طلبتك خذ قلبي معك لا تخليه
اخذه ترى ما عاد لي فيه حاجه
لاصرت عني مبعدٍ ويش أبي فيه
خله معك مادام صعب انتواجه
أول خفوقي صوتك العذب يحييه
واليوم ما حصلت غير انزعاجه
نوره طفى من عقب ما كنت مضويه
عقبك خفوقي بات مطفي سراجه
مالي مزاج أحب غيرك وأحاكيه
حتى لو أني كنت داخل مزاجه
غلاك مهما كان ماني بناسيه
منساه لو غيرك ضحك لي حجاجه
أنت بحياتي وين مارحت ألاقيه
ألقاك في حزن العمر وابتهاجه
أموت في جرحك وأحبه وأداريه
وخايف مع الأيام ألقى علاجه
كن النظر من يوم ما غبت معميه
أحرجت قلبي وأنت سبه احراجه
كمل جميلك طالبك لا تخليه
اخذه ترى ما عاد لي فيه حاجه