مســّاكم الله بالخيــر ،،، نلبس بدلة الغوص .. وانتبلـّل اشوي من بحر الأدب والسوالف عقّـب صبـيّ ٍ مايعـرف المعاريـف= ماهوب يفقد ميـت ولا ينذكـر حـيّ واللي وقد ناره من الخوص والليـف= لامدفـيٍ عمـره ولا منضـجٍ نــيّ المدّعي تكشفـه صعـب المواقيـف= (والعيّ عيّ ولين يفنى وهـو عـيّ) من قال: أنا يا أهل الركايب لكم ريف= يفعل مثل "بوخوذه" و"حاتـم الطـيّ" الطيـب ياباغيـه دونـه تكالـيـف= ماحاشه اللي من خلق ماخسـر شـيّ القصيده ذي تذكـّرني بالمثل أو السالفه المشهوره اللي تقول " كسـّر شداده و أرنبه رابضه " هذا اللي يسلـّمكم .. مسافر .. و على ذلوله وذابحه الجوع .. ويشوف تيك الأرنب .. كنـها نازلتن له من السماء .. وينزل من ذلوله .. واشوي اشوي يدرّجها ليـن ثبـّت مكانها ومربضها .. ومن شدّة الجوع ماقدر يتحمّـل الرجّـال .. فـ راح يدوّر خشيبات يشبّ بها ضوّه ... تمهيدا لـ شوي وجبة دسـمه تسكت صرخات مصرانه ! وتخمـّه القلاع .. والله مدري عاد هي قلاعه والا هرمون الغباء بدأ يمارس طقوسه ويفرز بكـثـره ! ويعوّد على ذلوله ويحوّل شداده ويكسـّره ويولـّع فيه ويشبّ ضوّه .. يوم عــوّد على أرنبه الا هذا مربضها !! ¥ ¥ بما أن حنا جبنا ذالسالفه .. طرت علي ذلحين سالفه قديمه بس مهيب عن الغباء ! عن الدلاخه ! .. أو عن الدباشه !.. أو يمكن لو كان فيه علماء نفس وقتها يمكن يحلـّلونها أكثر ويحطون ايدينهم ع الجرح !. الوكاد هذا رجـّال ومرتــه في بيتهم ويسـّير عليهم ذاك الضيف .. ويامرحبا ومسهلا .. وعقب الترحيب . . رح الرجـّال يجيب كرامة ضيفه .. وما أن جابها حتى شاف مرته تشـّر له !! وش العلم يا مره !؟ السكاكين اللي عندي مهيب منسنـّه ولا تقطـّع اللحم ! ! الرجال : وش الحيله !!؟ طيـّب روحي لقصرانا هاتي منهم سكاكين وان ما عيـّنتي هاتي مسنـّه(مهيب حقت بحر ).. و لحدن يبطي علينا !! المره راحت .. وصادف أن قصراهم كان عندهم حفــل .. مدري عاد هو عيد ميلاد والا احتفال نجاح والا وشهو؟ الوكاد انه حفل وبس .. ويقعد الرجال مقابل الضيف ..الا الصفره ختمت .. والمره ابطت عليه ! ويطمـّهم الليـّل .. والمره ما عوّدت .. وما هي الا لحظات حتى راح الرجال ودبّـر نفسه .. وجاب له سكاكين ! الحين يبي من يطبخ الذبيحه !؟ والهانم مهيب موجوده !؟ راح لها عند قصراهم .. الا الدنيا مشعلله وملعلعه !! يدوّر زول مرته بيننهم ؟! الا هي تيك يلمحها .. ويقعد يأشـّـر لها .. لكن ما حولك احد المره راعية واجب .. قاعده تراقص بنات ونسوان قصراها وما هي الا لحظات .. الا والرجـّال وسطهم .. طابّ(ن) على مرته ويراقصها ويقوم بالواجب هو بعد .. في منظر كله رومانسيـّه وحبّ لكل من يشاهدهم واثناء ماهو يراقصها .. الا الغيره والخوف على الرجال من عيون النسوان دفعاها إلى أن قامت تدعـّـس رجيله (يعني نعنبا ذالوجه وش جايبك عند النسوان) ! وقعدت تنشد وتقول : مضربح تيـسـنا الأضبح .. يضربح وسط معزانا ويقعد يردّ عليها هو والسكاكين اللي دبّر حاله وعيـّنها .. كان رافعها بأيدينه ويأشـّر لها فيها وينشد ويقول : أرعـينـي ميـر أرعيـني .. شوفي بــراق سكـّيني فهمت الزوجه الرساله شديدة اللهجه .. وطلعت مع رجلها ! السؤال أو ما يستفاد من هذي القصـّه : هو إنـّك لو كانت عندك حرمة كذا وصار لك مثل ذالموقف ! وش بتسوي؟ وكيف بتتصرف وتدخل على حريم يرقصن !؟ وهل تعتقد إن هذا تصرّف حكيم من الرجال عشان ينقذ ماء وجهه عند ضيفه ويضيع عند نسوان قصراه !؟ وللحديث بقيـّه ..