يامل قلب ٍ يسـج وفيـه دولاجـه=من واهج ٍ بالضماير قـام يدرجهـا
ماغير اهوجس تقول مضيّعٍ حاجـه=وآخذ وآسند على روحي واهرجهـا
في معزلٍ عن جميع الخلق وازعاجه=ما اسمع من الناس لوتكثر لجالجها
وادوج لوكـان مارجلـي بدواجـه=ادلّـه النفـس ليـن الله يفرجهـا
يالله ياللي بيدك الضيـق وافراجـه=ياخالق الخلق ياقاضـي حوايجهـا
تفرج لعينٍ ليا نامت بسوهاجـه=تجهز عليها الطواري لين تزعجهـا
بالصدر ضيقه ونوم العين هملاجه=عيني من العام والسهر متولجها
نوبٍ سهرها شديد ونـوب نهاجـه=ومرٍ تكن الدمـوع ومـر تزعجهـا
عليك ياللي بقلبـي كـنّ وهاجـه=وهّاج نارٍ هوى الغربي يسارجهـا
ابو ثمـان تشـاد اللولـو لعاجـه=كن البرد يوم يضحك في مفالجهـا
ياروح روحي وجرح القلب واعلاجه=الطف بحالٍ عليك الهـم ساهجهـا
قلبي يناجيك بسلوب الهوى ناجـه=يشكي لك الحال داخلها وخارجهـا
اما التفت لي وتم الوصل بمواجـه=والا بـلا عشـرةٍ هـذي نتايجهـا
وش ينفعك من حنين القلب وخلاجه=وجروحي اسبابها انت ولا تعالجها
الشاعر/ عبدالله بن عون رحمه الله