يا ابو طموح!!

[معيضي ممتعض]

بالامس دار هذا الحوار بيني وبين صديقي (ابو محمد)، وابو محمد لمن لا يعرفه شخص بريء جدا، و على نياته جدا جدا





ابو محمد يكتب ويقرأ علي:

<بطموحٍ يطاول الثرى....>






<قصدك الثريا،
الثريا فوق،والا ان كانه يطاول الثرى فما رحت ديرة>




<اكيييييد؟>





<اكيدين،كمل>






<بطموحٍ يطاول الثريا...>






<لحظة لحظة ، تعرف الثريا؟>






<يا ويه!! وش قوم ما اعرفها؟ ، ما هيب ذي اللي تدلى فوقنا >








<اني والله داري انك ضايع، الثريا نجم في السماء يا جلمه،كمل كمل>







<اني خابر، بس امزح معك،
بطموحٍ يطاول الثريا، و بعزيمة تطاول الجبال و ..>







<وبسيقانٍ تطاول الجدار، يا اخي غيّر عدّل بدّل، ما عندك الا يطاول،شوف لك كلمة غيرها>






<اهدافي سامية يا اخوك ونظرتي فوق >








<عدّلها واقصر الحكي>







<ابشر،
بطموح يطاول الثريا، وبعزيمة تذب الجبال>







<تذب؟ جيب ذي ما هيب عزيمة>






<هااااه؟ ما يعجبك شي ابد>







<شف غيرها>






<بطموحٍ يطاول الثريا، وبعزيمة راسخة رسوخ الجبال الشوامخ>







<الله الله،درر درر>







<قطعت حبل افكاري الله يقطع صيب الخبلان،
من جديد، بطموحٍ يطاول الثريا، وبعزيمة راسخة رسوخ الجبال الشوامخ، يصل الانسان الى غايته>




<لو تكتب: يصل المرء الى غايته،اشوف انها اذرب واكشخ>





<و هدا،
يصل المرء الى غايته، حلو،قطعنا شوط كبير، وش اكتب عقبها>






<اكتب وكما قال الشاعر:
على قدر اهل العزم تأتي العزائم= وتأتي على قدر الكرام المكارم>






<الله و اكبر، انا اشهدن به شاعر
تكفى من هو له ذا البيت>







<للغيهبان>






<يالله طيّره، عيدها علي مرة اخرى>







<و كما قال الشاعر:
على قدر اهل العزم تأتي العزائم= وتأتي على قدر الكرام المكارم>





<حلو حلو، وش نكتب عقب؟>





<ابو محمد>





<لبيك>





<لبيت حاج،
انت من جدّك؟>





<على ويش؟>





<اقول،
امسح امسح ذا الخرابيط كلها، و عطني اللابتوب
والا اقول وخر وخر مني>





<ليه يا ولد؟ وش زينّا قبل شوي>






<صاير لي ابراهيم الفقي على غفلة


ترى الدعوة كلها كتاب نقل>

[دايم اهذريبكـ]

هههههههههههههههههاي

بيض الله وجهك فكيت الوزيرر من القصيده والطموح والثريا ولحس المخ

مبدع مشاء الله عليك

بس لاتبطي علينا

[انتحار]

مبدع بشكل "يهوس": )

[شعاع]

شاد حيله يبي كلام محرز يمشي النقل

مالومه لاجيت تنقل كنك تشحذ


احلى مافي كتاباتك انها من واقعنا اليومي

الله يعطيك العافيه

[النــ فهيــد ــاجعي]

ههههههههههههههه لاهنت خيووووو

[اَلَدَيَــــمَ]

كبدي له مجتهد يبي النقل ومايدري وش يسسسوي
لاهنت وسلم لنا ع ابو محمد

[دون كيشوت]

مشكلة المصابين باحساس مرهف زياده عن اللزوم

مواضيع واسلوب مشوق يا معيضي

ملاحظه __ الله واكبر : تنقال وتكتب ( الله ٌ أكـبــر )

وابراهيم الفقي مدرس رياضيات صح ؟

[فيـــصل الشمري]

ههههههههههههههههههههههههههه
كل هالجبال والمرء على شان طلب نقل

لو يبي يوضفله واحد شنو بيكتب

تحياتي لك ولا هنت على الموضوع

[عبـق أجدادي]

.









وبقلم يطاول الثريا وأسلوب يذب الجبال: )
قدرت وبتمكن من رسم البسمة على وجووه
واجمة ممتعضة متمللة هذا اليوم ..!






عادة لمعيضي

لما ينشغل الناس بالقشور
مايرضيك من الأمر إلا نواته










.

[الغـــــزال]

وللمره المليون>>>مافيك حيله
ألا خويك ماشاف له أحد من النواب..وريح نفسه من الثريا و تسلق الجبال:d

بانتظار جديدك دائماً..