[64]
ماعلي خلاف اقول اللي ابيه
من فضل ربي علي اني قوي
الا حبك شي ما اقدر عليه
كن حبك ضيف والقلب بدوي
انت بس اللي ابيه ولا اجيه
عنك حظي لاوي ذراعي لوي
صرت لي مشوار لاجيت ابتديه
ان لقيت الدرب ضيعت الخوي
رد يامنهو حياتي في يديه
لا تخليـني وانا لــك مـهتوي
ان خسرتك وين ابلقا لك شبيه
وانت من كل شي نادر تحتوي .؟
وين رايح جعل هالزول افتديه
وانت خابرني من البعد انكوي
انت حتى الجرح منك اشتهيه
من غلاك اضمى عذابك وارتوي
انت لا سولفت ماكني هنيه
التزمت الصمت كني منطوي
ليه اسولف لك وهي من غير ليه
تعرف انك تطوي احزاني طوي
انـت حبـك شي ما اقـدر علـيه
كـن حبــك ضـيف والقـلب بــدوي