[دوسري يحب العجمان]

المدح في من يستحقه يجي زين=يصوغ في ذكره وينقاد صوبه

في كل شهمٍ فالقسى فعله يبين=مواقفه عند الرجال محسوبه

مانافس اللي يكنزون الملايين=يسوق ماله دون حاله جلوبه

ياطالبٍ سلم الوفاء خلك يمين=المرجله ماهيب منك محجوبه

راع الوفاء يرجح بكل الموازيين=والناس يلقونه على ماهقوبه

لاأحتجت وإلأ إحترت من بين الامرين=ترى السنع لك بيناتٍ دروبه

إذخر لحاجاتك فروخ الشياهين=فعل الطيور تشوف فيه العجوبه

الشهم لاجاء واجبه يعجب العين=والحر لولا موقفه ماقنصوبه

والطيب كايد والرجاجيل شرهين=والناس ماخلوَ حداً ماحكوبه

من طاب قالو فيه والله ونعمين=ومن هان قالو عند ذكره وكوبه

والعز كنزٍ مايقدر بتثمين=للغانمين اللي شقوْ وتعبوبه

والوقت يمضي والخلايق مغيرين=ولابه حداً فيه يصفي شروبه

من عاش قرنٍ قال أنا عشت يومين=يفطن بها العاقل ويأخذ جروبه

أن الحياة أحلام والعمر تقنين=والادمي مثل القمر وصفوبه

وأتعس حياةٍ جارنا الله من الشين=من طال به عمرٍ وكثرت ذنوبه

يالله عسانا سالمينٍ معافين=في رحمتك نطمع ونخشى العقوبه

ياللي عبادك لك صيامٍ مصلين=وإسمك بمبدأ دينهم وحدوبه

المؤمنين الخاشعين الملبين=من زود جودك يرتجون المثوبه

الشاعر/ محمد بن حشفل الخضران الدوسري

امل ان تنال عاجابكم اخواني الاعضاء