والراس بشليله
ازهمي صبيان يام اهل الصمايل=والفحي وانتي بذرانا ياجميله
تسبق الاقوال في يام الفعاايل=لو لحقنا الزير عذبنا الجليله
نكسب الترفاات وكبار الشمايل=والعدو للموت ما خلي سبيله
كل يامي لا غزى ينهي سلايل=كل يامي مدته ياهي ثقيله
يذبح الحايل ويكعم كل عايل=والدخيل يزبنه وينام ليله
((من بغى يعرف وش نجوم القوايل=يقترب من دارنا ونهد حيله ))
البيارق ترتفع والدم سايل=والرحا بدور بسيوف صقيله
قد كسرنا الترك والباشا يخايل=جمعنا منصور وجموعه ذليله
((ماعلينا خوف لو حنا قلايل=لا عطشنا نشرب المصري ونيله
وكان غزه ترجع بفعل وصمايل=بلغو شارون بترده قبيله ))
وارحبوا ثم ارحبوا يا اغلى القبايل=شاعر ال حبيش وابياتي جزيله
القصيدة الثانية
الله يخرب بيت زينك ويبلاه=كانه حدا قلبي يحبه ويغليه
والله يلعن طبع قلبك ويجزاه=كانه تعود جرح منهو يصافيه
اللي سواتك يرحم القاع بخطاه=لامن مشى مابان موقع خطاويه
لكن قلبك صد من صد قسااه=يبلاك غيري واتحمل بلاويه
كنك تقول اقدر امنيه وانساه=كنك تقول اقدر احبه واخليه
لا واللذي كمل جمالك وسوااه=من باع قلبي ما تعنيت شاريه
ماني حفيد اللي مع الحول له شااه=انا حفيد اللي ذراعه معشيه
من صد عني ما ترجيت حسنااه=ملعون ابو حب ٍ عرفنا تواليه
ويا مهف مقيط يازين وارشااه=قلبي تعذركم وانا الحب مابيه
رصيدكم مكشوف والشيك جبنااه=وبنك الغلا مسئول ومسجل ٍ فيه
مع الندامه والمواويل والآه=راح الغلا للغير ومدان ياهيه
القصيدة الثالثة
يلـي وصالـك غيـر ومفارقـك غيـر=قررت انا النسيان واختـرت فرقـاك
دام الهوى عندك مثل خير يـا طيـر=ما عاد اكدر خاطري تابـع ارضـاك
مليـت مـن خوتـك يـا نـافـخ الكـيـر=قلبي لقى اللي يحمل المسك خـلاك
خلك على سيرك وانا بمسك السير=وبدلـه مـع هــذا.. وذولا.. وذولاك
اكذب عليك ان قلت في بعدنـا خيـر=لكن جبرت القلـب يـا زيـن ينسـاك
تـدري فراقـك فيـه حــر وزمهـريـر=لونـه مقـارب لـون جمـره شفايـاك
ما لذ واحلى من حليـب المصاغيـر=الاضيـاع الحـرف فـي بحـه احكـاك
كنت افرح بشوفك وسوق التباشير=وهمـل اشغالـي علـى شـان لقـيـاك
كنت بوصالك غيـر ومفارقـك غيـر=غيـر البشـر حتـى بلحظـات فرقـاك
القصيدة الرابعة
اقبل سواد الليل يا عين جراح=لا تذخرين الدمع في خاطري نوح
الصاحب اللي خوته ضمن الارباح=لاواحسافه خوته خوه مزوح
خوه مصالح بس في وقت الاتراح=لاجبر كسوري ولاضمد جروح
كنت احسبه يمناي وافي ونصاح=وعطيه من قلبي وانا منه منصوح
لا ماحسبت احساب قلبي إلى طاح=الين شفت القلب مرمي ومذبوح
وكنت احسب ان الحب تاليه الافراح=الين صرت الجثة احزاني الروح
ابكي على اللي لو اناديه بصياح=ما ياصله صوتي ولافيه مصلوح
كل طعني لكن الزين ذباح=واللي ذبحني صدته يومه يروح
ما قال ابرحل ياحبيبي كذى راح=ليته تعذر كان بقول مسموح
لكن تركني بين تدمير واصلاح=قلبي تقفل لكن الصدر مفتوح
لاقبل سواد الليل يرتاح جراح=وينوح قبل يبوح ويبوح وينوح
صور من الأمسية
صورة جماعيه
الحضور
جانب من الحضور
وفالأخير اتمنى التوقيق لأخواني الشعراء
وبيض الله وجيهكم ، ولاهنتوا
22-11-2009, 12:52 PM
العرض العادي
