صح لسان ابو ناجع
وهذي قصيدته
في مجلس الحكام كفال الايتام=اهل النزاهه والوفا بالوعودي
خمسة عشر شاعر يعدون مادام=للمدح فكرة تستحق الجهودي
كله لجل شيك(ن) تحليه الارقام=ماهو على كف المعزب يكودي
ياشيخ ماجيتك من الوقت منضام=ولاجيت ادور مابغوه القعودي
مرباعي السبسب ومقياضي الشام=ولاعطينا ماخذينا ردودي
والمنه لمنزل تبارك والانعام=ولا البريه مدها مايفودي
ياشيخ صرنا في رذيلات الانام=ورزال الانفس عزها في صعودي
من كف لطام الى كف لطام=وسيف العروبه بايرن مايزودي
عزاه ياسيف الزبير بن عوام=وعزاه ياحمزه نطيح الاسودي
وعزاه ياجيش(ن) مغازيه قدام=عدا جبل طارق وعيا يعودي
ياشيخ حط التعبئه من ضنا يام=والله مايبقى في الاقصى يهودي
ياشيخ وزع ذالاباتشي على هشام=وعلم بني عمي فنون العمودي
عنز كما عنز علي عز الاسلام=في موقف فيه المنايا تجودي
على رجال لاقبلت سود الايام=ماهي عن جموع التلاقي صدودي
غريرهم ياطى قبل سير الاقدام=على جبين المستبد اللدودي
وكبيرهم فعله قبل عهد الامام=قبل الفيافي ماتعرف الحدودي
ماشاف كتيوشه ولا شاف غسام=ماشاف كود مسننات الهنودي
درع(ن) يذري لو زبن فيه صدام=سيفن يجري لسطفاق الحشودي
هذي علومي ياكفيلين الايتام=ماجيت ادور مابغوه القعودي
والقصيده طويله