[مـمـلـوحـ القـصـيـد]

يامرحبا بك مثل ما سلمت واهديك السلام=عد الحروف اللي نطقت بها السلام وقدها


يامرحبا بك والعيون الخرس داخلها كلام=والكلمه اللي تستحي منها دواما بدها


قلها ولو هي كالسهم صاحبك ضاري بالسهام=كم صوبت صوبه سهام وكم بصدره صدها


قلها وريحني قبل تصحى بك جروح نيام=تعبت انومها لعل النوم يحفظ سدها


اخاف لاصحيتها ترقص لها بنت الغمام=لامن لمع براقها قال الرعد خذ ردها


اشوف كنك غارق باللهم ولا مستهام=ولا تبي تعرف خفايا النفس واللي شدها


خذ عندك اللي ماتعرفه والعلوم لها زمام=واللي فلت منه الزمام اكثر علومه هدها


صاحبك تعجبه الجميله حد مبداها احترام=لكن ليا شاف التغلي ماطلبها ودها


قوى روابط عزته وايقض لها حرب الخصام=ولا انهزم قدام ضحكتها وبارق خدها


لو تكتسي حله حنان من قدمها لا البهام=مالينت قلب قسى ضد الحنان وضدها


الا حنان امه خضع له واستلذ الانهزام=قبل قدمها وانحنى قبل يقبل يدها


صاحبك لامنه جفاه النور ماهاب الظلام=اشعل قناديل الثقه بالنفس واشعل ندها


ساق المطيه للوفا وادرج يمينه للخطام=وان مال عنها شدها عجل وعد ل شدها


ولا رجا المنان والدنيا حطام في حطام=لبو صلايب مدة المنه لبو من مدها


له شور ابلغ عند نفسه من مضاريب الحسام=وله عزم اقوى من جفا بعض النفوس وصدها



لاصار شور الرجل ما يجلى عن النفس العسام=ياعل شلفا القوم تطعن فيه لآخر حدها


وان كان محصول التعب ماسد حتى للحمام=في ذمتك وش فايده يمنى الفلس من كدها


لاينشغل بالك على مثلي ترى ربعي كرام=لكن معك بالله رساله للعواذل ودها


العاذل اللي لامني ماله على مثلي ملام=عليه يبني لومته وانا علي اهدها


وان كان مافاد الهداد الضرب في الميت حرام=انا مسكت نصابها خله يلاوي حدها


اشوف كن الليل قرب يرتخي عنه اللثام=وانا علومي لاتزال يزيد عندي مدها


تعال ابا قول لك شي واضح قبل الختام=ابيك تفصل به سواليف الهزل عن جدها


والله لو اخسر مابقي بالعمر مارجع للغرام=وانا ليا من قلت كلمه والله اني قدها

ممّا راااق لي