[دسمان]

(مثلي عزيز النفس محدِ يهينه) للشاعر حمد بن سعد

لي صاحب من سبة المال مغرور = يقول احبك والكبر وسط عينه
يقول انا عندي ملايين وقصور = وبيت بلندن تونا ساكنينه
وداير مدار البيت اشجار وزهور = وله موقع صاير بوسط المدينة
"والهايد بارك" اقريب وانمره احدور = وعندي "بليفربول" اكبر سفينة
وبالكويت شاليه على شاطئ الزور = خميس جمعة كلنا زايرينه
واذكر بعد حتى قبل خمسة شهور = ابوي عنده بيت وامثمنينه
تراه تاجر عندها الناس مشهور = متعامل ويا البنوك الامينه
تدري "حمد" من غير لالف وادور = تبقى حياتك من بدوني حزينه
يكفي احس انك معاي انت مسرور = ولو بنت غيري كان شفت الغبينة
معذور لو حبيتني حيل معذور = ادري معاي انك لقيت السكينه
الزين في العالم ترى بس محصور = فيني ولا غيري على الارض زينه
وخذتني الحسرة وصديت مقهور = وفكرت في فكره صراحة لعينة
قلت اسمعيني واخذي العلم والشور = واللي بقوله لازم تفهمينه
انا بعد تاجر مضالي ترى دور = وقت مضى ما ظنتي تذكرينه
تجارتي مابين بومباي ولاهور = ومن الدراهم مالي لي خزينة
وبوادي العجمان بيت لنا دور = بيت قديم وتونا صابغينة
لاجا الربيع وثم غدا القفر ممطور = وفلا الحلال بموقع خابرينه
خيمت ماحولي شبوك ولا سور = واطلقت رجل من زمان سجينة
وشبيت ضوي لا بدت طلعة النور = ودقيت نجر ننطرب من دنينة
واللي قصير لي بيسير وبيزور = يستاهل الفنجال الاشقر يدينه
يلقى دلال صفر والبن معمور = ويلقى السمر حنا بعد حاطبينه
هذي حياة البادية مابها عور = من بيننا مبطي روابط متينة
نقصد ولا نبغي من الشعر جمهور = حب البداوة من قبل عاشقينه
يا بنت انا ماني على الذل مجبور = ومثلي عزيز النفس محد يهينه
اصحي ولو مرت بك ايام ودهور = لا تامنين الوقت لا تامنينه
راضي برزق جابه الله ومستور =وحتيش لو كنتي بنا مستهينة
في حب مثلك ماني اليوم ماسور = مظاهرك ما تنفعك يافطينة
العبد يشقى يقطع ديار وابحور = ومنهو سعى للرزق ربي يعينه
وانا احمد الله وضعي اليوم ميسور = فضل من الله كلنا عابدينه
انسان آخرته مكفن ومقبور = ويلقى بعد دنياه ماضي سنينه
اما يلاقي الجنة اللي بها حور = واللا يلاقي النار تحرق جبينه
الموت ماخذنا ونمشيه بالدور = هذا طريق كلنا سالكينه
وفي الآخره نلقى لنا كتاب منشور= والطيب اللي ياخذه في يمينه
يلقى جميع اعمال دنياه بسطور = وجميع ما سواه من صوب دينه
تقصيرنا واجد عسى الذنب مغفور = والخير للمسلم دروع حصينه
لذات دنيا زايله كلها جور= تظهر لك الفتنة بصورة حسينة
اخذت انا العبره وباقول مشكور = ترى العبر في الوقت هذا ثمينة