عندما وصل الى مسامع اذن الشاعر المعروف احمد الناصر خبر وفاة اعز ابنائه في حادث طريق اثناء مقدمه للسلام على ابيه جادت قريحته بهذه القصيدة المدوية وللتذكير القصيدة موجودة بصوت الشاعر احمد الناصر في شريط اسمه (عذب القوافي) وكاملة بالهجيني وبما ان القصيدة اعجبتني وربما ان البعض لم يسمع بها قلت انقلها لكم راجيا من الله ان تحوز على رضاكم...
نهار ثالث عقب عيـد رمضانـي&&& ناس(ن) عطاها الله وناس محرومه
احد(ن) قضا عيده سـلام وتهانـي&&& واحد(ن) توصله الكواكب همومـه
صادفت صدفه من صدوف الزماني&&& منها قوي الحيـل تفتـر عزومـه
هـذا زمـان الهـم والامتحـانـي&&& وقت(ن) على قلبي تعاقب سهومـه
الاولـه كامـل جميـع المعـانـي&&& مزبن المضيوم شـرع الخصومـه
محمد اللـي فـي القسـا واليانـي&&& عقبه سمايـا غايبـات(ن) نجومـه
والثانيه باقـرب قريب(ن)ودانـي&&& خامس عيالي يوم جتنـي علومـه
قالوا مابين الخاصـره واحلبانـي&&& ولدك مـات اللـي ترجـا قدومـه
جا يومه الموعود باربـع ثوانـي&&& قلت السبب قالوا دنـا منـه يومـه
علم(ن) على الكبدالصخيفه كوانـي&&& كيت عطـب ماتنشكـي للحكومـه
تهشمت كـل الضلـوع المحانـي &&&مفجوع والمفجوع محد(ن) يلومـه
اخذت لي ساعه وانا فـي مكانـي&&& حسبت لى عشرين طيحـه وقومـه
الى بغيت الهـرج يبـس لسانـي&&& والذاكره عنـدي تقـول أمعدومـه
قمـت اتلفـت واتسمـع بـأذانـي&&& من شاف حالـي ماتهنـا بنومـه
مما بقلبي رحـت بالليـل عانـي&&& للموتر اللـي مابقـى الا رسومـه
عن روحتي ياليـت ربـي نهانـي&&& ولاشفت دمه سايحن فـي هدومـه
قمـت ودفنتـه والله المستعـانـي&&& في خرقت(ن) بيضاء عليه محزومه
يـم القويعيـه بـلاد اقحطـانـي &&&والحر غير لون وجهـي سمومـه
واقفيت من عنده وعشـري ثمانـي&&& مثل المصبـح والبـلاد امحكومـه
طاوعت نفسي مير عقلـي قوانـي &&&عن الخطاء مافيه نفس امعصومـه