الزواج الحيـــــــن .. إلى كل رجل وإمرأة

العبرةالحائـرة · #1 06-07-2005, 05:45 PM

إلى كل رجل وإمرأة ..... اذا انتو مو قد الزواج مليون مره قلنا لا تتزوجون .. واذا مو قد المسؤولية هم لا تتزوجون ... واذا ما تحبون الياهال هم لا تتزوجون ....

يعني بس كلا خيانه خيانه .... طلاق .... انفصال ...!!

الواحد حتى يكره اييب طاري الزواج ..... الواحد يدور الاستقرار بعد الدراسه والشغل والايام اللي راحت .... يرد للغلب والزعل والهم ..!!

المرأه اتحط العيب بالريال ... والريال يحط العيب فيها ... وكل واحد يشوف عيوب الثاني .. ولا ينظر حق مميزاته .. أو حتى يفكر يصلح شي في نفسه ..!!

أشيا ء سخيفه وتافهة اتحصل ... وإن دل دل على السخافه .. والحياة التافهة اللي عايشينها ..

البنت تحن ابي اتزوج وابي اتزوج .... اول ما اييها واحد تستانس ويعجبها وتقول ابيه ....
وبعدين طلع فيه وفيه .... واهيه كلا مسكينه وما فيها .... واتيي تقول " جان زين خذيت عن حب !!"

واتيي البنت اللي خذت عن حب تقول " صدقوني لا تاخذون عن حب ترى أذيه إخذي واحد ما تعرفينه !! "

ولما الريال تخطبله امه وينصدم ويطلق " يقول هذا مو اختياري وانا غلطت تزوجت عن خطبة أهل .. خلاص بتزوج عن حب "

وأيي الريال اللي تزوج عن حب ويقول " أنا ما ادري شلون حبيتها وخذيتها ... واهيه واهيه ... خلاص مليت منها !!! "

وهكذا .....

انزين الواحد لما يبني قرار الزواج يدرسه وينظرله من نواحي وايد ... الزواج مو لعب والا فترة وتعدي والا سياحة ..!!

وبعدين الزواج توفيج من الله ماله شغل عن طريق حب أو أهل ... والطلاق مو عيب ..!!

لكن لما يكون بأسباب تافهة ... ومثل لعب الياهال ... اهني تكون المشكلة ..

المرأه

الحين البعض منهم حسبالها الزواج راحة ... وبيت .. وزوج .. وكلا حب وسعادة .. وأطلع وايي على كيفي .. بعد حكره الاهل ..
والريال طبعا ... مرتي حرام ما احكرها اطلعها .. اتيي البنت خو مو شايفه جذي بيت اهله طلعي وروحي .. ميخالف...
اهني عاد يكبر الراس .... تبدي تاخذ أرقام واشويه شويه تبدي تتعرف وتكلم شباب... تبدي اتسوي مقارنه بين اللي تكلمهم وريلها ... يطلع الريل مو زين .. ويطلع أكيد عنده سوالف ... وبس خلاص سوت قصة بروحه وأعذار ...!!

الرجال

طبعا يتزوج ... هذا بعد اذا هد رفيجاته .... غير الخطوط اللي فاتحها ويتكلم منها .... وشنو العذر " كلا مرتي ما تعرف شي واهيه مو مثيرة !! " .... وعاد سمعي وعدي من الاعذار ... ينسى مرته اشكثر سامحته ... ينسى اشكثر اهوه خانها وقص عليها .. اشكثر كشت فيها ... اشكثر اهيه طيبه وينقص عليها ... عــــــــــــادي !!

وفي حريم دام خاني ..... خلاص بخونه .... وتصير حياة منيله ب 60 نيله ...

والمشكله الاكبر ..... لما اثنين يحبون بعض سنين .. ويتزوجون بعدين يتطلقون ... على اشياء رهيبة ..!!
يعني اهمه عيل طول هالفترة شنو يسوون ..!!
يعني للحين ما عرفت طبعه .. اسلوبه .. متى يعصب متى يضحك ... متى ومتى ..!! وشنو عيل فايدة السنين هاذي كلها ؟

في زوج او زوجة ... اتيينهم تقولين لها .... شلون الزواج ... حلوو في أحد مقصر على الثاني .. انزين شنو اللي ناقص .. ولا شي ...

انزين ليش الخيانة ....!! ...جذي ما في سبب محدد ...انزين ليش ... جذي ..!!

اللي بقوله ان في ناس حاشهم الملل .... لكن مو متصورين الخلل وين ... ولا لهم خلق اصلا يفكرون .... فتحاول تلجأه حق علاقة أو أي شي ....

يا جماعة الطلاق والله مو عيب .... واذا فعلا الغلط ما يتصلح والحياة مستحيلة بين الاثنين ممكن يحصل الطلاق ... ولا يتم الزواج مزيف وكلا خيانة ...

واذا كنتوا خايفين على الياهال .... ترى ما سويتوا شي ..الياهل أول واحد يلاحظ فتور العلاقة والوضع بالعايلة وما يتكلم ..

يعني في كلا الحالتين .... نفس الشي .... الطلاق وكل واحد يلتفت حق نفسه .. ولا الذنب والخيانة ..

على الاقل النفسية تتعدل وحتى ذيك الساعه الواحد يقدر يربي عيالة في وضع مستقر ..

وبعدين اللي حاس ان الوضع مو مستقر وصعب ماله داعي الانجاب .... حرام الياهال يتغربلون ..!!

لا تتسرعون ... وديربالكم .... خلوا عندكم ضمير اشويه ... والاهالي اتمنى انهم ما يزوجون اعيالهم بسبب قرارات انانية ... ولابد انهم يسألون عن الشخص عدل ...

طبعا في ناس صبرت صبرت ... وفي ناس ملت .. وفي ناس وضعها معلق ... وفي وفي ...
اهم شي الواحد لما يسوي الشي يتأكد ويسأل نفسه اللي اسويه صح والا غلط ..بس

يعني هل انا راضيه على اللي اسويه ؟؟؟
هل حققت اللي ابي ؟ انا سعيد ؟ شنو الفايدة ؟ انزين وآخرة هالشي شنو ؟ متى بصير سنع ؟

----------
منقول

هند · #2 06-07-2005, 06:15 PM

السلام عليكم

لاهنتي غاليتي
عذرا : سأنقل الطرح لمنتدى الأسرة حيث مكانه المناسب

السؤدد

حبيبة ابوها · #3 06-07-2005, 09:45 PM

السلام عليكم ورحمة الله وبركاته

صح لسانج اختي المهاجر

ومعاج حق بكل اللي قلتيه

وهذا فعلا اللي حاصل بوقتنا هذا

الله يكافينا شره

الحين نقدر نقول عن هالموضوع

مسمى " الموضه "

السبب .. تكراره والكل يسويه بسبب او بدون سبب

يعطيج العافيه اختي على الموضوع

الباشا · #4 07-07-2005, 12:24 AM

من لا يتحمل المسؤليه فخير له ان لا يتزوج

مشكوره المهاجره على موضوعك

والله يوفق شباب المسلمين والشابات .

Aziz · #5 07-07-2005, 06:45 AM

اختي المهاجره انا اقول ومن وجهة نظري ان اللي تكلمتي عنهم فئه لاتذكر وقليله

وان الخير اكثر بس الشر الاعلام يطلعه ويكبره .

وشكراا لج مره ثانيه .

العبرةالحائـرة · #6 07-07-2005, 11:36 AM

شـاكره لكم مروركم ...

فيصل المشوط · #7 07-07-2005, 02:39 PM

السلام عليكم ورحمة الله وبركاته

شي جميل

ابوتركى · #8 07-07-2005, 03:50 PM

تسلمين المهاجره

ومثل ماقال اخو عزيز مادام يوجد مثل هذه الفئه

فا يوجد النقيض لهذه الفئه الا وهى الفئه الصالحه المقدره للحياه الزوجيه

تقديرى

العبرةالحائـرة · #9 09-07-2005, 10:08 AM

شاكره لكم مروركم .... تسلمووووووووون

tiger · #10 09-07-2005, 01:22 PM

الأخت المهاجرة

تسلمين فعلا لقد تكلمتي في موضوع او مشكلة تعاني منها المجتمعات

وبالذات الخليجية ولما اقول الخليجية لأنهم هم الذين يزوجون ابنائهم

في سن مبكرة عكس المجتمع العربي الآخر وقد يكون ذلك للطفرة اللي

يعيشها المجتمع الخليجي وقد انقلبت سلبية من هذه الناحية ..

ومن يزوج ابنته لشخص عاطل بحكم انه قريب او ابن رجل غني فليتحمل العواقب

ويستعد لأستقبال ابنتة في اقرب وقت . فالرجل الذي لا يتزوج بعد تعب في ايجاد

المهر والمسكن وتكاليف الزواج ويعرف انه سوف يتحمل مصاريف الزوجة ويتحمل التبعات

التي سوف تترتب علية فلا يتزوج ولا يزوج ! واذا كان يستطيع القيام بما ذكرت فالجدير به

ان يعرف قيمة الزوجة ولا يجعلها سلعة يستبدلها متى شاء .

اما ما يخص البنت واختيارها للزوج فأقول لا تنخدعي في اسلوب ما قبل الزواج فسوف تتغير

الأمور وتفقدين الكلمات التي اعتدتي على سماعها وتسمعي بدلا منها كلمات لم تكن في الحسبان.

فالزواج ليس بالأمر السهل والذي يتصوره الكثير من المراهقين من الجنسين

حقيقة ما نراة ونسمعة من قريب ومن بعيد يندى له الجبين .

شاكر لكي اخيتي