ياقلب جيتك وافهم العلم ياقلب
اللي تحبه مغرم بحب غيرك
كم قلتلك ياقلب خله على جنب
يمكن مسيره يستوي مع مسيرك
الدرب واضح بس لاتجهل الدرب
اللي يحبك دايم ٍ يستشيرك
ماهو مثل صاحبك عايش على الكذب
وان ماكذب يموت الله يجيرك
تبي الصراحه مالك ومال هالقرب
ماهو كفو شرواه يصبح عشيرك
انا ادري انه ترف ومدلع وذرب
لكن مصيره يختلف مع مصيرك
لاتحسب إن السالفه كلها لعب
اصحى معي من شان يصحى ضميرك
اللي تحبه صعبه شوي ينحب!
قله بروح وكثر الله خيرك
تدري وش اللي يذبح القلب ياقلب!
إنك تحب إنسان ويحب غيرك
تركي الديحانــي