[قبلةالعجمان]

ليش الدمع يا قلبي ؟! ترى دمعكْ عَلَيْ غالـي=أنـا مالـي بهَالدنيـا سِـواكْ أحْـدٍ يواسينـي
دخيلكْ حتى لُو صاحَتْ جروحكْ ترفُـقْ بْحالـي=أخافْ صْياحَهـا يحْـي جـروحٍ مَيِّتَـهْ فينـي
صِعيبهْ و الله هالدنيا علـى مثلـكْ و أمثالـي=صْغارٍ عَالحِزنْ لكنْ أبَـتْ تسْتوعِـبْ سْنينـي
سِقَتْني المُرْ في عُمْرٍ شرَبْ بَهْ غيـري الحالـي=و كِلْ ما صِحْتْ يا دنيا ذبحْني المُرْ .. تسقيني !!
وحيدهْ عِشتْ اْنادي الفَرْحْ لِجْروحي و لا جالـي=رَحَلتْ بْكِلْ صُوبْ و ما لقيـتْ إللـي يداوينـي
و تراها ما غَدَتْ تَفْرقْ مَعي لُو طـال تِرْحالـي=أنا أصلاً سِكَنْتْ الجَرْحْ و ضاعتْ بَـهْ عَناوينـي
عَشقْتْ الحزنْ مُو برْضاي ْ.. عيَّا الوقتْ يصفالي=و يومْ إنهْ رجَفْ دَمعي ذِبَحْتَهْ في وَسَـطْ عينـي
لَكْ الله وشْ يفيد الدَّمعْ وْ لُو هُو سيلْ مِتوالـي=لك الله .. إمسحْ دْموعَكْ ترى هالدمْعْ يشقينـي
مِصير جْروحِنا تذبَلْ قِصَـرْ هالعُمـرْ أو طالـي=و إذا جرحـكْ أبَـى يبْـرى بَضَمِّـدْهْ بْشراينـي