* ألو السلام عليك يا شيخ ... أنت الشيخ سعد؟- وعليكم السلام ورحمة الله ... تقدر تقول شيخ ... تفضل وش عندك
يا شيخ أنا أكلمك من عرعر ... أحد الأخوان جزاه الله خير أعطاني رقمك وقال انك تزوّج المسلمين مسيار ... وانا ياشيخ أبغى لي وحده بكر صغيره في السن ومزيونة وأبغى تسعى لي في هالموضوع ... والله يا شيخ أني أحب الحلال ولا أبغى غير الحلال - شـ تقول أنت ... وش هالخرابيط !! أنت غلطان في الرقم ياخوي
يعني أنت ما انت بشيخ مسيار !!- لا ماني بشيخ مسيار ... مع السلامة ... طووط طووط طووط
وفي نفس اليوم عرفت من أحد زملائي انه في ايميل يتداولونه مذكور فيه بأن على الراغبين بزواج المسيار الاتصال على الشيخ سعد ومكتوب فيه رقم جوالي ... البكر بـ
5000 ريال والثيب بـ
1000 ريال !! ... عرفت أنه مقلب مسويه فيني واحد من الشباب الله يسامحه أو بالأحرى الله لايسامحه !! .... وأن اللي كلمني من عرعر هو حالة من اللي يبحثون عن المسيار مثل غيره من الحالات الكثيرة اللي مرت علي خلال هاليومين ولازالوا .... أسمحوا لي أستعرض معكم هنا بعض الحالات اللي سمحت لنفسي أني أتمادى معهم وأستعبط عليهم من كثر ماحسيت بالغبن :
*
يا شيخ عندي أخو مايسمع ولا يتكلم ... وخطبت له من جماعتنا في الديرة لكنهم ماوافقوا عليه ... ويوم سمعنا عنك يا شيخ وعن مجهودك في زواج المسيار قلت أنك أنت اللي بتزوج أخوي
- مايسمع ولايتكلم !! وش أصلح له هذا ؟! ... لا ياخوي عطنا واحد سليم نعطيك وحده سليمة !!
التدليس والغش حرام بارك الله فيك..
*
مساء الخير فضيلة الشيخ ... بأخش معك في الموضوع دايركت! أنا أبغى اتزوج مسيار اذا ممكن
- ممكن ليش لا ... أول شي عطني معلومات عنك وعن البنت اللي تبغى ونسأل الله أن يوفقك الى طريق الحلال ويجمع بينكم على مايحبه ويرضاه
أنا أعمل بمركز مرموق (كنت احسبه يقولي مرقوق)في شركة أرامكو السعودية في العضيلية ومتزوج وعمري 35 سنة وساكن في الظهران ... وأبغى بكر تكون على قدر من الجمال بشرط أنها تكون ساكنه في الاحساء ... وياليت تتوصى فينا يا شيخ !- للأسف ياخوي أنت متأخر شوي ... كان عندي بنتين في الاحساء لكن كلهم بفضل الله جاهم النصيب وتزوجوا ... لكن أوعدك أول بنت تكلمني من الأحساء بأسفطها لك !!
*
(الساعة 1 بالليل ) يا شيخ عندك مسيار ؟
- أكيد عندي ... لكن أنت صامل ؟
أي والله يا شيخ أنا صامل وفلوسي جاهزه ... يا شيخ ... كأن عندك صوت أغاني !!
- أغاني ... أيه هذا مسجل السيارة ... أبد ضايق صدري في هالليل وطالع اتمشى
والله أنك زاحف يا شيخ
- ما عليك زود !!
وغير هالحالات كثير .... لكن بعد هالمقلب فقط عرفت صدى زواج المسيار عندنا في السعودية ... ماتوقعت أنه مرغوب لهالدرجة !! ... خصوصا أن الايميل انتشر على مستوى كبير ... فيه شخص كلمني من قرية في عسير في أقصى الجنوب وغيره من مدينة حقل في أقصى الشمال ... غير اللي من السليل والخفجي والمجمعة بس الى الان ماوصلني شي من الوادي!!
س/ وش رايكم في زاج المسيار؟؟انا ماتكلم من ناحية الحكم انا ماافتي انا ازوج بس..
وهذا والله ولي التوفيق