اطبخ قهاوي ثم اصف الفناجيل
واصبها لك وانت تمده للأجوار
دلة قصيدي والنصايح به الهيل
محموسة الحكمة وجديدات الأفكار
الصمت حكمة واحكم الهرج تهليل
والزّل نعمة دام ما صار تكرار
والمال نقمة لاجتمع دون تبذيل
وش خانة الارطا بلا شبة النار
والناس منهم من يشوفك كما النيل
ما دامه الظامي فهو دوم زوّار
والناس منهم من يشح التهاليل
وان غبت عنه صار يدعي بالأسرار
لي عادة(ن) كل ما تأخر من الليل
اجلس معي ثم اسأل النفس وش صار
اعتب على نفسي على بعض ما قيل
ويلومني عقلي على بعض ما دار
والقول يا قد ما طلع بالتساهيل
ويا صعب مدخاله على صدر الاحرار
يمزح وهو يجرح وهو قصده يسيل
دمع الفرح مير الحزن صار مدرار
يا صاحبي عفوك مدام العفو نيل
دام المنايا ما بعد جت بالأقدار
اسمح عن اللي قد مضى دون تعليل
وانسى خطايا من ملك فيك مقدار
يا صاحبي لا تمحي سنين في ليل
لا تهدم المنزل سبب شبر منهار
العمر قاضي والقضا دون تعديل
والزل وارد والردى شح الاعذار
والهرج واجد والرجاء منك تحليل
الله يحلل من بغى غير ما صار