السلام عليكم ورحمة الله وبركاته
جرت بين عبيد بن حويل من الخييلات الدواسر وجاره دحيم بن برمان من ال عزه من
قبيله سبيع كانوا الاثنان جيران بالبر وقدر الله ان ولد الدوسري قتل ولد
السبيعي فجاء الولد الي والده الدوسري وقال ياوالدي انا قتلت ولد جارنا وكان دحيم
السبيعي مسير على عرب بعيدين عنهم فلما اقبل السبيعي قابله عبيد الدوسري
وقد وضع في رقبة ولده حبل . قال دحيم السبيعي مابك ياعبيد قال : فالح ذبح ابنك
صالح وهذا ولدي اذبحه : بدلأ من صالح قال السبيعي: الذي مات ولدي والحي ولدي
وقام على جاره الدوسري وقبل رأسه قال :ابشر ببنك وانحنى على الولد وقبله وقال:
ابشر بأمك ، وستمرت جيرتهم وتبادلهم الجميل والمعروف وصلة الصداقه وبهذه
المناسبه قال عبيد بن حويل الدوسري ابيات ثنى على جاره دحيم بن برمان السبيعي
الذي تنازل ابنه
ياراكـب هجـن مراديـم وسمـان=عيرات الانضـاء مايرقـع حفاهـا
يا راكبين الهجن نصوهـن عمـان=ومرو ا على رفحا وروحوا وراهـا
في كل ديره جددوا لأبـن برمـان=قصر مـن البيضـا رفيـع ابناهـا
ثم اجنبوا من عندكم يـم نجـران=دار المذاكـر دوجـوا فـي اقرهـا
حطوا له البيضا على راس مابـان=راعي الفعول الـي طـري نباهـا
ومرو على الخرمه وحطو به اعلان=اعلام بيضا كل مـن جـا قراهـا
ونصوهن الحائر عسى دربكم زان=ديرة سبيـع امتيهيـن اقصراهـا
وابنو بدار سبيع بيضا لهـا شـان=من مـر ديرتهـم يشوقـه ابناهـا
يالله عسى ديرة دحيم بن برمـان=لاجا سحاب الوسم يسقـي جباهـا
اللي عطى جاره عطا مابعـد كـان=يبغي الجزاء من عندرافع سماهـا
ماهيب لاغرس ولابـل ولاضـان=ولاعطـا دنيـا ايـدور جـزاهـا
يبغي العلوم الطيبـه مثـل ماكـان=قصيرته عطيـت ولدهـا وجاهـا
يافاعل الحسنا جزاك الله بالاحسـان=فعلت لك حسنا علـى الله جزاهـا
وسلامتكم