[خالد_الخالدي]

السلام عليكم ورحمه الله وبركاته


كل واحد من له ذكرياته يوم كان صغير .....

من الذكريات اللي ما اقدر انسها(( القاري))

كان ابوي الله يول فيه عمره مانع اي واحد من اخواني انه يشتري قاري ورافض الفكره نهائيا

وانا حبيت اني اشتري هالقاري اللي صار حتى بالحلم معاي

قزرتها على الربع كل شوي دوره وفره وبيني وبينكم طحت بجبدهم وماقامو يعطوني لادوره ولا حتي يردفوني معاهم.....


وجمعت فلوس من العجوز دينار ومن جدتي ديناربن ومنا ومنا لين شريت قاري مستعمل

طبعا شريته الظهر حتى الحزه كئيبه

وعليها والله للساعه 11 بالليل مافيه شارع مامريته ابي اوري الناس ان عندي قاري صج كان لونه

خضر يفشل بس كأني راكب رنج

ورديت البيت متليش من التعب والله لياقه بيوم واحد وصلت البيت لساني عند الصنقل من التعب

من قرادتي خليت القاري بالحوش.....

قعدت الصبح ابي احلل القاري ولقيت الشي اللي ماكنت محسب حسابه

مثل مايقول محمد عبده (( حلم كبير في لحظه انكسر ))


اول شي شفته سكان القاري ...وكل قعه منه بصوب

سألت منو اللي كسر القاري قالو ابوك
واعصب واكسر الدنيا واهاوش وحالتي حاله وفجأه سمعت صوت الشايب يناديني خويلد

سم طال عمرك ...
قال القاري من قاريه
من امه طبعا جحيد
قلت قاري فيصل ولد عمي ((للعلم فيصل من كثر مايحب النوم وحده يصير مخده))
قالي وشجاب قاري فيصل عندنا

قلت امس جانا وخلى القاري يوم انه يبي يجي اليوم وياخذه
ولوى اذني وقال ... علم فيصل لا عاد يشتري قاري تراني اكسره على راسه
ودق الحين على بيت عمك وعطني فيصل
حشرني حشر
دقيت والحمدلله محد رد
انا اول مره اشوف طراق بنص الوجه اللي اعرفه طراق على الخد او الاذن ابوي طراقه بنص الوجه

عقب الطراق قال والله والله والله اني لقيتك راكب قاري اني لا أقبض روحك

عاد ابوي الله يعافيه عليه طراقته ادوخ

ومن يومها تبت من القاري ...... واللي يبي يزلقني عند ابوي يقوله خالد راكب قاري


وللحين ودي اشتري قاري <: ودي احقق هالحلم

ودمتم سالمين

خالد الخالدي