[Al.3rjane]

هذه قصيد للشاعر العملاق حمد هادي المسردي

وهي في النصح والأراشاد من أجمل القصائد التي سمعتها

وتعتبر من عيون الشعر هي طويله حيث وصلت ابياته الى المائه والثلاثون بيت

حيث يقول :-

الــــنــــصـــــح و الأرشــــــــــــــاد

يقول اللى برسم القافيات=يصوغ القاف صوغ المجوهرات
إلــى مـنـه بـغـا نـظــم القـصـيـد=فـــلا يـخـتـار غـيــر الـطـيـبـات
تـنـقـا مـــن نظـيـفـات الـلـحـون=علـى كيفـه مــن الـقـاف كلـمـات
محاريـف القوافـي لــو تعـصـت=أصخرهـا ولـو هــي عاصـيـات
تـخـيـرت الـكــلام الـلــي يـفـيــد=وجـنـبــت الـعـلــوم الـتـافـهــات
وأنــا قاسـيـت شـــدات الـزمــان=وذقـــت أمـرارهــا والحـالـيـات
ومـن قاسـى علـى الدنيـا شـدايـد=يـفـيـد ويستـفـيـد مـــن الـحـيـات
وأنــا مـانـي بـقـول انــي خبـيـر=ولانــي بـــا أدعـــي بـمـقـولات
درسـت مـن المعرفـه مــا تيـسـر=وصرت أعرف علوم ٍ موجـزات
وعشـت مـن الحـيـاة الله واعـلـم=عن اللي مـن سنيـن العمـر فـات
عرفـت أطــوار نـيـات الـرجـال=وشـفـت أسـرارهـا المتخـالـفـات
وميـزت الرفـيـع مــن الوضـيـع=وقـلـت الـحـق والـعـلـم الـثـبـات
ترى في الناس من يجلى الهمـوم=عــن المضـيـوم عـنـد النـايـبـات
يسـد النـوب مـن كــل النـواحـي=ويـركــي للـحـمـول الـكـايــدات
عـزيـز النـفـس لــو مـالـه قلـيـل=ايـديـنـه بـالـوفــا مـسـتـاصـلات
عـزيـز النـفـس لــو مـالـه قلـيـل=احــبــالــه لـلــمــكــارم واردات
عـزيـز النـفـس لــو مـالـه قلـيـل=اشـبــوره للـمـراجـل طـايــلات
ولا ظنـيـت بــه ظـــن ٍ بـطـيـب=تشـوف رســوم ظـنـك راسـيـات
وليـمـنـك نخـيـتـه فـــي لــــزوم=بـذل لـك فـي قضـاه المعـجـزات
وليمنـك نصيـتـه وأنــت ضـيـف=يـقـوم لــك بجـمـيـع الـواجـبـات
وفيـهـم مـــن يـزيــد الـهــم غـــم=ولا ينـطـح وجـيــه المـكـرمـات
واضعيف النفـس لـو مالـه كثيـر=سـواً بــه فــي حيـاتـه والمـمـات
واضعيف النفـس لـو مالـه كثيـر=عـن الطولـه شبـوره قـاصـرات
واضعيف النفـس *** ٍ مـا يفيـد=وجـــوده والـعــدم مـتـسـاويـات
بـخـيـل ٍ فـــوق دنـيــاه وذلــيــل=وعـن الامجـاد طبوعـه شــاذات
يقـولـه واحــد ٍ جــرب وشـــاف=وصـار يقـول عـقـب التجـربـات
علـى قــول الــذي بالـقـول فــاز=سبقني فـي العصـور الماضيـات
جــزا الله الـشـدايـد كـــل خـيــر=عرفـت بـهـا الـقـدا والمخطـيـات
وعرفت بها العـدو مـن الصديـق=جـزاهــا الله عــنــي بـحـسـنـات
فـيـا سـامـع كـلامـي لــك عـلـي=نـصـايـح كالـجـواهـر غـالـيـات
ولا أريـد الـجـزا إلا مــن إلـهـي=ثـــواب الله خــيــر الـجـايــزات
علـيـك بطـاعـة الله ذو الـجــلال=إلــــه الــكــون رب الـكـايـنـات
جليل الملـك ذو العـرش العظيـم=ومــن الأفــلاك بـأمـره دايــرات
مغيـث المستغيـث إلـيـا أستـغـاث=وقــهــار الـجـبـابـرة الـطـغــات
ولــي الأمــر عـالـم كــل شـــي=ولا تـخـفـى عـلـيــه الـخـافـيـات
مـحـب العـفـو غـفــار الـذنــوب=ولـه حسنـات الأسمـا والصفـات
وسـيـع الحـلـم رحـمــن ٍ رحـيــم=وعـفــوه واســــع ٍ للـمـغـفـرات
وهـو معبودنـا المحيـي الممـيـت=وعـلــم الـفـقـر بـيــده والـغـنـات
عليـك بطاعـتـه فــي كــل حـيـن=وقــم لــه بالـفـروض الـلازمـات
شهـادتـك وصـلاتــك والـصـيـام=وحــج الـبـيـت واداي الـزكــات
وبــر الوالـديـن احــرص علـيـه=وفـعــل البـاقـيـات الـصـالـحـات
وقل معروف وأنـه عـن المناكـر=وأتـق ذنــب رجــم المحصـنـات
ولا تـنـقــل كــــلام ٍ بالـنـمـيـمـه=وتظـلـم لــك نـفـوس ٍ غـافــلات
تـرى المولـى عـن العالـم غـنـي=ومــن طـاعـه يـنــال الأمـنـيـات
كـريـم ٍ لا عـطـا مـاهــو بـخـيـل=ومــداتــه جـــــزال ٍ وافــيـــات
ليـا منـه عـطـى جــزل العطـايـا=وهـو حـلال صعـب المشـكـلات
تـراه الـلـي لـيـا ضـاقـت علـيـك=يـفـرجـهـا مـجـيــب الــدعــوات
مــزيــل الــهــم رزاق ٍ مـعـيــن=عـلـى خلـقـه عـيـونـه مـرقـبـات
عظـيـم الـشـان حــي ٍ لا يـمـوت=مــديــم ٍ والـخــلايــق فـانــيــات
وكن مستامـن ٍ بـه وأمـش وامـن=والأقــــدار بفـلـكـهـا مـاشــيــات
ولا تـحــزن وعـانــد كـــل هـــم=ولا بــــد الـشــدايــد زايـــــلات
ولا شـفــت المـحـقـريـه بــديــره=فـلـرض الله فـجــوج ٍ واسـعــات
بــدل دار ٍ جـفـاك الـلـي سكنـهـا=اتحـصـل لـــك ديـــار ٍ ثـانـيـات
فحـث الرجـل وأرحـل لا تبـالـي=ولا تـبـقـى عـزومــك فــاتــرات
ودس بالرجـل غبـات المخـاطـر=ولا تحسـب احسـاب مخاطـرات
فـلا يجـري لـك الا مـا كتـب لـك=ولا يـاقــاك عــنــه مــحــاذرات
وهاجـر عـن ديـار الــذل تـربـح=وســافــر لـلـديــار الـنــازحــات
تـرى الأسـفـار سـجـات وغنـايـم=وكـــم لـلـبـال فـيـهــا تـسـلـيـات
تــرى الأسـفـار للـعـاقـل مـفـيـد=هتفـيـدك مــن جـمـيـع النـاحـيـات
تـعـرفــك الــرجــال الـطـيـبـيـن=ذوي ســاس العـلـوم الغـانـمـات
وتجـعـل هـمـة اعـزومـك قـويـه=وتعطـيـك الـــدروس الكـافـيـات
وفيهـا للمـعـاش أحـسـن وسيـلـه=وفـيـهـا للـنـصـيـب مـصـادفــات
وسـجـات النـفَـس فـيـهـا وفـيـهـا=لعمـر المـرء فـي الدنيـا طــرات
تحـرك فـي فجـوج الله الوسيـعـه=يجيـك الـرزق مـن كـل الجهـات
ولا ترضـى الكسافـه والمهـونـه=تشـوف مـن المعـاديـن الشـمـات
وتـرى عمـر الفتـى ماهـو بـدايـم=وتـرى آجـال النفـوس مـحـددات
ونـيـل المـجـد فــي قــوة الإراده=وطــلاب المـعـالـي مـــا يـبــات
يــدور للـعـلا لــو كــان يـتـعـب=وعيونـه فــي طلبـهـا سـاهـرات
فـــلا تـغـتـر بـالـنــوم الـعـمـيـق=تــراه يضيـعـك عـمـق السـبـات
تغـانـم دام لــك قــدر إستـطـاعـه=ومـا دام الفـرص لــك سانـحـات
وليمـنـك بـذلـت الـجـهـد فـأعـلـم=تــرى أرزاق العـبـاد امـقــدرات
فـكـن صـابــر وأقـنــع بالـمـقـدَرْ=ولا تـنـدم عـلـى مــا كــان فــات
تــرى الأرزاق مــا تـاتـي بـقـوه=ودنـيـانـا تـراهــا خـــذ وهــــات
ورزق الحي مضمـون ٍ وجـاري=إلـيــا حـتــى تـلاقـيـه الــوفــات
ولـكـن التسـبـب شـــي واجـــب=ومـن يـزرع سيجـنـي الثـمـرات
وتـرى مـن جـد لابـد انــه يـاجـد=كــلام أهــل العـقـول الزاكـيـات
وليمنـه بــذل جـهـده ولا أحــرز=مـرامــه مـــا عـلـيـه مـعـاتـبـات
ونـفـسـه مـــا يلحـقـهـا حـسـوفـه=بقـولـه مــا عـمـلـت مـحــاولات
الـيــا مـــن اللـيـالـي عـاكـسـنّـه=وحـظـه مــا سـعـى بمسـاعـدات
فـيـدري بـــان هـــذي دبـــرة الله=ويـبـقـى قــانــع ٍ بـالـحـاصـلات
وخير الناس مـن يعطـى القناعـه=ولا أشقـى مـن نفـوس ٍ طامعـات
وعنـدي غيـر مــا قلـتـه وصـايـا=على المعنى الصحيح امسيسـات
اليا منك بغيـت تصـون عرضـك=وتحـضـى بالمـزايـا الـكـامـلات
فـلا تمـشـي مـعـا الأنــذال دايــم=وسـايـر لــك رجـاجـيـل ٍ ثـقــات
ومــن لا شــاورك لا تستـشـيـره=ولـو عـنـد الـظـروف القاسـيـات
وكُن صامت فإن الصمت حكمـه=وهـيـبــه داخــــل المجـتـمـعـات
وكُــب الثـرثـره بـالــك تلـجـلـج=فـلا يبقـى علـى هـرجـك شـفـات
وكثـر الضحـك نقـص ٍ بالمهـابـه=فــلا تضـحـك بــدون منـاسـبـات
ولا تنطـق بغـيـر الـصـدق دايــم=ولا تـبــدي اهـــروج ٍ كــاذبــات
وكُــن متـواضـع ٍ بـالــك تـكـبَـر=وخــل أخـلاقـك دايــم عـالـيـات
ولا تشكي علـى حـي ٍ سـوى الله=اليـا شفـت الظـروف معاكـسـات
ولا تبـدي عـلـى الأنــذال ســدك=ولا بــــد الـشــدايــد زايـــــلات
ولا تنسـى علـيـك بحـفـظ حـقـك=تـرى لـيـس الـكـرم بمناضـحـات
وعن التبذير صُن مالك يصونـك=اليـا جـات الـظـروف القاسـيـات
تـرى ماكـل مـن يضحـك يفـيـدك=الـيـا صــارت يـديـنـك خـالـيـات
وعـز الجـار فــان الـجـار قــدره=علـى المسلـم مــن المستلـزمـات
وظيفـك بـش فــي وجـهـه وقــدم=لـه المـاجـود حـسـب المـقـدرات
وحــذراك الخيـانـه فــي خـويـك=ولا تـرضــى عـلـيـه محـايـفـات
وحـذراك الـغـرور أول شبـابـك=تـرى طـرق الغـرور مضيـعـات
وليـا ثــار النـشـب بـيـن المـقـرّد=فجـنـب والـعـواقـب مـرضـيـات
ولا تخـطـي ولا يخـطـى علـيـك=وبـالــك تـعـتـرض للمـعـرضـات
وليا جـاك الخطـا مـن يـم جاهـل=فــــداره بـالـهــروج المـقـنـعـات
لعـلـك تقنـعـه بـأحـسـن وسـيـلـه=وبـيـبــان الـحـمـاقـه مـقــفــلات
وان لــم يقـنـع الجـاهـل بـعـذرك=وأمــــوره شـفـتـهـا مـتـوتــرات
فكـن عـاقـل وحــذراك الجهـالـه=وحــسّــب لـلـقـوافـي قـافــيــات
ليـا جهـل الجهـول العقـل ضــده=فــلا تحـسـب لأمــور ٍ مهـمـلات
مضى وقت الجهل وأقفى وولـى=مـعـا غـبـر السنـيـن الـمـدبـرات
وليـا مـد الجـهـول ايـديـه عـامـد=وصــارت مــا تـفـيـد مفـاهـمـات
فحـاول تقنـعـه فــان كــان عـانـد=فـــلا للـنـكـر غـيــر المـنـكـرات
وردع الجهـل مـا يحسـب خطيـه=ويحسـب مـن الأمـور المقـديـات
خصوصاً لأنتهى مقـدار صبـرك=وشفـت مـن الخصـيـم معـانـدات
فـلا يرضـى عـلـى نفـسـه مـذلـه=يكـون الـلـي عـزومـه ناقـصـات
ردي الخـال *** ٍ وابـن هـامـه=ولاش ٍ والــروابـــع خـــــاذلات
وليـا منـه قضـى صبـرك وغلـق=وشفـت ان مالحـلـول بمجـديـات
فدافـع دون عـرضـك والكـرامـه=وخاتمتـك لـيـا مــا جــات جــات
والأجـل مقـدر ٍ والمـوت واحــد=والأنـفــس كـلـهـا لـــه ذايـقــات
ولا يـاقـى الـحــذر مـمــا يـقــدر=لا بـــد أحـكــام ربـــك نــافــذات
وهذا ما أستطعـت مـن النصايـح=نـصـايــح ثـابـتــه ومــوكـــدات
يـقـولـه واحــــد ٍ والـكـامــل الله=يوصـي ومـا عمـل بالتوصـيـات
أوصـيـكـم وأنـــا والله مـقـصــر=قـصـور ٍ مــا تغـطـه لأورقـــات
خصوصاً من جهة ما يرضي الله=وهــذا الـلـي بــه أكـبـر فـايـدات
عسـى ربــي يسامحـنـي ويغـفـر=ذنــوبــي الآتــيــه والـسـالـفـات
ولكـن ياهـل العـرف أعـذرونـي=اليـا قصـرت فأبـغـى المـعـذرات
وصلـى الله علـى المختـار طــه=عــــدد مانـسـنـسـن الــذاريـــات
شفيـع الخلـق فــي يــوم المـلاقـا=وكــل الخـلـق حافـيـن ٍ عـــرات
رســول الـحـق سـيـدنـا مـحـمـد=عليـه مـن الإلـه أزكـى صــلات

الشاعر حمد هادي المسردي القحطاني
(( رحـــــــــــــــمــــــــــــــــه الله ))



وشكراً.


اخيكم:AL.3rjane