قصيده قديمه بعض الشئ ولكني مازلت ارددها
قصيده من شاعر لن اتحدث عنه خوف من التقصير
ضيدان وقصيده في
صاحب السمو الملكي الامير/ سعود بن عبدالله بن عبدالعزيز
الدمعه الي وقفت بن الاهداب=ياليتها سالت على الخد يا امير
كان اعذورني قبل الاصحاب الاجناب=في ســاعةٍ ماعاد فيها معاذير
ولا ارخصت من دمع العواجي على عقاب=الي حذف غرام سعدون فالبير
دمعٍ حشى ماهو من دمع الاحباب=ولا ذرفته لجل بيض الغنادير
دمعٍ على حلمٍ قبل ينولد شـاب=حـلمٍ على دنياي ماله تفاسير
شفت بمنامي راهبٍ وسط محراب=والناس من حوله تداحم جماهير
ويشيل طيرٍ له ثلاثين مخلاب=وله سبع ريشاتٍ سوات البواكير
حرٍ ولكن ريشته ريشة غراب=يكفخ بجنحانه ولا ينتق السير
وفزيت من نومي بضحك وتعجاب=ورديت راسي للمخده بتصوير
بعض المشاهد لكن النوم غصاب=واغرقت في نومٍ من النوم واخير
واحلمت حلمٍ منه اصبحت منصاب=حلمٍ يحير صاحي العقل ويحير
وفزيت من نومي وعيني على الباب=ياحلم عود لا تمسى على خير
يا من لمحتك في حلا النوم وانساب=زولك معى دمعي وانا اقول ما غير
ماغير قربك يا بعد كل من الاقراب=وماغير شوفك وين ما روح واسير
يا حي شوفك يا بعد كل من غاب=يا مرحبا يا أغلا الاهل والمساير
يا خير من ودا زماني ولا جاب=ليت الزمن يرجع وانا اعود صغير
يومك تعلمني على حسن الاداب=وعلى الصلاة وشبت الصبح وعصير
واخذت الطبايع منك والطبع غلاب=واصبحت مثلك ما ألتفت للمخاسير
من رحمة الله لك من الغيث صباب=مزنٍ من الرحمه قنوفه مزافير
يا حلمي يالي طاب نومي ولا طاب=جيت وسريت وجعلها لك مسافير
وانا على الله خالقي رب الارباب=الواحد الي بيده الشر والخير
ما ارجي سوا الي من ترجاه ما خاب=رب السما رازق فروخ العصافير
الي معوضني بظلعٍ من هظاب=ظلعٍ تدنا فيه بانات والنير
هو سيفي البتار قطاع الارقاب=وهو تاج راسي بين روس المشاهير
حرٍ على حرٍ على راس مرقاب=جانيه عبدالله من اعلا المواكير
يا معرب الجدين والله ما شاب=بيتٍ بمدحك لا انتشى واصل السير
يا من بظلك عاش كفال الاشناب=المدح ما يشرا بحمر الدنانير
المدح سقته لك وله عندك اسباب=يا حاتم الطائي ويا سالم الزير
تطلع على العليا وللخيل ركاب=واتهد لاشفت الحباري مخامير
يا سيدي ياسعود فكاك الانشاب=تكفى ترى الاوضاع تحتاج تغيير
يا امير تكفا للفناجيل شراب=شرواك يا راعي الدلال المباهير
اقولها والعمر مكتوب بكتاب=وعن قسمت الله ما تفيد المحاذيير
دنياي تلعب بي على كل دولاب=إلين ورتني الحقايق اساطير
دنيا تبادلني من الظرس لناب=وعلي جنادبها ورود ومصادير
ما غير اوقف وألتوي كني الداب=على سنينٍ كل ابيها مدابير
وجيتك وكل العالم اشباح واغراب=كسير عظم الساق واحتاج تجبير
وفي ظل بيتك طحت من بين الاطناب=طيحت حشيم له معزه وتقدير
ما كني الي يوم طاحن الاقطاب=قطبٍ ثبت تلوا عليه الشناكير
وياما ودرب الطيب ما عنه مجناب=سقت الغوالي ما سمعت الاشاوير
وياما تركت الباب من دون بواب=ويا ما بعد عشيت عوج المناقير
واليوم يوم ان العرب صارو اعراب=واصبحت يبن اسعود لا انذر ولا اغير
في ظل وهاب النعم خير وهاب=منشي السحاب الي لوبله شخاتير
ثم في ذاركم يا ذرا غدف الاسلاب=عشنا وربعنا سوا ذيب وبعير
وان حل يومٍ كنه اثنين من آآب=يوم السواعي فاختٍ المجاحير
يا زين وقفتنا شبابٍ وشياب=وقفت وفا ماتحتمل اي تأخير
وقفت وفا حاظر عن وجيه غياب=وان حضروا غيابنا غن يا طير
ولا إنتابني يا امير فالقلب منتاب=قلب الدويش ليا ذكر ربعه مطير
اون ونة من تقفاه طلااب=ودقه برمحٍ يفري الصدر ويعير
يا سيدي قلتله وانا حبي اسراب=كنه حمامات السلآم المغاتير
مامقصدي فالشعر تسميع واطراب=وماني بمررها على الناس تمرير
وبفضل رب البيت لا اظلم ولا اغتاب=لوكان في صدري مثل لاهب الكير
يا سيدي يوم اغتنى كل نصاب=وانا علي من واقعي لعنة مشير
وانت تعرفني زين ماني بكذاب=صادق معك حتى الفشق والشراشير
ماني بدجالٍ مداه التحبحاب=وليا احتمى الموقف يطق المعيثير
انا ولد عودٍ على ربعه حجاب=حفيد جدانٍ تهز الطوابير
ياما شعاني عقب الاشمال الاجناب=واجنبت ما حسبت طول المشاوير
مدامني من طين واخرتي اتراب=مالي يكود اقزر العمر تقزير
للعز شرايٍ وللعمر جلاب=والعمر مره والسعاده مقادير
والله خلق روس وكراعين واذناب=ولحدٍ بحلقي من حساب الازارير
والي على ما قيل لا اخطا ولا صاب=حتى ايش لو هبت عليه الاعاصير
وانا لاشفت الناس من حولي احزاب=قدحت راي المرجله دون تفكير
واخترت دارٍ منزحت كل حرااب=ديرة بني عمي القروم المناعير
دارٍ ما تثمر قاعها خوخ واعناب=وفي عيوننا تسوا الحويه واقادير
يا سيدي والوقت للعمر نهاب=وتفسير حلمي عند وآلي التدابير
جيتك وانا للحق طلاب بعتاب=وحقي عليك تفسر الحلم وتشير
يا اما تقول اجلس ولنار شباب=ولا على الجره قفيت المداوير
يا سيدي جيتك وانا سيف وانصاب=وليمتك سقت الظعن والمظاهير
واقبلت اداري دمعةٍ بين الاهداب=لكنها سالت على الخد يا امير
اعذروني على الاخطاء ان وجدت