قصيدة المقدم فيصل بن خلف بن هذال العتيبي
بالمرحوم المقدم راجح بن ناصر بن منيعه العجمي المنشورهـ بجريدة الرياض يوم الاثنين
ورد اخ المرحوم محمد بن منيعه
القلب يحزن والفراق ادماه
والجفن ينثر فوق خدي ماه
والحزن مثل الليل الاظلم بوحشته
ساطي وعيا النور لا يجلاه
يوم الثلوث الصبح والنفس ساليه
جاني خبر فاجع عجزت اقواه
من قوة الموقف ومن راعة الخبر
اخذت اردد رحمتك يالله
عفوك وغفرانك وسترك ورحمتك
ياللي لك المسلم يحث اخطاه
اقنب قنيب الذيب في خرمس الدجى
لا جاوب ذياب الخلا بعواه
والدمع ماينفع ولا يدفع القدر
ولا يرجع اللي غاب عن دنياه
فقدت ابو ناصر وفرقاه موجعه
لاوالله الا فاجعه فرقاه
مرحوم يا رجل المهمات والعمل
اللي على وضح النقا ممشاه
مرحوم يا رجل المواجيب والظفر
اللي على صدر الوفاء مركاه
رحل عن الدنيا وقفّت ركايبه
يالله عسى جنت عدن مثواه
ويالله عسى قبره يضمه ويحضنه
ضمت حنون ولا تضيق ارجاه
ويالله عسى نو المخايل يباشره
الغيم ظله والمطر سقياه
يسقي ثرى قاع بها راجح اندفن
شرق البلاد بعيد عن مرباه
ويالله عسى الفردوس داره ومنزله
وياخذ كتاب اعماله بيمناه
يارب صبرني وهون مصيبتي
واجبر عزايه يا عزيز الجاه
بيني وبينه رفقة اخوان مبطيه
عشرين عام وخوتي وياه
خوة رجال تخدم الدين والملك
وتخدم علمها والوطن تحماه
رغم الفراق ورغم موته وغيبته
تبقى على مر الزمن ذكراه
&&&&&&&&&&&&&&&&&&&&&&&&&&&&&&&&&&&&&&&
رد اخ المرحوم محمد بن منيعه
يا الله طلبتـك ياعزيـز الجـاه =
ماخاب عبـد ٍ يلتجـي بحمـاه
يارب يامعبـود يافـرد ياصمـد =
ياللي لعبـدك تستجيـب دعـاه
تجبـر عزانـا فالفقيـد الغالـي =
وتصبـر المبلـي علـى بلـواه
لاهنت يا فيصل ولد شاعر الوطن =
خلف ولد هـذال وجـه وجـاه
ماهوب مستغرب على مثلك الوفا =
لأن الوفا من ساسـه ومجنـاه
هيضت عين مابعد جف دمعهـا =
وذكرت قلب مـا نـوى ينسـاه
مالوم عينك لو بكت طيب النبـا =
تنعـاه واللـي يعرفـه ينـعـاه
راجح حريب البخل والذل والردى =
راجح حليف الجود فـي عليـاه
لـو فالمنايـا يالعتيبـي فديـة =
أرخصت كل العمـر لـه يفـداه
لاشك هذي حكمـة الله وقدرتـه =
واللي كتب رب السمـا نرضـاه
شرواك منهم يحفظـون الخـوة =
ياطيـب وقفـات الوفـا طيبـاه
ننشر لكم في راس مابان رايـة =
بيضا ترفـرف بالوفـا مهـداه
وألا الشعر مانيب طرب لمثايلـة =
لأني عقب راجح نويـت أجفـاه