حان السفر ودعتك الله وصديت وذرفت دمع العين لفراق غالي
في صالة الركاب حاولت واخفيت اني معك ياالشيخ حان ارتحالي
ارحل عسى التوفيق فالك ليا اقفيت وانا بعدك اعيش همّ الليالي
اوميت لك باليد وانت لي اوميت في لحظة ً مدري وش اللي جرالي
واقفيت عنك اجر مر التناهيت اللي لها باقصى المعاليق صالي
جسمي بقى عقلي معك راح تشتيت وتبقى على طول الزمن في خيالي
اهتز قلبي بين الاضلاع واضحيت في لجة العالم وحيداً لحالي
والله فقدتك كل ما اصبحت وامسيت البيت بعدك كنه القفر خالي
اربط حزامك يوم للحمل ركيّت واصبر عسى يحفظك رب الجلالي
خلك على الهقوه بعزمك تعليت فوق النجوم ارفع بهامتك عالي
انت على علوم النشاما تربيت والمرجله تنزع لها ما تبالي
حافظ على دينك بكل المواقيت صل الصلاة وركعتين التوالي
واحرص على سمعتك يا عل ياليت ترجع واشوفك ياكريم السبالي
ومتى بشوفك يفرح البال لاجيت وارمي عليك بغترتي مع عقالي
وان جيت وان قالو لك اني توفيت قبري تزوره يا عزيز العيالي
سلم علي اسمعك لوانني ميت واقف بقبري مفتخر يا حلالي
اصبح زماني آه هّم وتناهيت واخفي همومي لاجواب لسؤالي