[@ فــهــد @]

في النهايه اود ان اختم بقصيده اعجبتني ولم اجد ما يوازيها

لشاعر ما يخفى عليكم هي معلقه ثامنه في زمن لا نجد فيه الكثير

اتمنى ان تكون مسك الختام وأن تتمعنوا بالابداع الذي تمتلكه هذه القصيده

وهي للامبراطور ضيدان بن قضعان

نسناس الشمال

يا وجودي كل ما هب نسناس الشمال=وجد من حده زمانه على اللي ما يبيه
و يا وجودي كل ما أضحيت ثم مال الظلال=لا غفت عيني و لا ذقت شي مشتهيه
وجد من قفى و هو في رجا كلمة تعال=والتفت من عقب ما أقفى و لا احد لد فيه
و ياعذابي لا دنا الليل من روس الجبال=وأنتهى يوم من العمر ما عاد أرتجيه
وأنتي أبعد من سما الحلم و وصالك محال=يا بعد من هل دمعي ضحى الفرقا عليه
ياغناتي لا تحسبين دمعي يوم سال=ضعف و لا خوف و لا كذا ولا كذيه
والله اني من رجال يضدون الرجال=لكن الحظ الردي ساق دمعي كل أبيه
والله اني كل ما دار حواليك الجدال=قمت كن الموت يشر على قبري بديه
والله ان قد لي و أنا أصد لا جالك مجال=صدة اللي لا تضايق تذكر قبر أخيه
ومن سألني قلت مدري و اذا عاد السؤال=قلت له تكفي سؤالك ترى ما هو وجيه
وش تبي أقول عمن ترى ذبحي حلال=والخطا منها علي صرت أحبه و أهتويه
عذرها لو ما تعذر مثل و أضرب مثال=واحد ما يعرف الحر الأشقر يشتويه
وأن رجعنا للتواصيف لله الكمال=لنتهى ليل المزايين جاتك تبتديه
كنها غفل مع البدو طاويها الحيال=ما يميز وصفها الا نبيه من نبيه
واهني اللي وصلها وذاق الزلال=رشفة مع غفلة الناس من فيها لفيه
وعزتي للي سواتي عشق ما لا يطال=ويوم طاله ضيع الحلم بين أمه وأبيه
يا أول أحلام الطفوله على حد الخيال=الرجا بالي حمى البيت من حملة بريه
حال دونك سيف عنتر وتاسع الحول حول حال=بثر حول حال دونك و أنا أدعي هيه هيه
هيه ياللي غرك الحسن و أطغاك الجمال=والله ان اموت ما شفت لأوصافك شبيه
لو يسام الحسن والتيه بجنيه و ريال=ما بقى في سوق غيرك ريال ولا جنيه
كيف أهدك للمقادير و أنتي راس مال=راس مال و مال و المال ما يعطى السفيه
حافظك حفظي لعيني و رمشي لك جلال=وأنتي تشحين بالما و أنا شفي مويه
شايف ظلمك و ساكت و طال الليل طال=لا تركتي طعن قلبي و أنا ما قلت ليه
لو بقى للهيل صبر على فوح الدلال=ما بقى للقلب صبر على شي يجيه
كنت أحسب أن الغلا زال و أثره لايزال=فالحشا ما كنه الا دخيل في وجيه
ساقني حبك على الموت و سنيني هزال=والظروف أقسى من الظلم للعرض النزيه
و أنتي تسوقين عقلي على حد الهبال=تحسبين أن من بغى شي يقدر يشتريه
ولا أنا يا وجد حالي وجود ما يقال=وجد من ضحى بغاليه لرضا والديه
و يا وجودي يا أول العمر قبل ألبس عقال=وجد من باع آخر العمر في رغبة ذويه
و يا وجودي كل ما هب صوتك من شمال=وجد من حده زمانه على اللي ما يبيه

في الختام اتمنى اني كنت خفيف عليكم ولا ثقلت

ودعواتكم لي بكرة مسافر وأشكر اختي حظي بري على اعطاء الفرصه لي واشكر الاخ راكان مره اخرى

واتمنى الردود تكون صريحه اكثر من مجامله وشكرا

اما المايك فأنا ما فيه احد طلبه مني ولذلك اعتقد اني برده حق اختي حظي بري وهي بكيفها

.
.
.
انتهى