مجد الحساني في وجـوه الرجاجيـل أبلـغ معـان النفـس واعـلا رتبهـا
إلى بذلت الجـاه مـا قالـوا ابخيـل والمـال بذلـه مـن مقـادم وجبهـا
علـق رجـاك بكايـدات المنـاويـل واحسب حسـاب المقبـلات بعطبهـا
باكر على وضح النقـا يطلـع سهيـل ويكـذّب الحسّـاب والخلـق نبـهـا
العجل ما يصبر على الحـط والشيـل تقـلـبـه الايـــام وإلاّ قلـبـهـا
لادم سيـل النـو لا تنطـح السـيـل والمقفيـه لا تعتـرض فـي سببـهـا
المترفـات الضاريـة بالمواصـيـل أحـذرك لا تنجـرف مـع عجبـهـا
يمكن يجيك العـز هيـل ٍ بـلا كيـل غصبٍ علـى نـاسٍ كثيـرٍ غضبهـا
قوم ابرهـه مـا فادهـم قـوة الفيـل شبّولهـم نـارٍ وصـاروا حطبـهـا
أرسـل عليهـم ربنـا طيـرٍ أبابيـل أفنـى جنـودٍ تغـدى اللـي حسبهـا
ابعد عن اللـي يزرعـون العراقيـل ويوشّـحـون المغـديـات بذهبـهـا
تبي نخل بغـداد يشـرب مـن النيـل منابعـه مـن روس مـنـداه جبـهـا
ولا تقول الهـرج مـن غيـر تدليـل أضغـان خلـق الله سريـع ندبـهـا
كـم واحـد ياقـع بفـخ المحابـيـل يبـي الطماعـة والمخاطـر جنبـهـا
مخاطـرٍ تولـد كبـارٍ وهـي حيـل خلك حذر لا تعتـرض فـي نشبهـا
و لا تحلـل ضايـع الهـرج تحليـل تبلـش بكذبـة كـاذبٍ مـا كذبـهـا
وصبرك على الاحداث لو يطول الطيل ادراك غايـة مفخـتٍ مـا قضبـهـا
الفايت اللي فـات مـا يدركـه ويـل والحاضـر امجـاده لحـيٍ خطبهـا
كبّل شفوف النفـس بالصبـر تكبيـل الشمـس مـا حـي بكفـه حجبـهـا
تركيبة ايامك علـى العـدل والميـل سنـة حيـاةٍ كلـنـا فــي طلبـهـا
أحـدٍ قنـاده راهـي البـن والهيـل وأحـدٍ قنـاده شربـةٍ مـا شربـهـا
من دونها يـومٍ تطـارد بـه الخيـل فـي ساعـةٍ ياحـظ منهـو كسبـهـا
وأحدٍ يـدور زود مـال ومحاصيـل ويموت ووصات العمـر مـا كتبهـا
وأحـدٍ شفاتـه بالليـالـي المقابـيـل يبـي المراجـل مـا يهمـه تعبـهـا
وأحـدٍ عليـه مـن الليالـي مداخيـل يغطـي مداخـل لهبـةٍ لـه نهبهـا
تلعب بنـا الايـام جيـلٍ بعـد جيـل مـوارثٍ يلحـق بهـا مـن عصبهـا
خل الأمل بالـرب منـش المخاييـل وتشـوف كـان الولـي لـك وهبهـا
ولا تخـل النافـلـة تـالـي اللـيـل بـر النوافـل دايـمٍ فــي رجبـهـا
قصيدة أعجبتني .. للشاعر الأمير .. عبد العزيز بن سعود .. " السامر "
أتمنى أن تنال الإعجاب كما نالت إعجابي ..
__________________
إذا فعلنا ما نحن قادرون على فعله
فسوف نذهل أنفسنا بحق ..!!
" توماس أيه أديسون "
20-02-2007, 11:28 AM
العرض العادي
