يا لله اللي اوجد ابن آدم وشكّل لونه
واحسن التقويم في خلقه ميه بالمية
احمده واثني عليه الدوم واطلب عونه
يغفر ذنوب غدت نفسي بها مبليه
في زمان التقنية والعولمه المجنونه
انكشف ستر الحجاب وبانت المخفيه
غيرت عند الكثير الفطرة المسنونه
لين شفنا الرجل يتمغنج تقول بنيه
يلبس الضيق ويتمكيج ويمشي هونه
والشعر مدهون والقصه بعد غربيه
وان لبس له ثوب جره جرة المزيونه
والكموم طوال تستر كفه بحنيه
والبنيه شالها التيار فوق متونه
كنها في ديننا منبوذة مرميه
قامت اتردد كلام الشله الملعونه
اعطوا البنت الضعيفه كامل الحريه
أي نعم حرية تحفظ شرف وتصونه
لكن المقصود ما هو بالسهوله ذيه
الهدف دين يبون يعطلون اركونه
والبداية اصلها الحريه الشخصيه
هي درت أو ما درت عن مكرهم وفنونه
خطوه بخطوه وتصبح حالة مرثيه
والشواهد بينه للي تشوف عيونه
في الوسايل كلها مشهوده ومقريه
تجرح الرجل الغيور تثير فيه شجونه
ويطلب الله لا تصيبه حالة نفسيه
واقرب الأمثال عندك في البلد وركونه
لاتكرر نظرتك للصوره الرمزيه
فتنة يا صاحبي للي هواه يخونه
والله اللي حطها ما حاز غير السيّه
يا لله جنبنا جميع العولمه المجنونه
واحفظ البنت العفيفه من وحوشٍ حيه
والصلاة اختام قول بالحشا مكنونه
عد ما ينبت على سطح الكره الأرضيه
وعدّة حروف المصاحف والذي يقرونه
عالنبي الهاشمي خير البشر كليه