حبيبتي والقلم يشره على اوراقي=واوراقي البيض للمشروه خضاعه
خذت القلم والعيون تخيل براقي=وامطر قصيدي على صيفه ومرباعه
هلت سحايب قصيدي فايح اشواقي=وانبت جمالك قصيدي باجمل انواعه
يامن جماله تعدا هقوة الهاقي=خلا قصيدي على النفنوف دراعه
واقول للناس هذي عز ميثاقي=اللي لها لين اموت السمع والطاعه
الجادل اللي من اهل المستوى الراقي=رفيعة الشان للمعلوق مزاعه
الله فرقها على زينات الاذواقي=بيت الشرف بيتها وتعيش برباعه
بنت الترف واسم ابوها درعها الواقي=والخال شيخ يحوش الطيب بذراعه
من ماكر مالجابه كل نعاقي=ماكر حرار تشوق العين طلاعه
ريحانه في ظلال وتحتها ساقي=من دونها الموت والسلال واتباعه
خذت من اوصاف يوسف كل مالاقي=زعيمة الحسن مياسه وجزاعه
ان اقبلت قلت : ماتت لوعه فراقي=وان دبرت قلت : عاش البين واوجاعه
وان وقفت وقفن تلعات الاعناقي=وان عرضت من لمحها دق باصباعه
يخضع لها الراهب العاصي وينساقي=وقلوب الابطال منها شبه مرتاعه
حبيبتي والغلا ماعاد ينطاقي=وشرواي ماتدركه فزعات فزاعه
انتي مدار الفلك وعيونك افاقي=وانا الذي عاش حبك باربع ارباعه
لبيه..لبيه..يافيي..ومشرافي=يا اغلى غلا في حياتي يا اثمن بضاعه
يا الذ من فرحتي بك لحظة اعناقي=قلب نهبتيه ماترضين بارجاعه
مدامني لك مليك ورافضه اعتاقي=من يكسب الكنز عاش ومات ماباعه
حبيبتي والقلم يشرب من اعماقي=عساي بينك وبين الشر واطماعه
لا يابعد عمري اللي راح والباقي=ياجعل يومي قبل يومك لو بساعه