صبح العمى متعلق بصوت عصفور
لو ما يشوف الشمس يوجس شعاعه
يا صاحبي في كل الاحوال مشكور
بس ابتعد والوصل خله قطاعه
بعدين تدري ليه انا كنت مقهور
ليا لاعك اللي بالهوى القلب لاعه
ما احد على الثاني ترى اليوم مجبور
وكأنه على النسيان عندي استطاعه
خوفي عليك العام بي مات مذعور
واليوم خوفي منك أكبر شجاعه
دام الغلا يجرح انا فيني شعور
انا على الهفوات كلي مناعه
كرامتي فيني لها كلمة الشور
سرت بدمي مع حليب الرضاعه
يا صاحبي معذوور انا وانت معذووور
ما يجتمع مغلي ومرخص بضاعه
قل ماتبي ما بقى شي مستور
زولك وشفته في عيون الجماعه
ان قلت لي مغرور مغرور ..مغرور
لكن تأكد ان غروري جزاعه
بس عاد قلي دون ما تلف وادور
وش استفاد السيل من جرح قاعه
انت القمر لكن اليا صار مبتور
زينك بقى والعرف ابحر شراعه
(لو كان ذنبك جرح هين ومغفور
بس ان جرحك ذنب ماله شفاعه )