ورد الشاعر الكبير عبدالرحمن بن بديع الواهبي الشهراني
وقال فالعجمان
البارحـه هوجسـت والجفـن مانـام=ومانع ولـد شلحـاط قافـه شعانـي
قضيت كل الليـل غنـى و درسـام=يومن هيضي مـن فراشـي حدانـي
قعدت احـط ارقـام وامسـح ارقـام=وعزمت اعسف القاف مهما عصانـي
حييت ياخـط بـك اخبـار واعـلام=اعداد من صلى وصـام ارمضانـي
ترحيبـة ن بنيتهـا بنـي الاهــرام=فيهـا عبيـر الـورد والقحويـانـي
صورت يامانـع لـي المشهـد العـام=والشـوق لبيـوت القصايـد دعانـي
قاف ابن قضعان وقاف ابـن وسـام=وقافك بقت في الشرق رمز ومعانـي
ثلاثة ن يطـرح لكـم راس الابهـام=وعسفتوا ابيـوت القصيـد اعسفانـي
ومدحت شهران ومعك عرف والهـام=ومدحـك دفعنـي لـردود وخذانـي
ودون اشهران اشيوخ وابدود والحـام=اقـول تسلـم واخـذ ردي عيـانـي
المدح في العجمان يلزمنـي اللـزام=امـدح رجـال ن فعلهـم ماخفانـي
لاجـا نهـار فيـه لـروح ســوام=تصمـد وتصـدم بلجنـوب المتانـي
ترد الحرايـب وردة المنهـل اهيـام=وتعدي على اظهور المهار اعديانـي
غاراتهـم اتعقـب امـوات وايـتـام=واهل الكرم وقت القسـى والليانـي
ياربع ابن حثلين يا اهل الوفـا التـام=اللي بقالـه فـي الجزيـره مكانـي
راكان بن حثليـن شاعـر وضرغـام=شيـخ شجيـع فـارس صيرمـانـي
عجزوبه الاتراك والشـرق والشـام=مشهور واشهر من سهيـل اليمانـي
شلفاه تشدي فـي المهمـات لا قـام=شلفا ذيـاب اللـي تفـض المحانـي
شيخ على العجمـان فـارس ومقـدام=ربعه هـل القالـه اطـوال اليمانـي
وال ناجعه نصيتهـا مدحـي اشمـام=زبـن الدخيـل امعربيـن المجانـي
وال ضاعن اللي صيتهم في الزمن دام=عـوق الخصيـم امرفعيـن المبانـي
قيدومهـا الدامـر محنـك وجــزام=الفـارس اللـي مارضـى بلهوانـي
اللي دمر مخلاص شمـر مـع يـام=يومـه رفـع سيفـه وجـر العنانـي
والملتقم لاما زهم عـوق الاخصـام=ال هادي اللي تقتضـي كـل شانـي
وال صالح اللي ترغم العاصي ارغام=ربع لبـن طفـلان مـروي السنانـي
وابن منيخر لا حصل حرب وزحام=هلل وكبر فوق سرج الحصاني
لا قال يال سفران دام الظفر دام =غصب ن على الحساد قاصي وداني
وال مفلح اللي تبرم الساحة ابرام =في الحرب لا جا لركاب ارزماني
ويبقى ل ال سليمان تاريـخ ووسـام=العـزوه اللـي مادخلهـا الهـدانـي
وابن عصيـدان بيـده القنـا السـام=اللي يجيله فـي الكبـود اقضعانـي
والبيض ل ال مصرا شجيعين واكرام=جماعة ابن وذين مـروي الضمانـي
وان صاح ابن مكراد للخيل ثم حـام=تفازعو ال محفوض له فـي ثوانـي
اللي بعضهم حل في الـرص واقـام=اهـل الجميـل امكرمييـن العوانـي
والبيض ل ال حبيـش ورجالهـا لام=اهل العلا اللـي ماتحـب الطمانـي
ربع الطويل اللي حكم حكم الاعـدام=فـوق الاعـادي والزمـن قلبـانـي
وجريس بن جلبـان لـروس صـرام=لا صيح الصيـاح والحـرب حانـي
وال شامر اللي لا كسى الهية اعسـام=تركـي لهـا مثـل البعيـر العمانـي
وابن زنيفـر فـي المهمـات همـام=يرد الوغـى يـوم الـردي مايدانـي
ومنصور بن مطلق لهم درع واحزام=ذرب اليميـن المنهـل الريهجـانـي
صيته بقى للنـاس عـام بثـر عـام=راعي كرامـه لـو يشيـن الزمانـي
ومواقف ال خويطر اكبـار واجسـام=حرابهـم يبطـي كسـيـر يعـانـي
وال ريمه اللي تشعم النيـره اشعـام=اهـل الفعايـل كاسبييـن الرهـانـي
في مدحي العجمـان مانـي ابمـلام=واثنيه لـو يزعـل فلانـي الفلانـي
ان جو مجالسهـم سلاطيـن وحشـام=وقوم شياطيـن ن اذا الوقـت شانـي
تاريخهـم سجلـه ابـواب واقـسـام=وبكل اللغـات يصوغـه الترجمانـي
قلته وانا ربعي هـل الموقـف الهـام=شهـران لا سـد الكضيـم اللسانـي
ترسي وتجعـل للعـدا حـد والجـام=مثل البوارج لا رست فـي الموانـي
وربعي بني واهب على جـور ليـام=سجلهـا التاريـخ رمــز وبيـانـي
فوق الرمك والجيش دكـه ودرهـام=ويبركـون الحيـل فـوق الصوانـي
ربعـي اكعـام للمعاديـن وخــزام=وتروي القنا والسيف وقت الطعانـي
تامن بهم طـراف وحـدود واقـوام=والـذود يامـن والغـروس المثانـي
تروح فرسـان العـدا منهـم اقـزام=وتفرهـم فـر الـرشـي لسـوانـي
واذا غزا الطماع في حمـر الانعـام=من فعلهـم بتصيـر عشـره ثمانـي
واذا غزوا دار العدا صارت احطـام=يشدون سيـل يجعـل الحـي فانـي
يشدون سيل جـارح ضكـه اعجـام=صوته يروع لاصفق فـي المحانـي
مثّلهـم الزلـزال فـي منطقـة بـام=يـوم اقتلعهـا مالبحـر لصفهـانـي
يطـول بيرقهـم علـى كـل لعـلام=مـن باسهـم يبقـى عيـان بيـانـي
ربع الفويه اللي العـدا منـه تنضـام=خيـال سبـلا يـوم مـس البطانـي
بشلفا تفض المخ لـو دونـه اعظـام=شيـخ الشيـوخ وفـارس مايهـانـي
من شاع لا بيشه بها اجموع واكـوام=وتمتـد شـرق لا حـدود اقحطانـي
اقصى جنوب ديارهـم دار ال خـذام=واسفـل منازلهـم نزلـه ادرعانـي
واليوم يامانع عليـك الرضـا التـام=منـا وتستاهـل اشحـوم السمـانـي
مدحة شيخـي والجماعـه والاعمـام=واظهرت مني واحـد مـن اخوانـي
وحنا ترا ربع وبنـي عـم وارحـام=وابغـي الروايـه واضحـه للعيانـي
والله يديـم الحكـم لـعـز حـكـام=ال سـعـود اموسسـيـن الكيـانـي
القاده اللـي طبقـوا ديـن الاسـلام=وفي حكمهم عشنا النعـم والجنانـي
مافيـه مظلـوم ولا فـيـه ظــلام=عدل وسعـادة روح وامـن وامانـي
لجل المواطـن حققـوا كـل لحـلام=وتحققـت لشعـب كـل الامـانـي
وتحفـظ ملكنـا الفـذ للامـه امـام=يارازق الجنـه ومعطـي الحسانـي
يامنـزل سـورة تبـارك والـف لام=ياللي كسيـت العظـم لحـم وبنانـي
هذا وسقت القاف ليـن اذعـن ورام=وانـا عطيتـك يـوم ربـي عطانـي
افخر وفاخر يابن شلحـاط فـي يـام=وانـا بفاخـر وافتخـر بشهراني
واقول الله لا يهين الشاعرين ....
وصح الله السانهم جميع
تحياتي المجازف