الا ياشمعة ضوّت بدربي كل شـي زيـن
لا يامهجة الخاطـر الا ياعطـر اوقاتـي
الا يا سمحة الخاطر ترا قسوتك عندي لين
وقولك ياحبيبي لي تزيل الهم عـن ذاتـي
ابوصفها وش اوصفها ملاك كامله بالزين.
وزاد الله حلاها يـوم صورهـا بنظراتـي
جمال الغيد في كفة وهي زادت بعد ضعفين
خلق مع دين مع رقّه وصبر فوق طاقاتـي
انا داري دواويني بتعجز عن سداد الديـن
واحس اني مقصّر لو كتبت الشعر وابياتي
عرفتوا من لها ابياتي ومن هي سيدة الحلوين
هذيك أمي ياهيه امي لها بالقلب نبضاتـي
انا قصّرت يايمه وابي منك سمـاح وليـن
وغفران الزلل يمّـه وانـا عيبـي بزلاتـي
انا مابي سوى جنه تحت رجلينك الثنتيـن
وابي ترضين عن ولدك وابي تمحين غلطاتي
أنا لي قلب يايمه وبي خوف ولـي كفّيـن
مادامي حيّ يايمّه ابأدعـي لـك بخلواتـي